«Գոլդեն Փելիս» հյուրանոցը հավանաբար կհանեն աճուրդի ու ստացված գումարը կուղղեն բյուջե. Փաշինյան

«Այսօրվա դրությամբ տարբեր քրեական գործերով մոտավորապես 64 մլրդ դրամի վերաբերյալ չարաշահումների ու յուրացումների մասին քրեական գործեր են հարուցված: Բայց նաև այդ ընթացքում հնչում են շեշտադրումներ, թե ինչու, այսպես կոչված, թալանված գումարների վերադարձը այն արագությամբ տեղի չի ունենում, ինչպես մենք բոլորս կուզեինք»,- այս մասին Իջևանում քարոզարշավի ժամանակ ասել է «Իմ քայլը» դաշինքի ընտրական ցուցակը գլխավորող Նիկոլ Փաշինյանը:

Փաշինյանն ասել է, որ այս ընթացքում շատ կարևոր է  պահպանել օրինականությունը, քանի որ այդ գումարները ֆիզիկապես կվերադարձվեն այսօրվա օրենքների համաձայն այն ժամանակ, երբ նախաքննությունն ավարտվի, դատավճիռ լինի ու հանձնվի Դատական ակտերի հարկադիր կատարման ծառայությանն ի կատար ածելու: Նիկոլ Փաշինյանի խոսքերով՝ հարուցված գործերի պատճառով քննիչների աշխատանքը շատացել է, ու վերջիններս շատ ծանրաբեռնված են աշխատում:

«Համաձայն եմ, որ երբեմն այս սովորական գործընթացները կարող են երկար տևել, և ահա այս խնդրի համար է, որ մեր նախընտրական ծրագրում հիշատակված է «անցումային արդարադատությունը»՝ որպես մեր երկիր հետ կապված խնդիրների լուծման գործիք: «Անցումային արդարադատություն» ասելիս մենք պետք է  հասկանանք, որ շատ դեպքերում այսպիսի գործերը պիտի այլ ընթացք ստանան ու լուծում ստանան, իսկ թե ի՞նչ լուծում, դա արդեն առանձին քննարկման հարց է»,- ասել է Փաշինյանը:

Նիկոլ Փաշինյանը որպես օրինակ նշել է, որ Ռոբերտ Քոչարյանն իր հարցազրույցներից մեկում հայտարարություն է արել Մաքսային կոմիտեի նախկին նախագահ Արմեն Ավետիսյանի վերաբերյալ: Այս հայտարարությունից հետո ԱԱԾ-ն հրապարակել է մի տեսանյութ, որում Երևանի «Գոլդեն Փելիս» հյուրանոցի բացման արարողությունն է եղել:

«Հյուրանոցը ներկայացվում էր որպես օտարերկրյա ներդրում, որ իբր Կիպրոսից են եկել, այստեղ ներդրում արել: Իրականում Հայաստանում աշխատած կոռուպցիոն փողերը տարել են, Կիպրոսով պտտեցրել, բերել Հայաստանում հյուրանոց էին կառուցել: Ու Ռոբերտ Քոչարյանը հայտարարում էր, թե Հայաստանն այնքան է զարգացել, որ Կիպրոսից եկել, էստեղ ներդրում են անում»,- պատմել է Փաշինյանը և հավելել, որ օրեր առաջ իրեն տեղեկացրել են, որ Արմեն Ավետիսյանի ընտանիքը դիմել է Պետգույքի կառավարման վարչությանը և ասել, որ նա Ծաղկաձորի «Գոլդեն Փելիս» հյուրանոցը նվիրում է  պետությանը:

«Կա հարուցված քրեական գործ, բայց, ըստ ամենայնի, նրանք հանրային որոշակի վերաբերմունք ակնկալելով կամ անցումային արդարադատության գործիքից օգտվելու հնարավորություն ունենալու համար, թերևս, նրանք այդպիսի քայլի են դիմել: Եթե այս գործընթացը մինչև վերջ գնա, ապա մենք պետք է այդ հյուրանոցը հրապարակային հանենք աճուրդի և այդ գումարները պետք է մուտքագրենք պետական բյուջե»,- ասել է Նիկոլ Փաշինյանը:

Փաշինյանը մեկ այլ օրինակ էլ է բերել, նա հայտնել է, որ ՀՀ երրորդ նախագահ Սերժ Սարգսյանի եղբայրը` Ալեքսանդր Սարգսյանը, պատրաստակամություն է հայտնել իր բանկային հաշիվներից մեկի վրա առկա 30 միլիոն դոլար գումարն ամբողջությամբ պետբյուջե վերադարձնել:

«Սերժ Սարգսյանի եղբոր՝ Ալեքսանդր Սարգսյանի՝ մի բանկում  ունեցած հաշիվների վրա 30 միլիոն դոլար ունենալու մասին բազմիցս է խոսվել։ Իմ նախորդ ելույթից հետո Սերժ Սարգսյանի եղբայրը հայտարարություն էր արել, թե ինքը պատրաստ է այդ գումարների մի մասն առնվազն ինչ-որ նպատակների համար տրամադրել։ Ինձ ասում են, որ նա վերջերս պատրաստակամություն է հայտնել այդ ողջ 30 միլիոն դոլարը վերադարձել պետական բյուջե»,- հայտարարել է Նիկոլ Փաշինյանը։

Նա շեշտել է, որ վերադարձված այդ գումարներն առաջին հերթին պետք է ծախսվեն ՀՀ ԶՈւ վրա:

Փաշինյանը հայտնել է, որ նաև գեներալ Մանվել Գրիգորյանի փաստաբաններն են հանդես եկել հայտարարությամբ, որ նա պատրաստ է 5 մլրդ դրամի գույք նվիրել պետությանը:

«Իհարկե, կառավարությունը դեռ դրան որևէ կերպ չի արձագանքել, որովհետև շատ կարևոր է, որ այս հարցերի վերաբերյալ մենք` որպես հանրություն, ձևավորենք վերաբերմունք»,- ասել է նա: