Դարի ամենասպասված իրադարձություններից մեկը. ավարտվել է արքայազն Հարրիի և Մեգան Մարքլի պսակադրությունը

Այսօր Միացյալ Թագավորությունում տեղի է ունեցել դարի, թերևս, ամենասպասված իրադարձություններից մեկը՝ արքայազն Հարրիի և ԱՄՆ դերասանուհի Մեգան Մարքլի հարսանեկան արարողությունը: Բրիտանական թագավորական ընտանիքը 21-րդ դարում արդեն երկրորդ անգամ է աշխարհի ուշադրությունը սևեռել իր վրա: Արքայական զույգի հարսանեկան արարողությունը դիտելու համար Վինձորում ավելի քան 100 հազ մարդ է հավաքվել: Շատերը գիշերն անցկացրել են բաց երկնքի տակ, որպեսզի հարմար տեղեր գտնեն արարողությունը դիտելու համար:

Պսակադրությունը տեղի է ունեցել Վինձոր ամրոցի սուրբ Գեորգի ժամատանը: Վինձորի ամրոց է հրավիրվել ավելի քան 2500 հոգի, իսկ պսակադրության բուն արարողությանը ներկա է գտնվել 600 հոգի, այդ թվում՝ բրիտանական արքայական տոհմի անդամներ, պաշտոնյաներ, համաշխարհային աստղեր, ընկերներ: Հարսանեկան արարողությունն առցանց դիտել են միլիոնավոր մարիկ աշխարհի տարբեր ծայրերից:

Հարսանիքին հրավիրված հյուրերը սկսել են սուրբ Գեորգի ժամատուն գալ պսակադրությունից ժամեր առաջ: Անվանի հյուրերի շարքում են եղել հոլիվուդյան աստղ Ջորջ Քլունին կնոջ՝ Ամալ Քլունիի հետ, Դեյվիդ և Վիկտորյա Բեքհեմները, Reddit սոցիալական հարթակի համահիմնադիր Ալեքսիս Օհանյանը կնոջ՝ հայտնի թենիսիստուհի Սերենա Ուիլյամսի հետ, ռեժիսոր Գայ Ռիչչին կնոջ հետ, ինչպես նաև հայտնի հաղորդվարուհի Օփրա Վինֆրին, երգիչ սըր Էլթոն Ջոնը:

Հարսանեկան հյուրերի թվում են եղել նաև Մեգան Մարքլի գործընկերները «Ֆորս մաժոր» հեռուստասերիալից: Արքայազն Հարրին հարսանիքին է հրավիրել նաև իր նախկին ընկերուհիներին: Չնայած Մեծ Բրիտանիայի վարչապետ Թերեզա Մեյն արարողությանը հրավիրված չի եղել, սակայն, նա շտապել է թվիթերյան իր էջում շնորհավորել արքայական զույգին ՝ հարսանիքն անվանելով ազգային տոնակատարություն:  

Մինչ Մեգան Մարքլը մոր ուղեկցությամբ ուղևորվում էր ժամատուն, նրան այնտեղ արդեն սպասում էր արքայազն Հարրին, ով եկել էր եղբոր՝ արքայազն Վիլյամի ուղեկցությամբ: Երկու եղբայրներն էլ զինվորական համազգեստ էին կրում:

Մեգանին դեպի խորան է ուղեկցել արքայազն Հարրիի հայրը՝ Ուելսի արքայազն Չարլզը: Մեգանի հայրը առողջական խնդիրների պատճառով չի կարողացել գալ Մեծ Բրիտանիա:

Փոխադարձ խոստումներից և մատանիների փոխանակումից հետո արքայազն Հարրին և Մեգան Մարքլն արդեն պաշտոնապես ամուսնացած են: Եղիսաբեթ 2-րդ թագուհու հրահանգով արքայական զույգն այսուհետ կկրի Սասեքսի դքսի և դքսուհու տիտղոսը:  

Պսակադրությունից հետո ամուսիններն արքայական կառքով անցել են ժամեր շարունակ այս պահին սպասող հազարավոր մարդկանց միջով:

Պսակադրության արարողությանը ներկա 600 հյուրերն այնուհետև մասնակցել են Վինձորի ամրոցի Գեորգիևյան սրահում կազմակերպված հանդիսավոր ճաշկերույթին: Իսկ երեկոյան նորապսակները 200 ամենամտերիմ ընկերների հետ ընդունելություն են կազմակերպել թագավորական ընտանիքին պատկանող Ֆրոգմոր Հաուս առանձնատանը:

Հարսանեկան ծախսերը թագավորական ընտանիքը հոգացել է սեփական բյուջեից: Պետական գանձարանից վճարվել է միայն ընտանիքի անդամների ու հյուրերի անվտանգության ապահովման համար անհրաժեշտ գումարը: Բրիտանական ԶԼՄ-ների գնահատականներով՝ հարսանիքը արժեցել է շուրջ 43 մլն ԱՄՆ դոլար, որոնցից 40 միլիոնն ուղղվել է անվտանգության ապահովմանը:

Հարրին և Մեգանն իրենց հարսանիքի միջոցով մի քանի կարծրատիպեր են կոտրել: Նշենք, որ Մեգանը թագավորական ընտանիքում առաջին դերասանուհին է, առաջին ամերիկուհին, որը նաև աֆրոամերիկյան արմատներ ունի: Նա 3 տարով մեծ է իր ընտրյալից և նախկինում արդեն ամուսնացած եղել է: Բացի դերասանական կարիերայից, Մեգանը նաև այլ գործունեություն է ծավալում: Նա ավարտել է Նորթվեսթերնի համալսարանի միջազգային հարաբերությունների ֆակուլտետը: Մեգանը «Վորլդ Վիժն Կանադա» և ՄԱԿ-կանայք բարեգործական կազմակերպությունների դեսպանն է, ակտիվ գործունեություն է ծավալում սեռերի հավասարության, կանանց և երկռասա մարդկանց իրավունքների պաշտպանության ոլորտում:

Արքայական ընտանիքի անդամ դառնալով՝ Մեգանը հրաժեշտ կտա իր դերասանական կարիերային, սակայն, ամենայն հավանականությամբ, կշարունակի հասարակական գործունեություն ծավալել: