System of a Down-ի արձանախումբը Սևանա լիճ տեղափոխելուց առաջ կարող է ցուցադրվել Երևանում. քանդակագործ

Քանդակագործ Հայկ Թոքմաջյանը SHANTNEWS.am-ի հետ զրույցում պատմեց հայտնի ռոք խմբի` System of a Down-ի արձանախմբի ստեղծման աշխատանքների ընթացքի մասին: Այս քանդակը պետք է տեղադրվի Սևանա լճի հատակին: Քանդակագործը նշեց, որ SOAD արձանախմբի աշխատանքները վերջերս են ընթացքի մեջ ընկել, խիտ գրաֆիկի պատճառով անգամ չէր կարողանում ժամանակ տրամադրել, բայց մտքով և էությամբ չի կտրվել երբեք:

«Կիսատ վիճակում մնացել է, կիսատ որ լինում է գործը, որը, սակայն, այն գործն է, որ անընդհատ ուզում ես անել, դա հանգիստ չի տալիս: Ասես անընդհատ հետևի ու տեմպի մեջ պահի, այդ տեմպի պահպանման համար անընդհատ մտածում էի` ե՞րբ պիտի ժամանակ լինի, որ սկսեմ աշխատել: Արդեն մեկ շաբաթից ավելի է, ինչ սկսել եմ աշխատել հիմնական գործի վրա, որ իրական չափերով է, ինչպես էլ հենց պիտի տեղադրվի: Հիմա անում եմ քիչ-քիչ, հետո պիտի տեղափոխվի, բետոնից է արձանախումբը: Ժամանակ եմ դրել, որ պետք է փետրվարի սկզբին արդեն գոնե հիմնականում ավարտած լինեմ աշխատանքները, որ կարողանամ մյուս տարվա ընթացքում այդ հարցը կարգավորել, լուծել և տեղադրել»,- ասաց նա:

Թոքմաջյանը նշեց, որ մարդիկ հետաքրքրվում են աշխատանքի ընթացքով: Արդեն հիմնական չափերով ստեղծվող արձանախումբը նախնական տարբերակից շատ չի տարբերվի, թեպետ առանձին փոփոխություններ կարող են լինել՝ հաշվի առնելով, որ ծավալային առումով քանդակն այլ է. ֆիգուրները 180 սմ են, պատվանդանը մոտ 30 սմ: Արձանախմբի տեղադրման տեղանքի առումով վերջնական որոշում, ըստ քանդակագործի, դեռ չկա, սակայն որոշված է, որ պետք է ինչ-որ չափով տեսանելի լինի: Այս հարցը կքննարկվի, երբ արդեն աշխատանքների վերջին փուլը լինի: Թոքմաջյանը նկատեց, որ կա մի խնդիր, որի մասին էլի է բարձրաձայնել, այն է՝ արձանախումբը տեսնելու հասանելիությունը, քանի որ թեպետ դայվինգով զբաղվողները շատ են, բայց բոլորը չեն, ուստի պետք է այնպես անել, որ արձանախումբը բոլորի համար տեսանելի լինի:

«Կար ծրագիր, որին ինքս կողմ եմ, որ անպայման Սևանա լիճ տեղափոխելուց առաջ ժամանակավորապես քաղաքի այգիներից մեկում դրվի ցուցադրության, թեկուզ մի ամիս, երկու ամիս, որքան պետք կլինի, որ մարդիկ մոտենան, տեսնեն, քանի որ այն որոշ ժամանակ հետո գնալու է Սևանա լիճ»,- պատմեց Թոքմաջյանը:

Հետաքրքրվեցինք` ռոք խմբի երաժիշտների հետ շփում կա՞, նրանք տեղյա՞կ են արձանախմբի ստեղծման մասին, հետաքրքրվո՞ւմ են աշխատանքների ընթացքով: Թոքմաջյանն ասաց, որ ինքը նրանց տեղեկացրել է արձանախմբի ստեղծման մասին, նրանց կողմից դրական վերաբերմունք կա, սակայն ակտիվություն չկա: Ինքը` քանդակագործն էլ որևէ ակտիվ արձագանք չի ակնկալում, քանի որ, վերջին հաշվով, արձանախումբը ստեղծում է ոչ միայն նրանց համար, այլ բոլորի` հայ ժողովրդի, մարդկության համար: Թոքմաջյանը, սակայն, խոստովանեց. արձանախմբի ստեղծման աշխատանքներն ավելի սահուն են լինում, գործն էլ ավելի գեղեցիկ է ստացվում, երբ սկսում է աշխատել SOAD-ի երաժշտության հնչյունների ներքո: