«Գագասիկի», թաղային հեղինակության ընտրություն է. Արամ Սարգսյանը` համամասնական ընտրակարգի մասին

ԱԺ «Ելք» խմբակցության անդամ Արամ Սարգսյանը խորհրդարանի հոկտեմբերի 22-ի արտահերթ նիստում կոչ արեց կողմ քվեարկել նոր Ընտրական օրենսգրքին:

«Արտակ Զեյնալյանը կփաստի, որ իր ներկայացումներից հետո ես երբեք մեկնաբանություններ չեմ արել, որովհետև համարել եմ, որ նա միշտ կոնկրետ է և սպառիչ: Ներկայացված օրենքին միանշանակ ասում եմ «այո՛», կուզեի, որ որոշակի ամփոփում անեինք վերջին շրջանի մեր գործունեության:

Իրականության մեջ խնդիրը հետևյալն է` թե՛ ՀՀԿ խմբակցությունը, թե՛ «Ծառուկյան» դաշինքը, թե՛ Դաշնակցությունը, թե՛ «Ելք» խմբակցությունը կողմ են արտահայտվել դեկտեմբերին արտահերթ ընտրություններ կատարելուն, այս հարցը քննարկումից դուրս է, չարժե այս թեմայի վրա նորից ժամանակ ծախսել: Ամբողջ խնդիրն այն է, թե ինչ ընտրություն պետք է կատարենք, ինչ Ընտրական օրենսգրքով, այստեղ է խնդիրը:

Եթե կան ուժեր, որ ուզում են` ընտրություններն անցկացվեն հին օրենսգրքով, հարց է առաջանում` ինչ են շահելու, որովհետև հանրային ընկալման մեջ նույն այդ համամասնականը համարվում է հինը, վատը, իմ գործընկեր Էդմոն Մարուքյանի ասած «Գագասիկի» ընտրություն, ժողովուրդն այդպես է ընկալել, որ դա թաղային հեղինակության ընտրություն է»,- ասաց նա:

Սարգսյանը նշեց, որ կան մարդիկ, ովքեր տեղերում նաև անձնական լուրջ հեղինակություն ունեն, և վարկանշային ընտրությունների ժամանակ իրենց հեղինակությամբ են քվե վերցրել: Իբրև օրինակ՝ նա մատնանշեց ՀՀԿ խմբակցության` վերին շարքում նստող պատգամավորներից երեքին, որոնք միասին վերցրած շատ ավելի քվե էին վերցրել տեղերում, քան «Ելք» դաշինքն ամբողջությամբ վերցրած:

Պատգամավորը հարց ուղղեց` նման վարկանշային ընտրությունը բնակա՞ն են համարում:

«Ես հասկանում եմ, որ աշխատատեղեր ստեղծելը նույնպես քաղաքականություն է, բայց այդ մարդիկ աշխատատեղեր կարող են ստեղծել առանց պատգամավոր դառնալու: Եկեք ընդունենք, որ այդ մարդիկ պատգամավոր դառնալուց հետո այս ամբիոնից չեն օգտվել ու օրենսդրական նախաձեռնությամբ հանդես չեն եկել, իսկ որ նոր խորհրդարանում կլինեն պատգամավորներ, ովքեր այդ արտադրող ու աշխատատեղեր ստեղծող մարդկանց շահերը կպաշտպանեն, այստեղ կասկած չի կարող լինել, դա միանշանակ է, հետևաբար այդ հիմնական խնդիրը որ կա, որ վերաբերում է ընդհանուր համամասնական ընտրակարգին, պիտի ընդունելի լինի բոլորիս համար միանշանակ, որովհետև համոզված եմ նաև, որ այդ վերևի շարքում նստած մեր գործարար գործընկերները իրենց ժամանակը աշխատատեղեր ստեղծելու, իրենց գործի հետևից գնալու առումով ժամանակն ավելի ճիշտ ու լավ կօգտագործեն, քան այստեղ նստելով ու ժամանակ վատնելով, որովհետև իրենց ժամանակն իսկապես փող է»,- նշեց Սարգսյանը:

Նա անդրադարձավ հարցին` ի՞նչ են շահում նոր օրենսգրքով ընտրություններ անցկացնելով, ապա շեշտեց` այն, որ խորհրդարանում կարող է ներկայացված լինել չորս քաղաքական ուժ, ինչը, պատգամավորի գնահատմամբ, կարևոր հանգամանք է: Սարգսյանի խոսքերով` քաղաքապետի ընտրությունները ցույց տվեցին, որ հետհեղափոխական ընտրություններում քաղաքական ուժերի հնարավորությունները այնքան էլ մեծ չեն, և դա շատ լուրջ խնդիր է խորհրդարանում ներկա գրեթե բոլոր ուժերի համար, և կարևոր է, որ ԱԺ-ն չլինի միատարր, քաղաքական ուժերը ԱԺ-ում ներկայացված լինեն:

Իբրև ևս մեկ գրավիչ հանգամանք նա առանձնացրեց ընտրագրավի պակասը:

«Ի՞նչ է, այդքան հարո՞ւստ են բոլոր կուսակցությունները, որ ուզում են 10 մլն գրավ մուծեն, ինչո՞ւ սրան դեմ գնալ, և, ի վերջո, հարգելի խորհրդարանական ընկերներ, վստահաբար եմ ասում, այս փոփոխությունները, որ կան, այնպես չէ, որ մի օրվա, 24 ժամվա մեջ են ներկայացվում, ու քննարկման չգիտեմ ինչ խնդիրներ կան: Այդ խնդիրները դեռ 99 թվականից, որ ես վարչապետ էի, քննարկվում էին, ու 10 օր էլ քննարկենք, մի ամիս էլ, էլի էս թեմայով լինելու են վիճողներ, հակադարձողներ ու հիմնավորողներ, դրա համար ես, իհարկե, ավելորդ արագությանը դեմ եմ, կողմ եմ, որ 24 ժամվա փոխարեն 72 ժամում քվեարկենք, բայց գտնում եմ, որ հասունացել է պահը, որ դեկտեմբերին պիտի գնանք ընտրության, եկեք գնանք նոր օրենսգրքով»,- ասաց նա:

Խոսելով նոր Ընտրական օրենսգրքի վերաբերյալ Վենետիկի հանձնաժողովի գնահատականի մասին՝ պատգամավորը նշեց.

«Այո՛, հանձնաժողովը տեսակետ ասել է, բայց վստահեցնում եմ, որ նրանք լեգիտիմ են համարելու ժողովրդի կողմից արված, ընդհանուր կոնսենսուսի եկած ցանկացած ընտրության արդյունք, եկեք այս օրենսգրքին կողմ քվեարկենք ու գնանք առաջ»: