Նոր մանրամասներ սահմանամերձ Ոսկեվանում ծնված եռյակից Վաչեի առողջական վիճակի մասին

Shantnews.am-ը կապ է հաստատել  սահմանամերձ գյուղի բնակչուհի Անժելա Մնացականյանի հետ՝ պարզելու համար, թե ինչ վիճակում է Վաչեն, որը հուլիսի 28-ի գիշերն արթնացել է սուր ցնցումներով:

Հիշեցնենք, որ խոսքը սահմանամերձ Ոսկեվան գյուղում ծնված եռյակ երեխաներից մեկի մասին է: 2015 թվականի փետրվարի 5-ին «Էրեբունի» ԲԿ-ում ծնված եռյակին «Շանթ»  ՀԸ-ի  «Հորիզոն» լրատվական- վերլուծական ծրագիրն անդրադարձել է:

Մինչ նրանց տուն կտանեին, նկարահանող խումբն այցելել է նաև սահմանամերձ Ոսկեվան՝ զրուցել փոքրիկների հոր, տատիկի ու պապիկի, եղբոր՝ Արարատի հետ: Մինչև այս տարվա հուլիսի 28-ը փոքրիկն իրեն վատ չի զգացել:

«Հուլիսի 28-ի գիշերը սուր ցնցումով արթնացավ: Տարանք Նոյեմբերյանի մեր հիվանդանոց: Սկզբից էպիլեպսիայի անհայտ տեսակ կասկածվեց»,- ասել է Անժելա Մնացականյանը՝ հավելելով, որ  կասկածով են վերաբերվել այդ ախտորոշմանը, քանի որ թե՜ իր, թե՜ ամուսնու գեներում նման հիվանդություն չի եղել:

Վաչեի մայրիկը պատմել է, որ երբ տեսել են, որ ցնցումները չեն անցնում, տեղափոխել են Երևան՝ նախ՝ «Արաբկիր» ԲԿ, ապա՝ «Սուրբ Աստվածամայր» ԲԿ:

«Սկզբում մինինգիտ է կասկածվել, արյան զեղում: Հետո բժշկական սարքավորումներով ախտորոշվեց, որ ուղեղի աջ կիսագունդը այտուցված է ու ներգանգային ճնշումը շատ բարձր է: Ինքը 10 օր կոմայի մեջ է մնացել, հետո քիչ-քիչ աչքերը բացել է, արդեն չէր խոսում, չի քայլում: Նոր-նոր զրոյից վերականգնվում է, ոնց որ նորածին»,- հավելել է Անժելա Մնացականյանը:

Ըստ Անժելայի՝ Վաչեին նաև Նորագյուղի վերականգնողական կենտրոն են տարել, վերականգնման որոշակի փուլ է անցել, բայց ցնցումները չեն դադարում:

«Ամենամեծ խնդիրը դա է, որ կոնկրետ դիագնոզ չկա ու ցնցումները չեն անցնում: Օր է լինում՝ 7-ից 14 անգամ ցնցվում է: Դեղեր ենք անընդհատ փոխում՝ սկզբում Մոսկվայից էինք բերում, հետո՝ Գերմանիայից, հիմա Գերմանիայից բերածն է խմում, տեսնենք»,- պատմել է Անժելան՝ հավելելով, որ խուրհուրդ են տալիս բուժման համար փոքրիկին եվրոպական որևէ երկիր տանել: Իսկ եվրոպական երկրների մասնագետներին, երբ հարցում են արել, ասել են, որ պետք է երեխային անպայման տանեն, միայն ունեցած բժշկական փաստաթղթերով ոչինչ չեն կարող ասել:

Վաչեին արտասահման բուժման տանելու համար 9000 եվրո գումար է անհրաժեշտ: Փոքրիկին օգնելու և անհրաժեշտ գումարը հավաքելու համար այսպիսի հայտարարություն է տարածվել։

«Մայրիկի՝ Անժելա Մնացականյանի հեռախոսահամարն է +37494312167, Ակբա Ագրիկոլ բանկում Անժելա Մնացականյանի անունով բացվել են հաշվեհամարներ՝

220152369504000 ՀՀ դրամ

220151630096002 Եվրո, France, SWIFT:AGRIFRPP, Germany` SWIFT:COBADEFF

220151630211958 ՌԴ ռուբլի, Moskov, SWIFT:SABRRUMM012

220151633611001 ԱՄՆ դոլար, New York,USA SWIFT:SCBLUS33,Austria SWIFT:RZBAATWW

Ընդհանուր կոդը արտերկրից՝
SWIFT:AGCAAM22», – ասված է հայտարարության մեջ:

Անժելա Մնացականյանը  Shantnews.am-ին ասել է, որ դեռ գումար է փոխանցվել միայն դրամով հաշվեհամարին՝ մոտ 300 հազար դրամ: Մնացած արժույթներով հաշվեհամարներին փոխանցումներ չեն եղել:

Լուսանկարում Վաչեն ձախից առաջինն է։

Հեռախոսազրույցն ամբողջությամբ կարող եք լսել այստեղ․