Բարեկամությունը միայն իներցիայի հիման վրա չի կարող զարգանալ. Ռոբերտ Քոչարյանը «Լազարևյան ակումբի» նիստում

ՀՀ երկրորդ նախագահ Ռոբերտ Քոչարյանը նոյեմբերի 30-ին ներկա է գտնվել «Լազարևյան ակումբի» առաջին նիստին, որի թեման էր «Հայաստան և Ռուսաստան՝ երկու հայրենիքներ: Պաշտպանություն և անվտանգություն»:

Ռոբերտ Քոչարյանը հույս է հայտնել, որ երկխոսությունների այս հարթակը ոչ միայն բարեկամների հանդիպման վայր կլինի, այլ նոր մտքերի, գաղափարների գեներացման ու հայ-ռուսական հարաբերությունների խորացմանն ուղղված նոր, արդյունավետ նախագծերի ստեղծման հարթակ:

«Հայ-ռուսական հարաբերություններն այսօր հատուկ հոգածության կարիք ունեն: Այս անհանգիստ շրջանում Հայաստանի և հայության համար ավանդական աշխարհաքաղաքական առաջնահերթությունների վերանայման ուղղակի կամ անուղղակի կոչերը, անգամ կյանքի չկոչվելով, նկատելի վտանգ են ներկայացնում:

Տեղեկատվական տեխնոլոգիաներն ու սոցիալական կայքերն այսօր հանրային տրամադրությունների մանիպուլացման, ուղղորդման մեծ հնարավորություններ են տալիս: Դրանք մեր երկրների հասարակությունների միջև միմյանց հանդեպ անվստահություն և կասկածներ են սերմանում, որը մեր բազմադարյա կապերի էրոզիայի կհանգեցնի:

Ցանկացած բարեկամություն առնվազն ջանքեր է պահանջում և առնվազն կարիք ունի մեր էներգիայի, ժամանակի ու էմոցիաների: Բարեկամությունը նաև իներցիա ունի, բայց միայն դրա հիման վրա չի կարող զարգանալ և լինել դիմացկուն: Հիշեք, թե մեր կյանքում քանի ընկեր ենք կորցրել զուտ այն պատճառով, որ ջանք չենք գործադրել նրանց պահելու համար»,- ասաց նա:

Քոչարյանի խոսքերով` ընկերությունը դադարում է այն ժամանակ, երբ կասկածներ են առաջանում ընկերների մտադրությունների անկեղծության հարցում, և երբ կողմերից մեկը միշտ ձգտում է ստանալ ավելին, քան պատրաստ է տալ: Նման հարաբերություններն անպայմանորեն «վերափոխվում են վասալայինի կամ կործանվողի», դա գործում է նաև միջպետական հարաբերություններում:

Երկրորդ նախագահը նշեց, որ հենց այստեղ, միջպետական հարաբերություններում պետք է լինել հասկանալի, կանխատեսելի, վստահելի և միմյանց անհրաժեշտ գործընկերներ: Նա ընդգծեց` պետությունների միջև բարեկամական հարաբերություները միայն երկու երկրների հետաքրքրությունների համընկում չեն, այլ պետական հետաքրքրությունների ու մարդկային գործոնի խոր գիտակցության համադրություն:

«Ես չեմ կարող գտնել նման գործոնների այդքան ուժեղ համադրությամբ այլ երկրների օրինակ, ինչպես Հայաստանի ու Ռուսաստանի դեպքում: Աշխարհի քարտեզի վրա գրեթե չկան նման օրինակներ, այդ հարաբերությունները մենք ժառանգել ենք և ամենօրյա ջանքեր պետք է գործադրենք դրանց պահպանման և զարգացման համար, կցանկանայի, որ այս ակումբը դառնա դրա գործիքներից մեկը»,- ասաց Քոչարյանը` հավելելով, որ ավելի մեծ ծավալով պատրաստ է մասնակցել հետագա հանդիպումներին, քննարկումներին, լինել բանախոս:

Նա իր նոր լույս տեսած գրքի օրինակներից մեկը մակագրությամբ նվիրեց ակումբի հիմնադիր Կոնստանտին Զատուլինին` ի նշան շնորհակալության` այն ամենի համար, որ նա անում է հայ-ռուսական հարաբերությունների ամրապնդման համար: