Գյումրիի մոտ 100 տնակներում վարձով ապրող ընտանիքներ են

Շիրակի մարզի դատախազությունն ուսումնասիրում է «Գյումրին առանց տնակների» հիմնադրամի՝ քաղաքում տնակների հաշվառման ու բնակարանների բաշխման գործընթացներում նախնական խախտումների վերաբերյալ հաղորդումները: Նույն հիմնադրամի  ուսումնասիրությունները վերաբերում են նաև վարձակալությամբ տրված տնակների խնդրին: Ովքեր են նախկին տերերը, ինչպես են այդ տնակները դառնում վարձով տարածքներ, պատճառները մի քանիսն են, որոնք դեռ պարզաբանումների կարիք ունեն: Այս ուղղությամբ  Գյումրիի քաղաքապետարանի համապատասխան բաժնում հստակ տվյալներ չկան: Այս մասին հայտնում է SHANTNEWS.am-ի թղթակիցը։

Տնակային թաղամասերում ապրող ընտանիքների մի մասը անօթևանության հերթացուցակում ժամանակին չգրանցվածներն են,  բազմանդամ  այն ընտանիքները, որոնք կորցրածի դիմաց տուն են ստացել, բայց ընտանիքի մի մասն է տեղափոխվել: Նրանք, փաստացի, անօթևանի, այսպես ասած, կատեգորիա են ձևավորել քաղաքում, որոնց հանդեպ շարունակ նշվում է, թե պետությունը պարտավորություններ չունի: Բայց,  փաստացի, պատկերը փոխվում  է, երբ խոսք է գնում տնակների վարձակալության տարածվող երևույթի մասին: Ովքեր են կամ որտեղ են այդ  տնակների իրական տերերը: Այս մասին հարևանությամբ ապրողներն են տվյալներ տալիս, պատասխանատու կառույցները հստակ ուսումնասիրություններ չունեն։

Տիկին Մարգարյանը Գարեգին Նժդեհ 223 տնակային թաղամասի հնաբնակներից է, որը գիտի թե թաղամասում նույն տնակը քանի վարձակալ է փոխել: Օրինակ՝ 223 տարածքի 050 տնակում 3 ամիս առաջ նոր մարդիկ են եկել ապրելու: Տիկին Մարգարյանը դստեր ու թոռան հետ այստեղ է տեղափոխվել տնակից: Անօթևանի կարգավիճակ  չունեն, 88–ին տուն չեն կորցրել, անձնական խնդիրներն են պատճառը՝ մի տնակից մեկ այլ տնակ տեղափոխվելու:

Նույն տնից չեն, բայց նույն օրից են: Երկու ընտանիքներն էլ տնակների սեփականատերերին չեն ճանաչում, 10 հազար դրամ տնակվարձը տալիս են նրանց հարազատներին:

Հիմա այն մասին՝ ինչ կարգավիճակ ունեն այն տնակների տերերը, ովքեր վարձակալության են տվել: Պատկերը խորը ուսումնասիրությունների չի ենթարկվել:  «Գյումրին առանց տնակների» հիմնադրամն է հաշվառման ժամանակ գրանցել, որ քաղաքում փաստացի եղած 2800-ից ավելի տնակներից մոտ 100-ը վարձով է տրված:

Հիմնադրամի տնօրենը չի բացառում նաև այն, որ տնակների իրական տերերը բնակարան են ստացել կամ քաղաքից բացակայողներն են: Տնակները հաջողվել է չապամոնտաժել: Գյումրիի քաղաքապետարանի բնակտնտեսության բաժնում վարձակալված տնակների մասին  տվյալների բազա չկա: Քաղաքապետարանը նոր է սկսելու հասցե առ հասցե տնակների հաշվառում, մինչ այդ ասում են, որ բնակիչներն էլ են եկել, գրանցվել՝ որպես փաստ ներկայացնելով տնակից լուսանկարներ:

Հիմնադրամի տնօրենը այդպիսի փաստեր էլ ունի, որ տնակի քանդման ակտը կա, բայց տնակը ապամոնտաժված չէ: Իսկ կառավարության հանձնարարականով նոր անցկացվող հաշվառումն արվելու է, որպեսզի ի հայտ բերվի դրանց 30 տարվա պատմությունը, այդ թվում՝ վարձով տրված տնակները ջրի երես դուրս կգան: