Ի՞նչ ճակատագիր է սպասվում Մեծամորի ատոմակայանին ՀՀ-ԵՄ համաձայնագիրը վավերացնելուց հետո

Երբ ՀՀ ԱԳ նախարարի տեղակալ Կարեն Նազարյանը խորհրդարանին ներկայացրեց ՀՀ-ԵՄ համաձայնագիրը, դրանից հետո ԱԺ փոխնախագահ Միքայել Մելքումյանը, ինչպես ինքը նշեց, անհանգստացնող հարց ուղղեց փոխնախարարին, կապված հայկական ատոմակայնի հետ:

ԱԺ փոխնախագահը հետաքրքրվեց, թե ի՞նչ ճակատագիր է սպասվում ատոմակայանին, համաձայնագիրը վավերացնելուց հետո, քանի որ խոսք եղավ դրա փակման մասին: 

«Հայաստանի տնտեսության մրցունակության ապահովման կարևոր պայմաններից մեկը մեր էներգետիկ բալանսի պահպանումն է: Շատ հստակ ասեք, մենք ի՞նչ պարտավորություններ ենք ստանձնում ատոմկայանի մասով»,-հարցրեց Մելքումյանը:

Կարեն Նազարյանը նկատեց, որ այս ընթացքում դրա հետ կապված տարբեր լուրեր են շրջանառվել՝ նաև անհիմն: 

«Էներգետիկայի բնագավառում մենք ԵՄ-ի հետ պայմանավորվել ենք համագործակցել գործընկերության փոխադարձ շահի թափանցիկության և կանխատեսելիության սկզբունքների հիման վրա: Այդ համագործակցությունը պետք է ընդգրկի, ի թիվս այլ հարցերի, նաև Մեծամորի ատոմակայանի անվտանգ ապագործարկման համար ճանապարհային քարտեզի կամ գործողությունների պլանի վաղաժամկետ ընդունումը: Այսինքն՝ խոսքը գնում է ճանապարհային քարտեզի վաղաժամկետ ընդունման մասին, այլ ոչ թե ատոմակայանի փակման: Կողմերը պայմանավորվել են միջուկային էներգիայի բնագավառում համագործակցելիս հաշվի առնել ՀՀ առանձնահատկությունները, այդ թվում՝ ատոմային էներգիայի միջազգային գործակալության ստանդարտները, նաև ԵՄ փորձը: Կողմերի մոտեցման հիմքում ընկած է այն իրողությունը, որ երաշխավորված հզորությունը դուրս հանելու միակ փոխարինողը կարող է լինել հենց նույն երաշխավորված հզորությունը: Ընդ որում ատոմակայանը փոխարինել նոր բլոկով, դա ոչ թե մեր ցանկությունն է,  այլ ՀՀ էներգետիկ զարգացման ռազմավարության փաստաթղթի հիմնական պահանջը: Համաձայնագրի 42-րդ հոդվածում նշվում է՝ նոր հզորությամբ դրա փոխարինման անհրաժեշտության, ինչպես նաև Հայաստանի էներգետիկ անվտանգության և կայուն զարգացման պայմանների ապահովման հարցերի մասին: Սա է ընկած հոդվածի հիմքում»,-նշեց փոխարտոգրծնախարարը:

Պատասխանից հետո Մելքումյանը նկատեց.

«Այսինքն կարող ենք արձանագրել, որ կազմվելու է ժամանակացույց, բայց դուք նշում էիք ապագործարկման մասին: Շատ կարևոր է լինելու, որ այդ ժամանակցույցը լինի ողջամիտ ժամկետներով և հաշվի առնի այն փաստը, որ մենք այդ ընթացքում կարող ենք գործարկել նոր կարողություն, բայց սա պետք է լինի երաշխավորված: Մենք վերջին 6-7 տարում խնդիր ունենք: Վստահ պետք է լինենք, որ այս ժամանակացույցը կազմելիս չենք կարող ապագործարկումն ավելի շուտ իրականացնել, քան նոր ռեակտորի գործարկումը»,-ասաց ԱԺ փոխնախագահն: