90 տոկոսանոց հին համակարգի պայմաններում վարչապետն ինչպե՞ս է պատկերացնում վստահելիության մակարդակի բարձրացումը. Սիսակ Գաբրիելյանի հարցը

ԱԺ «Իմ քայլը» խմբակցության անդամ Սիսակ Գաբրիելյանը փետրվարի 13-ին խորհրդարանում Կառավարության նիստի քննարկմանն անդրադարձավ փողոցային առևտրի հարցին: Նա ասաց, որ հարցը իր և գործընկերների ուշադրության կենտրոնում է: Նրանք քաղաքապետարանից ճշտել են, որ յուրաքանչյուր վարչական շրջանում նվազագույնը երեք անվճար տեղ է հատկացվում՝ վեց ամսով, ավելին, մոտ 500 փողոցային առևտրականներից 400-ից ավելին համաձայնել է: Գաբրիելյանը, սակայն, ասաց՝ երբ այս տեղեկությունները փոխանցել է իրեն այդ խնդրով դիմած առևտրականներից մեկին, մոտավորապես հետևյալ պատասխանն է ստացել. «Թաղեմ ձեզ էլ, ձեր շուկան էլ: Իմ երկիրն ա, կուզեմ՝ կգնամ հրապարակի գորգի վրա կիրականացնեմ իմ առևտուրը»:

Պատգամավորը նաև ասաց, որ գործընկերների հետ մտադիր էին օրենսդրական նախաձեռնությամբ հանդես գալ՝ պարգևավճարների հարցով, ու պարզեցին, որ վարչապետի աշխատակազմն այդ մասով դեռ նոյեմբերից որոշակի հանձնարարականներ է տվել քաղծառայության գրասենյակին: Գաբրիելյանը վարչապետ Նիկոլ Փաշինյանից հետաքրքրվեց՝ ներքին անվտանգության ոլորտում վստահելիության մակարդակի բարձրացումը վարչապետն ինչպե՞ս է պատկերացնում, երբ 90 տոկոսը հին համակարգն է, քանի որ մարդիկ ասում են՝ այնտեղ չի փոխվում, ուզում եք՝ մենք մեր վարքագիծը փոխե՞նք:

«Մեր պլանը ո՞րն է, մարդկանց փոխելու համար պետք է ֆիզիկապե՞ս փոխել, թե՞ մտածողության մեջ: Մեր կանխավարկածն էն է, որ բոլոր ոստիկաններին ազատում ենք, նորերին ընդունում, ու այն նորը, որ նախկինում չի ծառայել, շատ ավելի լա՞վն է լինելու: Ես էլի եմ ասել՝ նորերը կարող են շատ արագ հնանալ, այսինքն՝ ոչ մի երաշխիք չկա, որ մեկին զրոյից ինչ-որ դրեցիր, արդեն ուրիշ իրավիճակ է, ուրիշ մարդ: Վստահելիության մակարդակի բարձրացումը ժողովրդավարությունն է, վերահսկողությունը, աշխատանքի արդյունքի վրա հիմնված գնահատումը, առաջնորդությունը, նաև քաղաքական առաջնորդությունը, թե ինչ հրահանգներ են տրվում ոստիկանությանը, թե ինչպես պետք է քաղաքացիների հետ շփվի, հարաբերվի, ինչպես պետք է վարվեն այս կամ այն ճգնաժամային իրավիճակներում»,- արձագանքեց Փաշինյանը:

Փաշինյանն ասաց՝ գծեր և հավասարակշռություններ կան, որ կարևոր է պահպանել, ոստիկանությունը հասարակական կարգը պետք է պահպանի, մի կողմից՝ թույլ չտա, որ պատեհ-անպատեհ ճանապարհներ փակեն, մյուս կողմից` չի կարող լինել բիրտ ուժ կիրառող, մարդկանց խոշտանգող, «քացու տակ տվող» մարմին: Վարչապետի համոզմամբ՝ սա է ճանապարհը, ոչ թե բոլոր հներին հանել ու նորերով փոխարինելը: Նա ընդգծեց՝ չի կարելի ասել, որ Հայաստանում հեղափոխությունը տեղի է ունեցել քաղաքացիների մի մասի համար, մյուսների համար տեղի չի ունեցել:

Նա հիշեցրեց՝ ԱԱԾ-ի մասնագիտական տոնին կառույցի հնաբնակներից մեկը ելույթ ունեցավ ու ասաց, որ ԱԱԾ-ն ամենաընդդիմադիր կառույցն է եղել և միշտ քվեարկել է ընդդիմության օգտին:

«Որքանո՞վ է սա ճիշտ …»,- ասաց Փաշինյանը, ապա հավելեց. «Պարոն Անդրանիկ Քոչարյանը թարս-թարս նայում է»:

Գաբրիելյանը նկատեց՝ օրինակ՝ Ճանապարհային ոստիկանությունը հետաքրքիր գործելաոճ ունի, որոշակի պարբերականությամբ քաղաքացիներին հրավիրում է ՃՈ, միասին առավոտյան շրջում են: Սա, ըստ Գաբրիելյանի, լավ օրինակ է:

Փաշինյանը, արձագանքելով, կատակեց.

«Ձեր ասածն ամենաշատը կիրառելի է ԱԱԾ-ի դեպքում, որ քաղաքացիներին հրավիրեն «ժուչոկ» տեղադրելու կամ հանելու պրոցեսին ականատես լինելու»:

Կառավարության ղեկավարն ասաց, որ հեղափոխությունից անմիջապես հետո նկատվել էր գործընթաց, որ հները, գործողները համատարած մի պահ հեղափոխության ալիքի տակ հեռանում-հեռացվում էին, ու մի պահ ինքն արձանագրեց, որ այդ ալիքի տակ ավելի հներն են վերադառնում:

«Ոստիկանությունում, ենթադրենք, կա պրիտենզիա: Որ գնդապետին հանեցիր, պիտի գնդապետ գա, չէ՞, այսինքն՝ արդյունքում պիտի գան ավելի հները՝ էն ավելի փարթամ ժամանակներից, որ էն ամենակոռուպցիոներներն են»,- ասաց նա: