Ցուցարարները Հանրապետության հրապարակում են․ ՈՒՂԻՂ ՌԵՊՈՐՏԱԺ

Ֆրանսիայի հրապարակում մեկնարկած հանրահավաքն այսօր շարունակվում է Նիկոլ Փաշինյանի առաջնորդությամբ։ Մասնակիցներն իրենց գործողությունները շարունակում են երթերով։

20։25. Հանրահավաքը մեկնարկել է

Հանրապետության հրապարակում հանրահավաքն արդեն սկսվել է: Բողոքի ակցիայի կազմակերպիչները կարդացին այն պատգամավորների անունները, որոնք կողմ են քվեարկել Սերժ Սարգսյանի թեկնածությանը։ Ցուցարարներն այդ անուններին արձագանքեց բացասական բղավոցներով:

19։15. Նիկոլ Փաշինյանը Հանրապետության հրապարակում է. հանրահավաքը շուտով կմեկնարկի։

19։10. Երթը հասավ Հանրապետության հրապարակ

Ցուցարարները ԱԳՆ-ի շենքի դիմացից շարժվեցին դեպի Հանրապետության հրապարակ։ Այս պահին նրանց առաջին խմբերը Ամիրյան փողոցից մտնում են հրապարակի տարածք: Նրանց երթը ղեկավարում է Շահեն Հարությունյանը: Նիկոլ Փաշինյանը դեռ չի միացել նրանց:

18։33. Գիշերվա միջադեպից 7 անձ է բերման ենթարկվել

«Ապրիլի 13-ից անցկացվող հանրահավաքները, երթերն անցկացվում են «Հանրահավաքների մասին» ՀՀ օրենքի խախտմամբ, առանձին դեպքերում հանցավոր դրսևորումներով, զանգվածային անկարգություններով»,- լրագրողներին հայտնել է ՀՀ գլխավոր դատախազության ՀԿԳ քննության նկատմամբ հսկողության վարչության պետ Վահագն Մուրադյանը: Նա անդրադարձել է նաև նախորդ օրը ուշ երեկոյան Մաշտոցի պողոտայում տեղի ունեցած միջադեպին՝ այն որակելով որպես «զանգվածային անկարգություններ»:

Մուրադյանի խոսքերով` անկարգություններին մոտ 70 մարդ է մասնակցել, որոնցից 7-ին բերման են ենթարկել: Մուրադյանի փոխանցմամբ՝ սադրիչներին վրդովվեցրել են «Սանիթեք» ընկերության կողմից իրականացվող մաքրման աշխատանքները, ինչից հետո էլ տեղի են ունեցել անկարգությունները: Պաշտոնյան նշել է, որ երեկվա անկարգությունների ժամանակ 3 ոստիկանական մեքենա է վնասվել, ու արդեն քրեական գործերն են հարուցվել նշյալ դեպքերի կապակցությամբ:

ShantNews.am-ը պաշտոնյայից ճշտել է` արդյո՞ք զանգվածային անկարգությունների մասնակիցները կապ ունեն ցույցերի մասնակիցների հետ, ինչին ի պատասխան, Վահագն Մուրադյանը նշել է, որ իրենց ունեցած տվյալներով՝ այդ անձինք մասնակցել են ցույցերին:

18։25. Շարունակվում է ցույցը Գյումրիում

Ժամեր առաջ Գյումրիում բերման ենթարկված ակտիվիստներից չորսն ազատ են արձակվել ժամը 18:15-ին, հաղորդում է ShantNews.am-ի Գյումրիի թղթակիցը: Ակտիվիստներն արդեն միացել են Գյումրիի Թատերական հրապարակում հավաքված մյուս ցուցարարներին։

18։20. ԱԳՆ շենքի մոտ լարվածությունն անցավ

Ցուցարարների «պաշարած» նախարարությունների աշխատակիցները շենքից դուրս եկան և հետնամուտքով լքում են տարածքը: Ցույցը ղեկավարում է Շահեն Հարությունյանը, որը քիչ առաջ զրուցում էր Վալերի Օսիպյանի հետ: ShantNews.am-ի հետ զրույցում Շահեն Հարությունյանը նշեց, որ Օսպիյանի հետ խոսում էին սադրիչների և կազմակերպվող սադրանքների մասին:

«Մենք ժամը 7-ին պետք է բարձրանանք դեպի Հանրապետության հրապարակ, Նիկոլ Փաինյանն էլ շուտով կվերադառնա»,– ասաց Շահեն Հարությունյանը։

Ցույցերն առաջնորդող Նիկոլ Փաշինյանի խոստացած 1․5 ժամն արդեն լրացել է, և նա դեռ «Քաղաքացիական պայմանագիր» կուսակցության գրասենյակում է, ըստ երևույթին, ցույցի նախաձեռնող խմբի խորհրդակցությունը դեռ չի վերջացել:

18։00. Որքա՞ն են քայլել ցուցարարները

Երևանի փողոցներով Նիկոլ Փաշինյանի նախաձեռնած երթի մասնակիցներն անցել են առնվազն 9․3 կիլոմետր ճանապարհ։ Ցուցարարներն անցել են Բաղրամյան, Մաշտոց, Կորյուն, Չարենց, Ալեք Մանուկյան, Վարդանանց, Չարենց, Նար-դոս, Տիգրան Մեծ, Ագաթանգեղոս, Գրիգոր Լուսավորիչ, Բեյրութ ու Վազգեն Սարգսյան փողոցներով։

Այդ ամբողջ ճանապարհը ցուցարարները որոշ ընդմիջումներով հաղթահարել են ավելի քան 6 ժամում։ Google Maps համակարգի հաշվարկի համաձայն՝ անդադար ու առանց կանգառների քայլելու դեպքում կարելի էր անցնել 2 ժամում։

Ցուցարարների տեղափոխությունը, ինչպես ասում են ֆիզիկոսները, եղել է 1․25 կիլոմետր։ Իսկ առավելագույն կարճ ճանապարհով այդտեղ կարելի էր հասնել 19 րոպեում՝ 1․6 կմ ճանապարհ անցնելով Հյուսիսային պողոտայով կամ Մաշտոցի պողոտայով։

17։45. ՀՀ ԱԳՆ շենքի մոտ լարված է

ՀՀ ԱԳՆ շենքի մոտ իրավիճակը լարված է, տարածքում ոստիկանական ուժեր են կուտակել և չեն թողնում, որ լրագրողները առաջ գնան: Երևանի փոխոստիկանապետ Վալերի Օսիպյանը պարզաբանել է, որ մոտ 20 րոպեից աշխատանքային ժամերը վերջանում են և պետք է պաշտոնյաները շենքից դուրս գան, և նրանց պետք է ճանապարհ տալ: Ցուցարարները ԱԳՆ շենքի բակից գնացել են դեպի Վազգեն Սարգսյան փողոց, որը շարունակում է միակողմանի փակ մնալ:

17։03. Փաշինյանը մեկնել է խորհրդակցության

ՀՀ ԱԳՆ շենքի մոտից Նիկոլ Փաշինյանը 1-1․5 ժամով գնացել է «Քաղաքացիական պայմանագիր» կուսակցության գրասենյակ՝ քննարկումների: Մինչ այդ ցուցարարները հավաքված են ՀՀ արտաքին գործերի նախարարության շենքի դիմաց։ Վազգեն Սարգսյան փողոցը միակողմանի փակ է։

17։05. Բերման ենթարկվածների քանակը

«Վարչական իրավախախտում կատարելու կասկածանքով ՀՀ Ոստիկանության բաժանմունքներում 18.04.2018 թվականի դրությամբ բերման է ենթարկվել 84 քաղաքացի, 54-ի նկատմամբ հարուցվել է քրեական գործ»,- ShantNews.am-ին տեղեկացրեց ՀՀ ոստիկանության ԶԼՄ-ների հետ կապի, վերլուծության և լրատվության բաժնի պետ էդգար Ջանոյանը:

Նա նաև տեղեկացրեց, որ բերման ենթարկվածներից 30-ի նկատմամբ հարուցվել է վարչական վարույթ: Մյուսների նկատմամբ հանցագործության կատարման կասկածանքով հարուցվել են քրեական գործեր: Նախաքննական մարմինը նյութեր է նախապատրաստում դատարան ներկայացնելու համար:

