Ինչպե՞ս պայքարել «Մաշան և արջը» մուլտսերիալի կրեմլյան քարոզչության դեմ. ՌԴ դեսպանատունը բրիտանացիներին խորհուրդներ է տվել

Բրիտանական Times պարբերականը ռուսական հայտնի «Մաշան և արջը» մուլտֆիլմը կրեմլյան քարոզչություն է անվանել:

«Մանկական շոուն քարոզչություն է Պուտինի համար, ասում են քննադատները». ահա այսպես է վերնագրված Times-ի հոդվածը, որում ներկայացվում են մի քանի քննադատների կարծիքները մուլտֆիլմի մասին:

Հոդվածում նշվում է, որ չնայած երեխաները մեծ հաճույքով են դիտում քմահաճ փոքրիկ աղջկան և նրա բարի պաշտպան արջին, Ռուսաստանի հարևան երկրներում ապրող քննադատները մուլտսերիալը համարում են Ռուսաստանի քարոզչական մեքենայի մի մաս: Ըստ քննադատների՝ մուլտհերոսուհի Մաշան իրեն շատ վճռորոշ է պահում, ճիշտ ինչպես ՌԴ նախագահ Պուտինը:

«Մաշան համառ, տհաճ բնավորություն ունի, բայց, միևնույն ժամանակ, վճռորոշ է: Նա շատ բան է իր վրա վերցնում: Չափազանցություն չի լինի ասել, որ նա իրեն Պուտինի պես է պահում»,- հոդվածում մեջբերվում են Բուքինգեմյան համալսարանի պրոֆեսոր Էնթոնի Գլիսի խոսքերը:

Տալլինի համալսարանի դասախոս Պրիիդ Հիբեմյագին էլ համարում է, որ արջի կերպարի միջոցով մուլտսերիալը ստեղծողները փորձել են երեխաների մոտ փոխել Ռուսաստանի ընկալումը բացասականից դրականի:

Իսկ լիտվացի քննադատներն ուշադրություն են դարձրել ԽՍՀՄ սահմանապահի գլխարկին, որը Մաշան կրում էր սերիաներից մեկում, որտեղ նապաստակին քշում էր արջի բանջարանոցից: Նրանց կարծիքով՝ այս սերիայի միջոցով Ռուսաստանը ցույց է տալիս, որ պաշտպանում է իր սահմանները:

«Анимаккорд» ընկերությունը, որը ստեղծել է «Մաշան և արջը» մուլտսերիալը, հայտարարել է, որ դա անկախ նախագիծ է և պետական ֆինանսավորում չի ստանում:

Իսկ Լոնդոնում ՌԴ դեսպանատունը Times-ի հրապարակմանը պատասխանել է հեգնանքով և բրիտանացիներին խորհուրդներ է տվել՝ ինչպես փրկվել «Մաշան և արջը» մուլտսերիալից:

«The Times-ի կողմից շատ կարևոր հարց է բարձրացվել. ինչպե՞ս փրկություն գտնել «Մաշան և արջը» մուլտֆիլմից: Ստեղծե՛ք հակամուլտիպլիկացիոն կենտրոն Բալթյան երկրներից որևէ մեկում: Մուլտֆիլմը ստեղծողներին ընդգրկե՛ք ԵՄ պատժամիջոցների ցուցակում: Միանշանակ, շատ որոշիչ և ծախսատար մոտեցում է հարկավոր»,- նշված է դեսպանատան թվիթերյան էջում:

An important issue raised by @thetimes today: How UK can find salvation from “Masha and the Bear”? Launch an Ant-Cartoon Excellence Centre somewhere in the Baltic? Place all cartoonists on EU sanction list? Clearly a decisive – and a very expensive – approach is needed! pic.twitter.com/a05fKE24Be

— Russian Embassy, UK (@RussianEmbassy) November 17, 2018

Ներկայումս մուլտսերիալի YouTube-յան անգլալեզու ալիքի բաժանորդների թիվը գերազանցում է 4.2 մլն-ը, իսկ տարբեր լեզուներով հեռարձակվող 13 ալիքներով անիմացիոն սերիալն արդեն ավելի քան 40 մլրդ դիտում է հավաքել: