Ի՞նչ քայլեր են ձեռնարկվել Հայաստանում ներառական կրթության բարելավման նպատակով. մեկնարկել է միջազգային գիտաժողովը

Մեկնարկել է «Բարձրագույն մանկավարժական կրթության բարեփոխումները ներառականության համատեքստում» խորագրով միջազգային գիտաժողովը: Ծրագրի շրջանակներում Խաչատուր Աբովյանի պետական մանկավարժական և ԱՄՆ-ի Մինեսոտայի համալսարանները համագործակցել են՝ ներառական կրթության ոլորտում բարեփոխումներ իրականացնելու նպատակով: Ծրագրին աջակցել է UNICEF-ը:

Համագործակցության արդյունքում Հայաստանի պետական մանկավարժական համալսարանում ապագա ուսուցիչների կրթական ծրագրերը բարելավվել են: Երկու համալսարանների դասախոս-մասնագետների համատեղ ուժերով մշակվել է մանկավարժական ԲՈՒՀ-երի համար նախատեսված ներառական կրթության լայնածավալ դասագիրք:

«Դասագիրքը անգլերեն լեզվով է և այն հայերեն թարգմանելուց հետո կարող ենք հստակ նշել, որ դասագիրքն առաջինը կլինի հայերեն լեզվով՝ ներառական կրթության ասպարեզում»,- ասաց Խ. Աբովյանի անվան պետական մանկավարժական համալսարանի ռեկտոր Ռուբեն Միրզախանյանը:

Կրթության և գիտության նախարար Արայիկ Հարությունյանը ևս կարևորեց դասագրքի ստեղծումը:

«Հայաստանը մարզ առ մարզ անցնում է ներառական կրթության: 4 մարզում անցումը կատարվել է և վստահ եմ, որ առաջիկայում, երբ Երևանը սկսի անցումը համընդհանուր ներառման, այդ համագործակցությունը կշարունակվի: Նման ուսումնասիրությունները միայն հեշտացնում են այդ անցումը»,- ասաց  Արայիկ Հարությունյանը:

Դասագիրքը բաղկացած է 15 գլխից՝ 447 էջից, թարգմանչական աշխատանքներն արդեն սկսված են: Ծրագրի շրջանակներում իրականացվել են ուսուցողական այցեր Մինեսոտայի համալսարան, ստեղծվել են նաև չորս ուսուցողական մոդուլներ, տեսագրվել են վիդեոդասընթացներ՝ ներառական կրթության գործնական հմտությունները բարելավելու նպատակով, որոնք հասանելի կլինեն ՅՈՒՆԻՍԵՖ-ի և մանկավարժական համալսարանի կայքէջում:

Համագործակցության արդյունքում նկարահանվել է նաև ֆիլմ՝ «Ճանապարհ դեպի ներառականություն» վերնագրով, որտեղ ներկայացված է, թե ինչպե՞ս են ամերիկացի գործընկերները ծանոթացել Հայաստանում ներառականության դասընթացներին և ինչպես են ընկալում այն:

«Կրթական և երեխայի խնամքի ոլորտների բարեփոխումների համատեքստում Հայաստանում առկա է այնպիսի մասնագետների և ուսուցիչների կարիք, որոնք համապատասխան կարողություններ ունեն՝ ժամանակին բացահայտելու զարգացման խնդիրներ ունեցող երեխաներին և ապահովել համապատասխան մասնագիտական միջամտություն: Արձագանքելով այս պահանջներին՝ ՅՈՒՆԻՍԵՖ-ը նախաձեռնեց այս համագործակցությունը, որի նպատակն էր վերանայել ապագա ուսուցիչների կրթական ծրագրերը, որպեսզի կարողանանք տրամադրել աշակերտների կարիքներին համապատասխան ուսումնասիրություն»,- ասաց Հայաստանում ՅՈՒՆԻՍԵՖ-ի ներկայացուցիչ Տանյա Ռադոչայը:

Պետական մանկավարժական և Մինեսոտայի համալսարանները նաև հետագա համագործակցության պայմանագիր են ստորագրել: