Մենք ունենք բաց, մասնավորապես ՌԴ փոխադրողների հետ. Արմեն Փամբուխչյան

Այսօր Երևանի հյուսիսային ավտոկայարանում միջպետական կանոնավոր փոխադրումներ կազմակերպելու համար հերթական մրցույթն է կազմակերպվել: Ուղղություններն են դեպի Ռուսաստանի Դաշնություն, Վրաստան, Արցախի Հանրապետություն, Իրանի Իսլամական Հանրապետություն։ Մրցույթին մասնակցության հայտ է ներկայացրել 7 կազմակերպություն 10 երթուղիների համար։

SHANTNEWS.am-ն արդեն հայտնել է, որ ՀՀ կապի և տրանսպորտի փոխնախարարի պաշտոնակատար Արմեն Փամբուխչյանի հավաստմամբ՝ այս մրցույթի  պահանջների մեջ խստացումներ չկան, պարզապես վերահսկողությունն է ավելացել:

Հիշեցնենք, որ ըստ վիճակագրության՝ 2015-2018թթ. Հայաստանից Ռուսաստան մեկնող կամ վերադարձող ավտոբուսների, միկրոավտոբուսների վթարների մոտ 10 դեպք է գրանցվել, ինչի հետևանքով եղել է 18 զոհ, մի քանի տասնյակ վիրավոր:

Վթարի ենթարկված բոլոր տրանսպորտային միջոցները կատարել են ոչ կանոնավոր ուղևորափոխադրումներ:

Դեռ ամիսներ առաջ կազմակերպված մրցույթի ժամանակ ՀՀ կապի և տրանսպորտի փոխնախարարի պաշտոնակատար Արմեն Փամբուխչյանն ասել էր, որ կոնկրետ աշխատանքներ են տարվում ոչ կանոնավորներին կանոնավոր դաշտ բերելու համար.

«Մենք մշակում ենք փոխադրողների հետ ավտոկայանների սերտ համագործակցության քաղաքականություն և գալու ենք այն կետին, որ ոչ ոք չկարողանա փոխադրում կատարել, քանի դեռ չի համագործակցում ավտոկայանի հետ: Մրցույթից հետո արդեն կլինի պարտադիր պայման ավտոկայանների հետ պայմանագիր ունենալու վերաբերյալ, որպեսզի բոլոր փոխադրումներն իրականացվեն ավտոկայանի միջոցով, որպեսզի  բացառենք, որ ամեն մեկն իր բակից փոխադրում կատարի: Եթե չեղավ թույլտվություն, իրենք չեն կարող հատել սահմանը»։

SHANTNEWS.am-ը հետաքրքրվել է փոխնախարարից, թե ինչ է արվել անցած երեք ամիսների ընթացքում: Ավտոկայանների մասով, ըստ փոխնախարարի, աշխատանքները շարունակվում են, խնդիրն այլ տեղ է։

«Մենք ունենք բաց, մասնավորապես ՌԴ փոխադրողների հետ, որ իրենց հետաքրքիր չեն մեր ուղղությունները: Մեր փոխադրողները, փաստացի շահած լինելով մրցույթը, դառնում են ոչ կանոնավոր: Նոյեմբերի 21-23-ը Մոսկվայում՝ տրանսպորտային շաբաթվա շրջանակներում, պետք է քննարկենք ՌԴ տրանսպորտի նախարարության հետ, որ մեր փոխադրողները, որոնք չեն կարողանում գտնել պարիտետներ, նրանց թույլտվություններ տան, որ կարողանան միակողմանի փոխադրումներ կատարել: Հենց տանք այդ հնարավորությունը, միաժամանակ պետք է խստացվեն ոչ կանոնավոր ուղևորափոխադրողներին ներկայացված պահանջները:

Այս պահին խստացումներ տեղի չեն ունենում, քանի որ շատ քիչ մարդիկ ունեն պարիտետներ մի քանի ուղղություններով ու դա կարող է հանգեցնել նրան, որ ուղևորներ չկարողանանք տեղափոխել ՌԴ»,- ասել է Փամբուխչյանը՝ հավելելով, որ հավանականությունը մեծ է, որ խնդիրը լուծում կստանա:

Ինչ վերաբերում է մրցույթի արդյունքներին, ապա դրանք, ըստ կարգի, պարզ կդառնան մի քանի օրից:

«Այսօր ստուգում են ընդհանուր տեխնիկական բնութագիրը, որից հետո տրանսպորտի վարչությունը պետք է տա իր գնահատականները, թե որ ընկերություններն են հաղթում: Պատասխանը հայտնի է լինում 10-15 օրվա ընթացքում»,- հայտնել են ՀՀ տրանսպորտի, կապի և ՏՏ նախարարությունից: