Երբ սրիկաները ազատ են, իսկ անմեղները՝ բանտում. Նորք-Մարաշի զինված խմբի գործով ամբաստանյալ Արթուր Վարդանյան

Նորք-Մարաշի զինված խմբի գործով ամբաստանյալ Արթուր Վարդանյանը «Դատապարտյալների հիվանդանոց» ՔԿՀ-ում է, ունի բարձր ջերմություն, լյարդը մեծացած է 7 սմ-ով, ունի ստամոքսի սուր խնդիր, սակայն դատարանը մերժել է գրավի դիմաց նրա կալանքը փոխելու փաստաբանների միջնորդությունը:

Այս մասին այսoր հրավիրված ասուլիսին հայտարարել է իրավաբան Հայկազ Մակարյանը: Նա նաև կարդացել է ամբաստանյալի նամակները՝ ուղղված ՀՀ իշխանությանը, որտեղ Արթուր Վարդանյանն ասում է, թե իր խափանման միջոց կալանքը չփոխելը «ինչ-որ աներևույթ  ուժերի» անձնական վրեժխնդրությունն է:

Իրավաբանը հայտարարել է նաև, որ Արթուր Վարդանյանն անմեղ է, քանի որ, ըստ մեղադրանքի, հայտնաբերված զինանոցը, պայթուցիկները նախատեսված են եղել Արցախ տեղափոխելու համար:

«Երբ սրիկաները ազատ են, իսկ անմեղները՝ բանտում» վերնագրված նամակում Արթուր Վարդանյանը գրել է, թե մինչ հեղափոխությունը հասկանում էր՝ ինչու է բանտում, քանի որ «դա  հաղթանակն էր  ընդդեմ կոռուպցիայի, բռնապետության ու ավազակապետության»:

Իրավաբանը հիշեցրել է, որ ՔՕ 235 հոդվածի 2 րդ մասով (ապօրինի զենք-ռազմամթերք ձեռք բերելը, պահելը, իրացնելը, փոխադրելը), որում մեղադրվում է Արթուր Վարդանյանը,  մեղադրվում են նաև այլ քրեական գործերով ամբաստանյալներ, ովքեր այս պահին ազատության մեջ են, և նրանց կալանքը փոխվել է գրավով կամ անձնական երաշխավորությամբ:

Իրավաբանը շեշտել է, որ Արթուր Վարդանյանը աջակցում է վարչապետ Նիկոլ Փաշինյանին և հեղափոխությանը:

Հիշեցնենք՝ Երևան քաղաքի ընդհանուր իրավասության դատարանի Կենտրոն Նորք -Մարաշ վարչական շրջանի դատավոր Արմեն Բեկթաշյանը  հոկտեմբերի 1-ին մերժել էր 1 մլն դրավի դիմաց ամբաստանյալի խափանման միջոց կալանքը փոխելու՝ պաշտպան Լևոն Բաղդասարյանի միջնորդությունը:

Հիշեցենք  նաև, որ ավելի վաղ՝ հունիսի 25-ին, ազատ էր արձակվել Նորք-Մարաշի զինված խմբի գործով ամբաստանյալ, պաշտպանության նախարարի նախկին տեղակալ Վահան Շիրխանյանը։

Նորք-Մարաշի զինված խմբի գործի շրջանակում մեղադրանք է առաջադրվել ավելի քան երեք տասնյակ մարդու: Ըստ մեղադրանքի` Արթուր Վարդանյանի գլխավորած զինված խումբը ծրագրել էր բռնությամբ զավթել իշխանությունը՝ թռիչքի պահին խոցել նախագահի օդանավը, հարձակում գործել ՀՀ նախագահի նստավայրի, Ազգային ժողովի, Սահմանադրական դատարանի, կառավարության, Հանրային հեռուստաընկերության և այլ հաստատությունների շենքերի վրա:

Նրանց մեղադրանքներ են առաջադրվել հանցավոր համագործակցություն ստեղծելու և ղեկավարելու (Քրեական օրենսգրքի 223-րդ հոդվածի 1-ին մաս), հանցավոր համագործակցությանը մասնակցելու (Քրեական օրենսգրքի 223-րդ հոդվածի 2-րդ մաս) և կազմակերպված խմբի կողմից ապօրինի կերպով հրազեն, ռազմամթերք, պայթուցիկ նյութեր ձեռք բերելու, իրացնելու, պահելու, փոխադրելու և կրելու (Քրեական օրենսգրքի 235-րդ հոդվածի 3-րդ մաս) համար:

Բացի Արթուր Վարդանյանից, բոլոր ամբաստանյալների խափանման միջոցն այժմ փոխված է: