ԱԺ լուծարումը պետք է իրականացվի ոչ թե վարչապետի հրաժարականի, այլ դրա մասին հանրաքվեի միջոցով. Վարուժան Ավետիսյան

«Եթե խորհրդարանը լինի սևերի և սպիտակների ամբողջություն, ապա լուրջ մտահոգություն պետք է հայտնենք՝ բնության մեջ սևերի և սպիտակների հանրագումարը գորշությունն է, մենք չենք ուզում գորշ խորհրդարան, մենք ուզում ենք, որ սպիտակի սպեկտորը բացվի, լինի բազմազան խորհրդարան, որը կարտահայտի ժողովրդի կամքը», – հոկտեմբերի 5-ին հրավիրված ասուլիսի ժամանակ ասաց «Սասնա ծռեր» կուսակցության անդամ Վարուժան Ավետիսյանը:

Նրա խոսքերով՝ հեղափոխությունը պետք է ունենա իրեն բնորոշ տրամաբանությունը և շարժվի դրանով: Նախ պետք է սահմանվի անցումային շրջան, որի ընթացքում պետք է երկիրն ու քաղաքական դաշտը մաքրվեն, սևերը հեռացվեն քաղաքական դաշտից, իսկ մնացյալ ուժերը ստեղծեն սպիտակի սպեկտորը`մնացած գույներին դրսևորվելու հնարավորություն տալով: Անցումային ժողովրդավարությունը ենթադրում է կոշտ կառավարում, դա կարող է լինել կառավարությանը կարճ ժամանակով օրենսդիր լիազորություններ տրամադրելով:

«Այդ հեղափոխական, արտակարգ լիազորություններ ունեցող կառավարությունը կարճ ժամանակում կմաքրի դաշտը, կստեղծի պայմաններ՝ անհրաժեշտության դեպքում նաև ռազմավարական հարցերի շուրջ հանրաքվեներ անցկացնելով»,- ասաց Վարուժան Ավետիսյանը:

Ըստ Վարուժան Ավետիսյանի՝ անցումային ժողովրդավարության կարևորագույն բաղադրիչներից է անցումային արդարադատությունը: Հաշվի առնելով հասցված ծանրագույն վնասներն ու հետևանքները՝ «Սասնա ծռեր»-ն անցումային արդարադատությունը պատկերացնում է նյուրնբերգյան դատավարության տարբերակով և ոչ թե մեղմ տարբերակներով: Կուսակցությունը կրկին փաստում է հակահեղափոխական տրամաբանությամբ հեղափոխություն կատարելու անհնարինության մասին:

«Չի կարող հակասահմանադրական փաստաթուղթը, որն ընդունվել է կեղծիքով ու բռնությամբ, որի անունը դրել են սահմանադրություն, կոչվել սահմանադրություն, ինչ է թե անունը դրել են սահմանադրություն: Չի կարող ժողովրդի կամքը չարտահայտող պատգամավորների համախումբը, որ ԱԺ է կոչվում, ժողովրդի անունից օրենք անունով փաստաթուղթ ընդունի, և դրանք կոչվեն օրենքներ, իսկ մենք էլ հլու, հնազանդ, բռնակալության, օլիգարխիայի, խանական համակարգի, Կրեմլի գործակալների ընդունած օրենքները, Սահմանադրությունը մեզ համար դարձնենք սրբազան նորմերի հավաքածու և դրանով առաջնորդվենք: Կամքը ժողովրդինն է, պետք է այն կատարվի»,- ասաց Վարուժան Ավետիսյանը:

Ժողովրդի կամքը, ըստ կուսակցության տրամաբանության, դինամիկ զարգացող սահմանադրությունն է: Բանակցել սևերի հետ, նշանակում է գնալ ժողովրդի կամքին հակառակ: Ըստ կուսակցության՝ ԱԺ լուծարումը պետք է իրականացվի ոչ թե վարչապետի հրաժարականի, այլ դրա մասին հանրաքվե անցկացնելու միջոցով: