Վարկանիշային մրցաշարերում Միքայել Միքայելյանի հաղթանակն ուղեգիր է ապահովել դեպի Դահուկասպորտի աշխարհի առաջնություն

Վարկանիշային մրցաշարերում հաղթանակը հայ դահուկորդի համար ապահովել է աշխարհի և Oլիմպիական խաղերի մասնակցության ուղեգրեր: Միքայել Միքայելյանը Ֆինլանդիայում 8 վարկանիշային մրցաշարերից 3-ում առաջին հորիզոնականն է զբաղեցրել, ևս մեկում՝ երրորդը: Սա հայկական դահուկային սպորտում բավական լավ արդյունք է համարվում՝ հաշվի առնելով այն, որ մեր մարզիկներն աշխարհի և Օլիմպիական խաղերից երբևէ մրցանակներով չեն վերադարձել: Վարկանիշային մրցաշարերը մարզիկների համար ստուգատես են: Դրանց ընթացքում որոշվում է աշխարհի առաջնությանը մասնակցող ուժեղագույն դահուկորդների խումբը: Վարկանիշային մրցաշարերում հաղթանակի առավելությունը մարզիկը համարում է այն, որ այդ մրցաշարերում անձնական արդյունքներն է գերազանցել:

«Ճիշտ է՝ կարևորությունն այնքան մեծ չէ, որքան աշխարհի առաջնությանը, բայց այս մրցաշարերն ինձ լավ հնարավորություն տվեցին բարելավելու իմ միավորները և հունվարի 20-30-ը Ֆինլանդիայում մինչև 20 տարեկանների աշխարհի առաջնությանը հնարավորություն տվեցին իջեցնել միավորներս և ավելի լավ մեկնարկային դիրք ունենալ, ինչը շատ կարևոր է»,- Shantnews-ին ասել է Միքայել Միքայելյանը:

Դահուկային սպորտում միավորների հաշվարկը թվերի աճման կարգին հակառակ է. ինչքան ցածր են մարզիկի վարկանիշային միավորները, այնքան ուժեղ է նա համարվում: Իսկ որպեսզի վարկանիշային միավորները նվազեն, մարզումների ժամերն են ավելացնում: Օրական 4-5 ժամ, ամսական մինչև 1200 կիլոմետր դահուկային վազք:

Այսպիսին է Միքայելի մարզումների ծանրաբեռնվածությունը: Իսկ նպատակը դահուկավազքի աշխարհի երիտասարդական առաջնությանը մասնակցելն է:

Երիտասարդների աշխարհի առաջնության լավագույն տասնյակում 8-րդ և 9-րդ հորիզոնականներ. սա Միքայելի ավագ եղբոր՝  Սերգեյ Միքայելյանի և Հայաստանի դահուկասպորտում ունեցած լավագույն արդյունքն է:

Եղբոր արդյունքին հասնել, անգամ գերազանցել: Սա դահուկորդների ընտանիքում ոչ թե մրցակցություն է, այլ ընտանեկան ավանդույթները պահպանելու նման մի բան,  առավել ևս, որ մարզիչները Միքայելի ծնողներն են:

«Մենք վարկանիշային մրցաշարերին մասնակցում ենք արդեն չորրորդ տարին: Վիճակագրությունը ցույց է տալիս, որ Միքայելը տարեցտարի բարելավում է իր արդյունքները»,- Shantnews-ի հետ զրույցում ասել է Միքայելի մայրը` միևնույն ժամանակ նրա մարզիչ Ալլա Միքայելյանը:

Հաջողությունները ծնվում են մրցակցության արդյունքում: Միքայելյան ամուսիններն Աշոցքում այս գործառույթները ստանձնել են 10 տարի առաջ ու մինչև հիմա աշխատում են առանց կարգավիճակի: Մարզադպրոց չունեն: Պարզապես հավաքագրում ու պարապում են տարածաշրջանի բոլոր ցանկացող երեխաների հետ:

Այժմ Աշոցքի խմբակին մարզադպրոցի կարգավիճակ տալու հարցը Սպորտի նախարարության օրակարգում է: Աշոցքում, Եվրամիության աջակցությամբ, դահուկային մարզաբազա է կառուցվում: Շուտով այն շահագործելու են, ու հենց այդ շինությունն է, որ մարզիչը համարում է դահուկային սպորտն Աշոցքում զարգացնելու երաշխիք: