Շիրակի մարզի շտապ բուժօգնության կայանները համալրվել են նոր մեքենաներով

Շիրակի մարզի շտապ բուժօգնության կայանները համալրվել են նոր մեքենաներով։ Հայաստան ներկրված 200 մեքենաներից 14-ը հատկացվել են Շիրակի մարզին, 1-ը՝ Ախուրյանի, 1-ը՝ Անիի տարածաշրջանի Մարալիկ քաղաքի, 3-ը՝ Արթիկի, 1-ը՝ Ամասիայի կայաններին: Գյումրիի շտապ բուժօգնության կայանին տրամադրվել է 8 մեքենա, որից 3-ը ռեանիմոբիլ է։ Գյումրիի շտապ բուժօգնության կայանի ավտոպարկում թարմացում եղել էր 7 տարի առաջ: Դրանից հներն էլ կան, 1990-ականներին էին ստացել: Հին սերնդի մեքենաների կողքին նոր մեքենաները տարբերվում են ամեն ինչով: Շտապ բուժօգնության 8 մեքենաները համապատասխանում են արդի պահանջներին, հագեցած են անհրաժեշտ բժշկական սարքավորումներով և պարագաներով:

Նախկին մեքենաներում խիստ անհրաժեշտ բուժպարագաները բացակայել են: Կանչի վայրում շատ արագ ու ժամանակին օգնությունն էլ երբեմն եղել է անօգուտ: 5 գծային մեքենաներն ու 3 ռեանիմոբիլները լիարժեք ունեն այն հնարավորությունները, որոնք անհրաժեշտ են տեղում ճիշտ ախտորոշման համար: Այս մասին  SHANTNEWS.am-ի հետ զրույցում ասել է շտապ բուժօգնության բժշկուհի Ռոզա Մովսեսյանը։

«Էլեկտրասրտագրության սարքը շատ կարևոր բժշկական գործիք է, որովհետև հաճախ ենք ունենում հիվանդներ, որոնք ինֆարկտ են տանում, այս սարքով հանգիստ ու շատ արագ կարող ենք մոնիտորով տեսնել վիճակը, դեղորայք կիրառելուց հետո էլ տեսնել արդյունքը։ Կարևոր է նաև շնչառական ապարատի առկայությունը, այն մոբիլ է ու կարող ենք ցանկացած տեղ տանել, միացնել փողոցում, տանը»,- ասել է Ռոզա Մովսեսյանը։

Նոր մեքենաների հետ նոր պահանջներ են առաջ գալիս, խոսքը նեղ մասնագետների մասին է: Կայանն ուներ ընդամենը մեկ ռեանիմոբիլ և երկու սրտաբան բժիշկ: Նոր մասնագետներ ընդունելու անհրաժեշտություն կա, բայց հաստիքները համալրել չի հաջողվում: Պատճառն էլ կայանի տնօրենը չի թաքցնում՝ աշխատավարձն է:

«Հայաստանում երևի քիչ են սրտաբաններն ու վերակենդանացման բժիշկները, նրանց մի մասն էլ չի ուզում աշխատել շտապ բուժօգնությունում, խնդիր ունենք աշխատավարձի հետ կապված, մի քիչ ցածր է»,- մեր թղթակցին ասել է կայանի տնօրեն Ռոբերտ Թորոսյանը։

Սրտաբանի, ռեանիմատոլոգի թափուր տեղերի համար հայտարարվող մրցույթներին հայտեր չեն ներկայացնում: Հիմա տնօրենը պատրաստվում է նոր առաջարկների փաթեթ ներկայացնել նախարարություն: Առաջարկներից մեկը վերաբերում է ունեցած վճարովի ծառայությունների հաշվին նեղ մասնագետների աշխատավարձը բարձրացնելուն։ Կայանի տնօրենին առայժմ հաջողվել է մրցութային կարգով լուծել 2 բուժքրոջ և 1 վարորդի թափուր տեղերի հարցը: 8 բժիշկ և 8 վարորդ արդեն տիրապետում են նոր մեքենաների հնարավորություններին. չինացի բժիշկ-գործընկերները նախապես մասնագիտական դասընթաց էին անցկացրել, որը ոչ միայն մեքենայի աշխատանքին, այլև բուժսարքավորումների կիրառմանն է առնչվել: Նոր մեքենաներն աշխատանքի դուրս կգան պետհամարանիշերի և փաստաթղթային ձևակերպման հարցերը լուծելուց հետո: Իսկ կայանի եղած հին՝ 10 մեքենաներից 4-ը դուրս կգրվեն կայանի հաշվեկշռից: Այդ մեքենաների ճակատագիրը կորոշի Առողջապահության նախարարությունը։