16։28. Ցուցարարները շրջափակել են ԱԳն շենքը

Հանրահավաքի մասնակիցները Երևանի քաղաքապետարանի շենքի մոտից շարժվեցին դեպի ՀՀ ԱԳՆ, որտեղ Փաշինյանը կոչ արեց տեղավորվել ու շրջափակել շենքը։ Ըստ Նիկոլ Փաշինյանի նախապես արած հայտարարության՝ մինչև 19.00 նրանք կլինեն Հանրապետության հրապարակում, որտեղ հանրահավաքի կազմակերպիչը հայտարարություն կանի:

Մինչ այդ ցուցարարներից մեկը Նիկոլ Փաշինյանին ներկայացրեց Kanye West-ի All day nigga երգի՝ ցույցերի թեմատիկայով վերամշակման ենթարկված նոր տարբերակը:

16։00. Ընդմիջում քաղաքապետարանի մոտ

Նիկոլ Փաշինյանը համախոհների հետ շարունակում է նստած մնալ Գրիգոր Լուսավորիչ փողոցի մեջտեղում. ցուցարարների մի մասը նստած է Երևանի քաղաքապետարանի մուտքի դիմաց: Նրանք այս պահին հաց են ուտում: Գրիգոր Լուսավորիչ փողոցը փակ է, և այդ հատվածում երթևեկություն չկա:

15։00. Ցուցարարները փորձեցին փակել Ֆրանսիայի հրապարակը

Ֆրանսիայի հրապարակում մի խումբ ցուցարարներ ցանականում էին փակել փողոցը, սակայն ոստիկանական ուժերը արագ ժամանեցին դեպքի վայրը ու ևս մի քանի ցուցարարների բերման ենթարկեցին: Այժմ հրապարակի երթևեկությունը վերականգնված է:

14։54. Ցուցարարները փակեցին քաղաքապետարանի մուտքերը

Քայլերթի մասնակիցները փակել են Երևանի քաղաքապետարանի բոլոր մուտքերը: Ցուցարարներն այժմ դուրս են կանչում քաղաքապետին:

14։10. Փակ է Լուսավորիչ-Արշակունյաց խաչմերուկը

Ցուցարարները փակել են Գրիգոր Լուսավորիչ-Արշակունյաց խաչմերուկն ու երթևեկությունը կաթվածահար արել այնտեղ: Ցուցարարները նստացույց են անում:

13։15. ՄԻՊ. Անթույլատրելի է լրագրողի աշխատանքի խոչընդոտումը

Հայաստանի մարդու իրավունքների պաշտպանն անթույլատրելի է համարում Թումանյան-Մաշտոց փողոցների խաչմերուկում factor.am կայքի գլխավոր խմբագիր Արևիկ Սահակյանի մասնագիտական գործունեության խոչընդոտումը: Դեպքի վերաբերյալ հրապարակված տեղեկությունները ՄԻՊ աշխատակազմի կողմից ամփոփովել և ուղարկվել են քրեական հետապնդման մարմնին։

13։06. Երթն անցնում է Ալեք Մանուկյան փողոցով

Երթի մասնակիցներն այս պահին շարժվում են Ալեք Մանուկյան փողոցով, որտեղ մի շարք ուսհաստատություններ են գտնվում: Նիկոլ Փաշինյանը կոչով դիմում է ուսանողությանն ու դասախոսներին այսօրվա հանրահավաքին միանալու համար:

12։50. Փաշինյանը պատասխանեց ShantNews.am-ի հարցերին

Shantnews.am-ի լրագրողը Նիկոլ Փաշինյանից ճշտել է՝ արդյո՞ք նրանք այսօր գիշերելու են փողոցում, ինչին ի պատասխան Փաշինյանը նշել է, որ իրենք այս պահին անտրամաբանական են համարում այդ քայլը: Նա ընդգծել է, որ իրենք իրենց չեն կաշկանդում որևէ տարբերակով:

«Հավաք ենք անում այնտեղ, որտեղ ցանկանում ենք»,- նշել է Փաշինյանը:

12։37. Երթի մասնակիցները ավարտեցին հավաքը ԵՊՀ-ում

Քիչ առաջ երթի մասնակիցներն ավարտեցին հավաքը ԵՊՀ-ում: Այս պահին երթի մասնակիցներն Ալեք Մանուկյան փողոցում են:

12։35. Մինչև հիմա 66 մարդ է բերման ենթարկվել

Ժամը 12.00-ի դրությամբ, ՀՀ ոստիկանության տարբեր բաժանմունքներ բերման է ենթարկվել 66 քաղաքացի: Այս մասին SHANTNEWS․AM-ին տեղեկացրեց ՀՀ ոստիկանության ԶԼՄ-ների հետ կապի, վերլուծության և լրատվության բաժնի պետ Էդգար Ջանոյանը:

12։27. ԵՊՀ առջև ելույթ են ունենում երթի մասնակիցները

Նիկոլ Փաշինյանը կոչ արեց բոլոր ուսումնական հաստատություններին չփակել դռներն ուսանողների վրա:

12։17. Երթի մասնակիցներն հասան ԵՊՀ

Shantnews.am-ի թղթակիցը հայտնում է, որ երթի մասնակիցներն այս պահին ԵՊՀ կենտրոնական մասնաշենքի մոտ են: Նիկոլ Փաշինյանը հայտարարեց, որ համալսարանի տարածքում 15 րոպե հավաք կանցկացնեն, այնուհետ կշարունակեն երթը:

12։07. Վերականգնվել է Ֆրանսիայի հրապարակի երթևեկությունը

Քիչ առաջ վերականգնվել է Ֆրանսիայի հրապարակի երթևեկությունը՝ բոլոր 4 ուղղություններով:

12։00. Երթն ընթանում է Կորյունի փողոցում

Ընդդիմադիրների երթն այս պահին ընթանում է Կորյունի փողոցում: Ակտիվիստները «Միացե՛ք», «Դասադուլ» կոչերով դիմում են այն քաղաքացիներին, որոնք հետևում են երթի ընթացքին:

11։36. Թույլատրվեց շարժվել Մաշտոցի պողոտայով

Բանակցություններից հետո ոստիկանությունը թույլատրեց երթի մասնակիցներին շարժվել Մաշտոցի պողոտայով դեպի Հերացու, այնուհետ Աբովյան փողոցներ: Այս պահին երթի մասնակիցները կոչերով շարժվում են Մաշտոցի պողոտայով:

11։33. Փաշինյանը բանակցում է ոստիկանների հետ

Shantnews.am-ի թղթակիցը հայտնում է, որ քիչ առաջ ոստիկանությունը շրջափակեց Ֆրանսիայի հրապարակը: Այս պահին Նիկոլ Փաշինյանը բանակցում է ոստիկանների հետ:

11։20. Ցուցարարները շարժվում են Ֆրանսիայի հրապարակի կողմ

Նիկոլ Փաշինյանը հայտարարեց, որ իրենք շարժվում են այլ փողոցներ՝ փակելու դրանք և հավաքելու իրենց կողմնակիցներին։ Սակայն հանրահավաքի մասնակիցների մի մասը շարունակելու է մնալ վարչապետի նստավայրի դիմաց՝ փակ պահելու համար դրա մուտքը։

11։13. Փակ են Բաղրամյան, Դեմիրճյան և Պռոշյան փողոցները

ShantNews.am-ի լրագրողը տեղից հայտնում է, որ հանրահավաքի մեծ մասը ուսանողներն են։ նրանք փակ են պահում վարչապետի նստավայրի մուտքը։ Հանրահավաքի մասնակիցների մի մասը Նիկոլ Փաշինյանի հետ շրջում է մոտակա տարածքում՝ շարժվելով Բաղրամյան-Դեմիրճյան և Բաղրամյան-Պռոշյան խաչմերուկներում։

Ֆրանսիայի հրապարակում մնացել է ցուցարարների փոքրաթիվ խումբ, քանի որ մեծ մասը գնացել են Բաղրամյան պողոտա։ Այս պահին փակ են Բաղրամյան պողոտան, Դեմիրճյան և Պռոշյան փողոցները։

10։57. Ցուցարարները շարժվեցին դեպի վարչապետի նստավայր

Նիկոլ Փաշինյանի առաջնորդությամբ հանրահավաքի մասնակիցների մի մասը հասավ Բաղրամյան 26՝ վարչապետ Սերժ Սարգսյանի նստավայր։ Նրանց մուտքը շենքի տարածք արգելափակված է նաև ոստիկանական ուժերով։ Մինչ այդ ոստիկանական ուժերը հավաքված էին Դեմիրճյան փողոցում, որտեղից էլ տեղափոխվել են վարչապետի նստավայրի դիմաց։