Մեկնարկել է ԱԺ հերթական նիստերի աշխատանքը

Ազգային ժողովը փետրվարի 11-ին սկսել է հերթական նիստերի աշխատանքը:

Նիստի սկզբում ԱԺ նախագահ Ալեն Սիմոնյանը հայտնել է, որ Կենտրոնական ընտրական հանձնաժողովը ներկայացրել է թիվ 24 արձանագրությունը, ըստ որի` «Հայաստան» կուսակցությունների դաշինքի ընտրական ցուցակից ընտրված եւ լիազորությունները վաղաժամկետ դադարեցրած պատգամավորի մանդատը տրվում է «Հայաստան» կուսակցությունների դաշինքի ընտրական ցուցակի առաջին մասի հերթական հաջորդ թենածու Արմինե Խերանյանին:

«ԱԺ կանոնակարգ» սահմանադրական օրենքի համաձայն` ԱԺ կազմը համալրած պատգամավոր Արմինե Խերանյանն Ազգային ժողովի նիստում երդվել է:

Պատգամավորները հերթական նիստերի օրակարգը հաստատելուց հետո երկրորդ ընթերցմամբ քննարկել են մի շարք նախագծեր:

ՀՀ պաշտպանության նախարարի տեղակալ Արման Սարգսյանի ներկայացմամբ քննարկվել է ««Պաշտպանության մասին» օրենքում փոփոխություններ եւ լրացում կատարելու մասին» օրենքի նախագիծը` կից օրենսդրական փաթեթով:

Նախաձեռնությամբ նախատեսվում է ներկայում գործող աշխարհազորի համակարգը փոխարինել տեղական պաշտպանության ուժերով: Սահմանվում են այդ ուժերի ղեկավարման սկզբունքները, կառուցվածքը, այդ ստորաբաժանումների համալրման կարգը:

Հիմնական կարգավորումները` այստեղ:

Փոխնախարարի խոսքով առաջինից երկրորդ ընթերցում փաթեթի վերաբերյալ առաջարկներ չեն ներկայացվել:

«Կուտակային կենսաթոշակների մասին» օրենքում փոփոխություններն ու լրացումները ներկայացրել է ՀՀ կենտրոնական բանկի նախագահի տեղակալ Արմեն Նուրբեկյանը: Նախագծով, մասնավորապես, առաջարկվում է անցում կատարել էլեկտրոնային ծանուցումների համակարգի:

Հիմնական կարգավորումները` այստեղ:

Զեկուցողի տեղեկացմամբ առաջին ընթերցումից հետո կատարվել է մեկ տեխնիկական փոփոխություն:

«Վարչական իրավախախտումների վերաբերյալ ՀՀ օրենսգրքում փոփոխություններ եւ լրացումներ կատարելու մասին» օրենքի նախագիծը քննարկման է ներկայացրել Ֆինանսների նախարարի տեղակալ Արման Պողոսյանը: Կարգավորումները` այստեղ:

Նախագծով առաջարկվում է խստացնել Վարչական իրավախախտումների վերաբերյալ օրենսգրքով նախատեսված ֆինանսական հաշվետվությունները չհրապարակելու համար վարչական պատասխանատվության միջոցները. առաջին անգամ` 150,000 դրամ գործող 50,000-ի փոխարեն, երկրորդ դեպքում` 1,5 մլն դրամ գործող 500,000-ի փոխարեն, երրորդ դեպքում Կառավարությունն առաջարկել էր 3 մլն դրամ, սակայն ԱԺ ֆինանսավարկային եւ բյուջետային հարցերի մշտական հանձնաժողովի նախագահ Ծովինար Վարդանյանի առաջարկով այն փոխարինվել է 4,5 մլն դրամով:

Փոխնախարարը տեղեկացրել է, որ շուրջ 550 ընկերության համար աուդիտի պահանջը պարտադիր է:

«ՀՀ բյուջետային համակարգի մասին» օրենքում փոփոխություններն ու լրացումները բարձրաձայնել է Ֆինանսների նախարարի տեղակալ Վահան Սիրունյանը:

Առաջին ընթերցումից հետո գրավոր առաջարկներ չեն ստացվել, այդ ընթացքում տեխնիկական փոփոխություններ են կատարվել:

ՀՀ արդարադատության նախարարի տեղակալ Տիգրան Դադունցի ներկայացմամբ էլ քննարկվել են «Կոռուպցիայի կանխարգելման հանձնաժողովի մասին» եւ կից օրենքներում նախատեսվող լրացումները:

Առաջարկվում է քննչական մարմինների ղեկավարների եւ նրանց տեղակալների նկատմամբ կարգապահական վարույթ հարուցելու լիազորությունը վերապահել Կոռուպցիայի կանխարգելման հանձնաժողովին (ԿԿՀ): Սահմանվում է, որ ԿԿՀ-ի համապատասխան եզրակացությունները ներկայացվելու են Կառավարությանը կամ վարչապետին:

Երկրորդ ընթերցման ընթացքում Կառավարության առաջարկով վերոնշյալ ցանկում կավելացվեն նաեւ ՀՀ գլխավոր դատախազի տեղակալները: Կսահմանվի, որ քննչական մարմինների ղեկավարներին եւ նրանց տեղակալներին վերաբերող կարգավորումները չեն կիրառվում, եթե խախտումները կապված են քրեական վարույթի շրջանակում` որպես վարույթի հանրային մասնակից կատարված արարքին, իսկ գլխավոր դատախազի տեղակալների դեպքում: Սահմանադրությամբ դատախազության լիազորությունների շրջանակում կատարված արարքին: