Ես լավատես եմ, հուսով եմ` երկուշաբթի կունենանք ընդունված Ընտրական նոր օրենսգիրք. Նաիրա Զոհրաբյան

ԱԺ «Ծառուկյան» խմբակցության անդամ Նաիրա Զոհրաբյանը հոկտեմբերի 23-ին լրագրողների հետ զրույցում անդրադարձավ «Ծառուկյան» և «Ելք» դաշինքների ստորագրահավաքին, որով երկուշաբթի արտահերթ նիստի օրակարգով կրկին բերվելու է Ընտրական օրենսգրքի փոփոխությունների նախագիծը: Զոհրաբյանը հույս հայտնեց, որ երկու խմբակցություններից բացի՝ իրենց կմիանան նաև ՀՅԴ իրենց գործընկերները: Պատգամավորը հայտնեց, որ արդեն իսկ ստորագրահավաքին միացել են հանրապետական որոշ գործընկերներ` Մարտուն Գրիգորյանը, Շիրակ Թորոսյանը, հույս հայտնեց, որ առաջիկայում կմիանան այն պատգամավորները, որոնք կողմ են արտահայտվել արտահերթ ընտրություններին:

«Այն Ընտրական օրենսգիրքը, որ երեկ ՀՀԿ-ի սաբոտաժի պատճառով առաջին ընթերցմամբ տապալվեց, պատգամավորական նախաձեռնությամբ ներառում ենք օրակարգ, ստորագրությունները քարտուղարությանը հանձնելու հինգերորդ օրը միայն կարող է նշանակվել արտահերթ նիստ, իսկ դա նշանակում է՝ եթե այսօր հանձնեմ, երկուշաբթի օրը նույն ժամին կհրավիրվի արտահերթ նիստ` նույն օրակարգով: Ուզում եմ հուսալ, հորդորս է հանրապետականներին` չփորձե՛ք վերջին անգամ սեպ խրել այն բարեփոխումների մեջ, որի փորձ է արվելու խորհրդարանում, որ մենք կարողանանք այս բարեփոխված ԸՕ-ով, որի հիմնական մոտիվացիան ռեյտինգային ընտրակարգի հանումն է, գնալ արտահերթ ընտրությունների»,- ասաց նա:

Զոհրաբյանը նշեց, որ ինքը քաղաքականության մեջ միշտ առաջնորդվում է ռացիոնալ տրամաբանությամբ, բայց ցավով նկատեց, թե շատ դեպքերում մեր խորհրդարանն առաջնորդվում է իռացիոնալ տրամաբանությամբ: Պատգամավորը հիշեցրեց` իր հանրապետական գործընկերներից շատերն իրենց ելույթներում նշում էին, որ նոր Ընտրական օրենսգիրքը շատ ավելի արդար, ժողովրդավար ընթացակարգեր է սահմանում, հույս հայտնեց, որ նրանք կսթափվեն, չեն առաջնորդվի մանր քինախնդրությամբ, կհաղթի սթափ տրամաբանությունը, քանի որ այստեղ անգամ մանր կուսակցական շահ էլ չկա, իսկ կուսակցական շահով առաջնորդվելու պարագայում էլ հանրապետականին այս փոփոխությունները շատ հարմար են:

«Այստեղ իրենք առաջնորդվում են ընդամենը վերջին վատություն անելու տրամաբանությամբ, ինչը ես քաղաքականության մեջ ուղղակի անընդունելի եմ համարում, բայց խիստ լավատես եմ և հույս ունեմ, որ երկուշաբթի կունենանք ընդունված Ընտրական նոր օրենսգիրք: Չեմ կարծում, որ այստեղ սեփական կշռի հարց կա, այստեղ սեփական անզորության ցուցադրում եղավ հերթական անգամ, քաղաքական բոյկոտը, քաղաքական որևէ քայլ կարող եմ հասկանալ, եթե դրա տակ կա մոտիվացիա, տրամաբանություն, շարժառիթ, բայց այն, ինչ նրանք արեցին, որևէ քաղաքական տրամաբանության ուղղակի չէր ենթարկվում»,- նշեց Զոհրաբյանը:

Խոսելով իրենց խմբակցության այն անդամների մասին, որոնք երեկ Ընտրական օրենսգրքի նոր նախագծի քվեարկության ժամանակ դահլիճում չէին, պատասխանելով հարցին` արդյո՞ք որևէ անհամաձայնության հետևանք էր այդ բացակայությունը, պատգամավորը տեղեկացրեց` որևէ անհամաձայնություն չի եղել, Նապոլեոն Ազիզյանը վատառողջ էր, տուն է գնացել, Վարդան Ղուկասյանը, ենթադրելով, որ 17:30-ին քվեարկություն չի լինելու, գնացել էր Գյումրի, Գագիկ Ծառուկյանն էլ խորհրդարանում էր, պիտի քվեարկության մտներ մի քիչ ոչ հարմար արտահագուստով:

«Ես եմ հորդորել, որ չմտնի` նշելով, որ մեկ է` ձայները բավարար չեն: Երկուշաբթի կունենանք միայն մեկ բացակա` Հրանտ Մադաթյանը, որը Ղրիմում է, անձնական, մասնավոր այցով»,- ասաց պատգամավորը:

Լրագրողները հետաքրքրվեցին` իրականության հետ աղերս ունե՞ն մամուլում հայտնվող տեղեկությունները, թե Զոհրաբյանը դեսպան է նշանակվելու, ինչին նա պատասխանեց.

«Մամուլն ինքը գրում է, ինձ ուղարկում դեսպան, որոշումները կայացնում է, հետո խնդրում, որ ես մեկնաբանեմ իրենց կայացրած վերդիկտները: Որևէ նման քննարկում չկա, ես սովորություն չունեմ պատերի տակ արված խոսակցությունները մեկնաբանելու»: