Կուսակցությունների ներկայացուցիչները քննարկել են, թե ինչպես են դատական համակարգից վերացնելու կոռուպցիան

Կոռուպցիայի և դրա դեմ պայքարին նվիրված քննարկման ժամանակ մասնակից քաղաքական ուժերի ներկայացուցիչները քննարկել են՝ ինչպես է պետք հաղթահարել դատական կոռուպցիան։

«ԲԴԽ-ում դատավորները պետք է ընտրվեն ժողովրդի կողմից, սա կբարձրացնի դատական իշխանության նկատմամբ վստահությունը: Այսօր դատական գործերը հատուկ ծրագրով են բաշխվում դատավորների կողմից, բայց գիտենք, որ այդ մեխանիզմը ևս շրջանցելու հնարավորություն կա, դրան պետք է անդրադարձ լինի»,- ասել է ՔՈ սոցիալ-դեմոկրատական կուսակցության ներկայացուցիչ Միքայել Նահապետյանը:

ՀՅԴ ներկայացուցիչ Գեղամ Մանուկյանն այսպիսի կարծիք է հայտնել.

«Այլևս չկա Սերժ Սարգսյանը, և դատավորները Սերժ Սարգսյան տեր չունեն: Այստեղ կա երկրորդ մասը՝ դատավորների անկաշառության հարցը, որը պետք է լուծվի նոր սիստեմով: Դատավորներին գնահատման մեխանիզմ պետք է ստեղծվի, ինչպես են գնահատում ուսուցչի, թե քանիսն են նրա աշակերտների ընդունվել ԲՈՒՀ, այնպես էլ դատավորները պետք է գնահատվեն»:

«Մեր ծրագրերը նախատեսում են դատական համակարգն ազատել օրենսդիր և գործադիր մարմինների իշխանությունից, բայց շատ կարևոր է, որ դատական համակարգն էլ իշխանություն չդառնա»,- ասել է «Իմ քայլի» ներկայացուցիչ Հերիքնազ Տիգրանյանը:

«Լուսավոր Հայաստան» կուսակցության ներկայացուցիչ Ատոմ Մխիթարյանն այսպիսի տեսակետ է հայտնել.

«Շատ կարևոր է հասկանալ, որ դատարանները կոռուպցիայի դեմ պայքարում կարևոր նշանակություն ունեն: Պետք է ապահովել մեխանիզմներ՝ օրենսդրական և հասարակության վերահսկողությամբ, որ դատարանները լինեն անկախ, ոչ թե հնարավորինս անկախ, այլ անկախ: Արդարադատությունը լինի անխուսափելի, որպեսզի չլինի՝ անես մի բան ու մտածես, որ քո հետևից չեն գալու»:

«Ազգային առաջընթաց» կուսակցության ներկայացուցիչ Հայկ Գրիգորյանի կարծիքով՝ ժամանակն է, որ կոնկրետ օրենսդրական փոփոխություններ արվեն:

«Առաջարկում ենք, որ դատավորներին նշանակի ԱԺ-ն: ԱԺ-ն կոլեգիալ մարմին է, չի ընկալվի դատավորի կողմից ղեկավար: Նշանակումը պետք է լինի մի քանի օրվա պրոցես, դատավորը պետք է որոշակի քննություն տա: Նա հայտնի կդառնա հանրությանը, և կձևավորվի նրա հանրային կերպարը: Նա կպատասխանի քաղհասարակության, լրագրողների հարցերին՝ ԱԺ գալով: Ատեստավորման գործընթացը պետք է ավելի խիստ լինի, նա չմտածի, որ նշանակվել է ցմահ: Ինչ մնում է գործերի բաշխմանը, ապա պետք է այդ համակարգը ևս հստակեցնել»,- ասել է Գրիգորյանը:

«Ցավոք, մեր երկրում դատական համակարգն ամենակոռումպացված ինստիտուտն է եղել: Եթե մենք անցյալի էջը համոզիչ կերպով չենք փակում, ապագայի խնդիրները չենք կարող լուծել: Դատավորների խնդիրն անցումային դատավարությունում պետք է իր լուծումն ունենա: Դատավորները, դատական համակարգը պետք է մեկ տեղից նշանակված չլինեն, անգամ եթե ԱԺ-ից նշանակված լինեն և հաշվետու լինեն ԱԺ-ին, էլի կարող են խնդիրներ առաջանալ»,- եզրափակել է «Սասնա ծռեր» կուսակցության ներկայացուցիչ Ալեք Ենիգոմշյանը: