Ստանիսլավսկու անվան ռուսական դրամատիկական թատրոնը նոր ղեկավար ունի. կոլեկտիվի կարծիքները միանշանակ չեն

Կոնստանտին Ստանիսլավսկու անվան ռուսական դրամատիկական թատրոնը ունի նոր գեղարվեստական ղեկավար: Այս մասին այսօր՝ հոկտեմբերի 16-ին, հայտարարեց թատրոնի տնօրեն Ֆրեդ Դավթյանը:

«Արդեն լրանում է 1 տարին, որ մենք կորցրեցինք մեր շատ սիրելի գեղարվեստական ղեկավար Ալեքսանդր Գրիգորյանին, դա մեծ կորուստ էր բոլորիս համար: Ոչ մի թատրոն չի կարող գոյություն ունենալ առանց իր գեղարվեստական ղեկավարի, ուստի ես ստիպված էի կատարել իմ ընտրությունը»,- ասաց Ֆրեդ Դավթյանը:

Գեղարվեստական ղեկավարի պաշտոնի համար առաջադրվել էին Նորա Գրիգորյանի, Սուրեն Շահվերդյանի, Կարեն Ներսիսյանի, Ռոբերտ Մանուկյանի և Վլադիմիր Գաբբեի թեկնածությունները: Մշակույթի նախարարությունը, ուսումնասիրելով թեկնածուների ծրագրերը, որոշել է, որ ընտրությունը պետք է լինի Սուրեն Շահվերդյանի և Կարեն Ներսիսյանի միջև:

Նախարարությունն առաջարկել է մեկամսյա ժամանակ տրամադրել թեկնածուներին մեկ ժամանոց բեմադրություն անելու համար, սակայն, ըստ թատրոնի տնօրենի, 1 ամսում հնարավոր չէ բեմադրություն անել, ավելին, սպասելու ժամանակ չկա: Առաջ գնալու համար թատրոնին գեղարվեստական ղեկավար է անհրաժեշտ, ուստի թատրոնի տնօրենը, չհամաձայնելով նախարարության առաջարկին, նշանակել է տնօրեն:

«Վերջին 2 թեկնածուն, որ լուրջ տպավորություն թողեցին իրենց գործունեությամբ, ծրագրերով ու ներկայացման հատվածներով, երկուսն էին՝ Կարեն Ներսիսյանը և Սուրեն Շահվերդյանը: Եթե Սուրեն Շահվերդյանին գիտեն բոլորը, ապա Կարեն Ներսիսյանն իր աշխատանքային և ստեղծագործական գործունեությունը սկսել է այս թատրոնից, մեկ տարի աշխատել է բեմի բանվոր, ունեցել է ձգտում՝ թատրոնը իմանալ ներսից, այնուհետև մեկնել է ՌԴ, 9 տարի աշխատել Մարկ Ռազովսկու անվան թատրոնում, բեմադրել է տարբեր ներկայացումներ տարբեր թատրոններում՝ համարյա 50 բեմադրություն ունի»,- ընդգծեց Ֆրեդ Դավթյանը:

Նոր գեղարվեստական ղեկավարի հարցում կոլեկտիվի կարծիքները միանշանակ չեն:

«Սուրեն Շահվերդյանին ճանաչում եմ, գիտեմ՝ ինչ հնարավորություններ ունի, ինձ համար ինչպես «кот в мешке»: Տնօրենը հայտարարեց, որ իր որոշումն է, դե, թող որոշի, բայց ես չեմ ճանաչում այդ մարդուն, թեպետ անձնական ոչինչ չունեմ նրա դեմ»,- ասաց Ստանիսլավսկու անվան թատրոնի դերասան Ռոբերտ Մանուկյանը:

SHANTNEWS.am-ի հարցին՝ արդյո՞ք այս որոշումը կազդի թատրոնի հետագա աշխատանքների վրա, Ռոբերտ Մանուկյանը նշեց, որ իր աշխատանքի վրա չի ազդի:

«Ես պրոֆեսիոնալ եմ, և եթե լեզու չեմ գտնում բեմադրիչի հետ, ինքս եմ բեմադրում: Կցանկանան աշխատել՝ կաշխատենք, լեզու կգտնենք: Որ ասեմ՝ գրկաբաց որոշումը ողջունում եմ, սուտ կլինի, էլի դեմ եմ այս ամենին: Եթե մշակույթի նախարարությունն այս խեղկատակությունը ընդունում է, ես կընդունեմ ու կընդունեմ»,- ասաց Ռոբերտ Մանուկյանը:

Հիշեցնենք, որ Ռոբերտ Մանուկյանը ևս իր թեկնածությունն առաջադրել էր և դեմ էր արտահայտվում թատրոնի նախկին գեղարվեստական ղեկավար Ալեքսանդր Գրիգորյանի դստեր՝ 25-ամյա Նորա Գրիգորյանի թեկնածությանը՝ նշելով, որ թատրոնը ժառանգաբար չի փոխանցվում: