Իրավապահները լավ չեն կատարել իմ՝ որոշ օլիգարխների և նրանց թիկնապահների՝ ասֆալտին պառկեցնելու հրահանգը. վարչապետ

Կառավարության հետ հարցուպատասխանի ժամանակ «Ելք» խմբակցության պատգամավոր Լենա Նազարյանն ասել է, որ  երեկ ԱԺ բակում հավաքված քաղաքացիները, երբ հանդարտ հեռացել են Դեմիրճյան փողոցով, ականատես են եղել, թե ինչպես են ՀՀԿ պատգամավոր Միհրան Պողոսյանն ու նրան ուղեկցող մարդիկ հայհոյել քաղաքացիներին:

«Կա տեսանյութ: Արդյո՞ք տեղյակ եք այդ միջադեպից և ի՞նչ քայլեր են ձեռնարկվել քաղաքացիներին հայհոյող, հասարակական կարգը խախտող անձանց նկատմամբ»,- հարցրել է Լենա Նազարյանը:

«Այդ միջադեպը, որի մասին պատմում եք, վկայում է այն մասին, որ ուժային կառույցները, մասնավորապես որոշ դեպքերում լավ չեն կատարել տիկին Կյուրեղյանի նշած հանրահավաքում իմ հնչեցրած այն հրահանգը, որ որոշ օլիգարխների և նրանց թիկնապահների պետք է պառկեցնել ասֆալտին:

Այ, եթե պատշաճ ձևով էդ հրահանգը կատարած լինեին, կարծում եմ՝ երեկվա միջադեպը չէր լինի: Ես համոզված եմ, որ նրանք բաց թողնվածն անպայման կլրացնեն: Ես ուզում եմ մի այսպիսի բան ասել՝ երեկ, երբ մենք շփվում էինք ՀՀԿ խմբակցության ներկայացուցիչների հետ և երբ մտա ԱԺ նախագահի աշխատասենյակ, ՀՀԿ և ոչ միայն հանրապետական մեր գործընկերները բավականին հուզված էին հասկանալի պատճառներով: Ես ինքս իմ կողմից ամեն ինչ արեցի, որպեսզի լարվածությունը նվազի: Նույնիսկ կատակներ արեցի»,- ասել է վարչապետը:

Ըստ Փաշինյանի՝ ինքը բազմիցս ասել է և հիմա էլ ասում է, որ իրենց ժպիտները և քաղաքավարությունը որևէ մեկը հանկարծ  չփորձի մեկնաբանել որպես թուլություն:

«Բայց ես չգիտեմ՝ Միհրան Պողոսյանի թիկնապահներն են դրանք եղե՞լ, թե՞ ոչ, բայց Միհրան Պողոսյանն այնտեղ նույնպես ներկա է եղել և, ըստ ամենայնի, նա իսկապես այդպիսի պահվածք է ցուցաբերել, սա կնշանակի, որ նա, այնուամենայնիվ լավ չի հասկացել այն, ինչը կատարվել է այդ սենյակում և լավ չի հասկանում այն, ինչ կատարվում է ՀՀ-ում: Երեկ ես զգացի, որ առավել մեծ ջանքեր են պահանջվում ինձնից, որպեսզի մեր հայրենակիցներին հասանելի դարձնեմ իմ խնդրանքները և հորդորները, որ ԱԺ պատգամավորների և, հատկապես ՀՀԿ պատգամավորների նկատմամբ ցուցաբերեն հանդուրժողական վերաբերմունք»,- հավելել է Նիկոլ Փաշինյանը:

Վարչապետի խոսքերով՝ եթե պարզվի, որ որևէ պատգամավոր կամ պատգամավորի, այսպես կոչված, ուղեկցող անձինք այդպիսի պահվածք են ցուցաբերում, նրանք կստանան շատ խիտ հակահարված օրենքի կողմից:

«Եվ ես հույս ունեմ, որ օրենքն այնքան զորեղ կգտնվի, որ քաղաքացիները իրենց բավարարված կզգան դրանից և չի ստացվի այնպես, որ Միհրան Պողոսյանը, նրա նմանները Երևան քաղաքի փողոցներում քայլելու պրոբլեմ ունենան: Ես ուզում եմ զգուշացնել  բոլոր նրանց, ովքեր այդպիսի արարքների հեղինակներ են, որ նրանք շատ հաստատուն քայլերով գնում են այդ ուղղությամբ: Կարող է մեր ուժերն այլևս չբավարարեն, որպեսզի կարողանանք ոմանց՝ Երևան քաղաքում հանգիստ քայլելու իրավունքը պատշաճ ձևով կազմակերպենք: Իրավապահները պետք է շատ կտրուկ գործեն, և իմ տեղեկություններով՝ արդեն իսկ կան այդ գործով բերման ենթարկվածներ»,- ավելացրել է վարչապետը: