Բալետմայստեր Ռուդոլֆ Խառատյանը մտադիր է Գյումրիում պարարվեստի միջազգային կենտրոն հիմնել

ՀՀ ժողովրդական արտիստ, բալետմայստեր Ռուդոլֆ Խառատյանը վարպետության դաս է անցկացրել է Գյումրիի պարարվեստի դպրոցում: Հայտնի արտիստի համար Գյումրիում գտնվելը միայն պարարվեստի հմտություններին ծանոթացնելու, գաղտնիքները բացելու առաքելություն չէ: Բալետմայստերն այս քաղաքի հետ հեռանկարային ծրագրեր է կապում: Նա Սևյանի անվան մշակույթի նախկին պալատը «Խառատյան փորձարարական արվեստի միջազգային կենտրոնի» վերածելու ցանկություն ունի: Սա ժողովրդական արտիստ, բալետմայստեր Ռուդոլֆ Խառատյանի ու գյումրեցի պատանիների առաջին հանդիպումը չէր: Վարպետության դասեր էլի են եղել: Խառատյանը չի թաքցնում՝ գյումրեցի պատանիների հետ աշխատանքն իրեն հաճույք  է պատճառում: Արագ են ընկալում ու սովորում բոլոր շարժումները, ասում է բալետմայստերը:

Գյումրիում մնալու և պարարվեստը զարգացնելու համար պարարվեստի դպրոցի տնօրենն էլ, պարի մեծ վարպետ Ռուդոլֆ Խառատյանն էլ միակարծիք են, որ լավագույն պարուսույցներին քաղաքում պահելու համար պետք է հնարավորություններ ստեղծել, բալետը զարգացնելու համար լավ մասնագետների պակասը միայն մեզ մոտ չէ: Որպեսզի չուշանա ոչ միայն բալետի, այլև պարարվեստի բոլոր ճյուղերի զարգացումը, բալետմայստերն իր ծրագիրն է առաջարկել: Խոսքը Գյումրիի՝ Սևյանի նախկին ակումբում «Խառատյան փորձարարական արվեստի միջազգային կենտրոն» հիմնելու մասին է:

Բալետմայստերն իր նախաձեռնության ու նախագծերի մասին դեռ չորս ամիս առաջ է խոսել, իրականացման ուղղություններն էլ է նախանշել. այդ նպատակին կուղղվի «Բալետ 2021» հիմնադրամի աջակցությունը: Ծրագիրը քաղաքապետարանում է, այն դեռ պետք է քննարկվի։ Քննարկման փուլերից մեկն էլ ծրագրի շուրջ հանրային քննարկում անցկացնելն է: Պարզվում է՝ Խառատյանի   նախագիծը միակը չէ, որ կապվում է Սևյանի պալատի վերականգման հետ: Այս մասին SHANTNEWS.am-ի մեր թղթակցին հայտնել են Գյումրիի քաղաքապետարանից։ Եվս երկու ծրագիր կա շենքում մշակութային կենտրոն հիմնելու վերաբերյալ: Իսկ թե մյուս  երկու ծրագրերի հեղինակներն ովքեր են և ինչ միջոցներ են ներդրվելու վերակառուցման նպատակի համար, քաղաքապետարանը  չի ցանկացել  մանրամասնել մինչև հանրային քննարկման չդրվի: Իսկ «Բալետ 2021» հիմնադրամի տնօրենը, մինչ հանրային լսումները, որոշակի տեղեկություններ հայտնեց ֆինանսներ ներգրավելու հնարավոր տարբերակների մասին:

Շենքի վերակառուցման նախագծի հեղինակը կանադահայ ճարտարապետ Ազատ Շիշմանյանն է: Նա եղել է Գյումրիում,  ուսումնասիրել շենքը: Թեև այն պատմական հուշարձանների ցանկում չէ, բայց  եզակի մշակութային արժեք ունի իր մեջ, դա Ֆերդինանդ Մանուկյանի «Սասունցիների պարը» որմնախճանկարն է:

Սևյանի պալատի վերակառուցման ներկայիս երեք ծրագրերն առաջիններից ու միակը չեն: 30 տարում շատ նախագծեր են կազմվել, հայտնի ու անհայտ ներդրողների անուններ են շոշափվել: Իսկ թե ինչո՞ւ ոչ մեկը նպատակին չծառայեց, երբևէ  պարզաբանումներ չեն տրվել: Եղած ու ձախողված բոլոր ծրագրերում շեշտադրվել է խճանկարի վերականգնման անհրաժեշտությունը։