Ակտիվությունը նորմալ էր. Տիգրան Մուկուչյանը SHANTNEWS.am-ի հետ զրույցում ամփոփել է քվեարկության ընթացքը

Քվեարկության ավարտից հետո ՀՀ կենտրոնական ընտրական հանձնաժողովի նախագահ Տիգրան Մուկուչյանը SHANTNEWS.am-ի հետ զրույցում ներկայացրեց հետագա գործընթացները:

«Այս պահին, ըստ էության, քվեարկությունն ավարտվեց, Տեղամասային ընտրական հանձնաժողովները կսկսեն ամփոփել արդյունքները, ամփոփելուն պես կկազմեն արձանագրություններ, կներկայացնեն Տարածքային ընտրական հանձնաժողովներ, որտեղից էլեկտրոնային կապով կստանանք մուտք արված տվյալները, երբ դրանք ամբողջականան, նիստ կհրավիրենք և կամփոփենք նախնական արդյունքները»,- ասաց նա:

Ընտրողների մասնակցությանն անդրադառնալով` Մուկուչյանը նշեց, որ ակտիվությունը նորմալ էր, հատկապես օրվա երկրորդ կեսին ակտիվ մասնակցում էին, թեպետ առավոտյան առաջին ժամերին պասիվություն էր նկատվում:

ԿԸՀ նախագահի գնահատմամբ` տեղամասերում տեղադրված տեսախցիկների արդյունավետությունը բավական մեծ էր, քանի որ հետևում էինք տեղամասերին, անհրաժեշտության դեպքում ուղղակի կապ էին հաստատում հանձնաժողովի նախագահի հետ: Տիգրան Մուկուչյանը նշեց, որ 4-5 տասնյակ դեպքերում հանձնաժողովի նախագահների հետ ինքն է զրուցել: Նրա խոսքով` դա մի լրացուցիչ գործիք է, որի միջոցով հնարավոր է լինում ոչ միայն տեսակապ ունենալ, այլև կապվել հանձնաժողովի նախագահի հետ և նրա ուշադրությունը հրավիրել խնդիրների վրա:

Ընտրախախտումների վիճակագրությունն, ըստ Մուկուչյանի, հավաքվել է, օրվա ընթացքում փորձել են պատասխանել: Նա ասաց, որ ծավալային առումով դրանք քիչ են եղել, վերաբերել են առանձին, լոկալ դեպքերի, մի մասի վերաբերյալ ԿԸՀ-ն տվել է պարզաբանումներ, բոլոր խախտումները լիարժեք ծավալով «գույքագրված են» և մինչև ընտրությունների վերջնական արդյունքների ամփոփումը բոլոր այդ հանգամանքները մանրակրկիտ քննության առարկա կդառնան:

«Ես կարծում եմ լիարժեք ծավալով հնարավոր եղավ իրականացնել նախապատրաստական աշխատանքները, մենք մի քանի նոր նախաձեռնությամբ հանդես եկանք ու նույնիսկ հասցրինք դրանք իրականացնել: Հանրապետության ամբողջ տարածքում ունեինք 100 մեծ պաստառ, որոնք վերաբերում էին ընտրակաշառքը մերժելուն, առաջին անգամ ընտրողների համար սիմվոլիկ նորամուծություն էր մտածվել, երբ տրամադրվում էին այդ կրծքանշանները, ընդհանուր առմամբ, ժամկետները հստակ ամրագրված էին, չնայած կարճ ժամկետներին ողջ աշխատանքը հնարավոր եղավ լիարժեք կազմակերպել այդ ժամկետներում»,- նշեց Մուկուչյանը: