Կառավարությունը հաստատեց «Ինժեներական քաղաք»-ի ստեղծման հայեցակարգը և միջոցառումների ժամանակացույցը

ՀՀ կառավարությունը նոյեմբերի 1-ի նիստում հաստատեց «Ինժեներական քաղաք»-ի ստեղծման հայեցակարգը և հայեցակարգից բխող միջոցառումների իրականացման ժամանակացույցը: ՀՀ տրանսպորտի, կապի և տեղեկատվական տեխնոլոգիաների նախարարի պաշտոնակատար Հակոբ Արշակյանը, ներկայացնելով նախագիծը, նշեց, որ «Ինժեներական քաղաք»-ի ստեղծման հայեցակարգի հիմնական նպատակն է Հայաստանում ինժեներական քաղաքի հիմնման միջոցով նպաստել Հայաստանում ինժեներական և բարձր տեխնոլոգիաների (այսուհետ` ԻԲՏ) ոլորտի հետագա զարգացմանը` խթանելով Հայաստանում տնտեսության մրցունակության և արտադրողականության մակարդակի բարձրացումը: Նրա խոսքով` «Ինժեներական քաղաք»-ը նախագծված է այնպես, որ մեկ վայրում տեղակայվեն և կենտրոնացվեն ԻԲՏ ոլորտի ընկերությունները/հաստատությունները:

Արշակյանը հայտնեց, որ «Ինժեներական քաղաք»-ի ստեղծման ծրագրի հիմնական նպատակն է Հայաստանը դարձնել ինժեներական և բարձր տեխնոլոգիական արտադրանքի և ծառայությունների՝ գլոբալ շուկաներ արտահանող երկիր, ինչպես նաև տարածաշրջանային հանգույց՝ ինովացիոն ինժեներական և բարձր տեխնոլոգիական լուծումների համար:

Նիստը վարող ՀՀ փոխվարչապետի պաշտոնակատար Տիգրան Ավինյանը հետաքրքրվեց` ի՞նչ ժամկետում կավարտվեն աշխատանքները: Արշակյանն ասաց, որ ըստ էության, կա իրավիճակ, երբ հողակտորը, որը պետք է տրամադրվի, քաղաքապետարանի հաշվեկշռում է, ավագանու համապատասխան որոշմամբ դրական եզրակացության դեպքում պետք է փոխանցվի կառավարությանը, որ հնարավորություն ստանան հողը տրամադրելու, շինարարական աշխատանքները սկսելու և ենթակառուցվածքների աշխատանքները համակարգելու համար:

Ըստ նախագծի` շինարարական աշխատանքները կսկսվեն հաջորդ տարվա առաջին եռամսյակում՝ համապատասխան ընթացակարգերն անցնելուց հետո, 2020 թվականի դեկտեմբերի երրորդ տասնօրյակում նախատեսվում է ավարտել այս նախագիծը: Արշակյանն ընդգծեց` սա մասնավոր-պետություն համագործակցության լավ օրինակ է: Նա տեղեկացրեց, որ «Ինժեներական քաղաք»-ը գտնվում է Բագրևանդ փողոցի վրա, ցանկապատված տարածք է` 3 հեկտարի չափով, որոշ շենքեր արդեն կառուցված են:

Տիգրան Ավինյանը նշեց, որ այս նախագիծը ՏՏ ոլորտի հանդեպ Կառավարության վերաբերմունքի արտացոլումն է: Նա կարևորեց այս նախագծի իրականացումը:

ՀՀ արտաքին գործերի նախարարի պաշտոնակատար Զոհրաբ Մնացականյանը նշեց, որ արտաքին քաղաքականության ոլորտում սա ևս էական, կարևոր ուղղություն և գերակայություն է: