Ինչ խախտումներ են թույլ տրվել Գյումրիի բնակբաշխման գործընթացում նախորդ 30 տարիներին

Ինչ խախտումներ են թույլ տրվել Գյումրիի բնակբաշխման գործընթացում նախորդ 30 տարիների ընթացքում : Այս մասին իր ուսումնասիրությունների արդյունքներն է իրավապահ մարմիններին հանձնել «Գյումրին առանց տնակների» հիմնադրամի տնօրեն Մհեր Խաչատրյանը: Մինչ խնդրի վերաբերյալ կլինեն իրավական գնահատականներ, թեմայի շուրջ կարծիք են հայտնել, բանավիճել են Շիրակի մարզպետարանի, Գյումրիի քաղաքապետարանի, հասարակական սեկտորի ներկայացուցիչներն ու փաստաբանը: Քննարկման հիմքում եղել են «Գյումրին առանց տնակների» հիմնադրամի տնօրենի ներկայացրած այն փաստաթղթերը, համաձայն որոնց` 1 փլված հասցեի դիմաց տարբեր տարիներին մի քանի բնակարան է հատկացվել:

Հիմնադրամի տնօրենի խոսքերով` սա հասկանալի կլիներ այն դեպքում, երբ երևար, որ այդ բնակարանները տրամադրվել են քույրերի կամ եղբայրների ընտանիքների: Բայց պարզվել է, որ բնակարան ստացած մարդիկ ընդհանրապես միմյանց հետ կապ չունեն, չեն համընկնում ոչ ազգանունները, ոչ էլ հայրանունները: «Շիրակ կենտրոն» ՀԿ-ի նախագահ Վահան Թումասյանը, որը 2005-2009 թվականներին հասարակական հիմունքներով աշխատել է բնակբաշխման հանձնաժողովում, նշում է, որ տարիներ շարունակ եղել է մի իրավիճակ, երբ ծանոթի միջոցով մարդիկ կարողացել են բնակարան ստանալ: Իսկ փլված շենքի հասցեով մարդկանց հաշվառելը բնակբաշխման կոռուպցիոն մեխանիզմներից մեկն է եղել: Դեպքեր են եղել, որ փլված շենքի հասցեով հաշվառված իրական անօթևանը չի էլ իմացել, որ իր հասցեով ինչ-որ մեկը բնակարան արդեն ստացել է:

Ըստ Վահան Թումասյանի՝ եթե այս դեպքերը չլինեին, ապա Գյումրիում հիմա անօթևանների թիվը անհամեմատ քիչ կլիներ, մոտ 200 ընտանիք: Իսկ այժմ քաղաքում 2800-ից ավելի տնակային հասցե կա: Գյումրիում երկրաշարժի հետևանքով 20.612 բնակարան է փլվել, ևս 3500 բնակարան էլ դարձել է վթարային: Մինչ այժմ 21.180 ընտանիք ապահովվել է բնակարանով: Տնակային հասցեներում հաշվառված ընտանիքներից մոտ 2000-ը դեռ բնակարանի կարիք ունի, նշել է Շիրակի մարզպետարանի քաղաքաշինության վարչության պետ Ալբերտ Մարգարյանը:

Ըստ նրա՝ արդեն հաշվառված ավելի քան 2800 ընտանիքների մասին տեղեկությունները ներկայացվել են կադաստրային կոմիտե՝ պարզելու, արդյո՞ք իրենց անունով սեփականություն ունեն, թե՞ ոչ: Դրանց 10 տոկոսի՝ այսինքն 230 ընտանիքի վերաբերյալ պատասխանն արդեն ստացվել է:

Պարզվել է, որ նրանց 40 տոկոսը կամ սեփականություն ունի, կամ նախկինում բնակարան արդեն ստացել է ու 2-3 տարի առաջ է օտարել: Ըստ Ալբերտ Մարգարյանի՝ եթե ամբողջական տեղեկատվությունն այսպիսի պատկեր գրանցի, ապա կստացվի, որ տնակներում բնակվող ընտանիքների միայն 60 տոկոսն է բնակարանի շահառու:

Այս խոսքերին հակադարձել է «Շիրակ կենտրոն»-ի ՀԿ-ի նախագահ Վահան Թումասյանը, որը նշել է, որ դեռ 2005 թվականի բնակբաշխման ժամանակվանից կադաստրի հետ կապված խնդիրը կար: Քանի որ կադաստրի բազան թերի է, ապա ավելի քան 10 տարի առաջ, եղել էր դեպք, որ քայքայված տնակում ապրող ընտանիքը կադաստրի հարցումով Հյուսիսային պողոտայում բնակարան կամ Աջափնյակ թաղամասում դղյակ ուներ: Բացի դրանից՝ 1999 թվականից հետո, անօթևան ընտանիքին կորցրած 1 բնակարանի դիմաց 1 բնակարան է հատկացվում՝ անկախ նրանից ընտանիքում անձերի թիվ ավելացել է, թե՝ ոչ: Ու քիչ չեն դեպքերը, երբ 15 անձով 2 սենյականոց բնակարան են ստացել, բոլորը ստորագրել, դարձել են համասեփականատեր, բայց այդ բնակարանը բազմանդամ ընտանիքների համար եղել է կռվախնձոր ու այդպես էլ ընտանիքի մի մասը այդ տներում չի էլ ապրել: Բայց կադաստրի հարցումով երևում է, որ նրանք սեփականություն ունեն: