Դուք պետք է բոլորից լավ գիտակցեք, որ փոքրամասնության ձայնն անտեսելը հղի է հետևանքներով. Գորգիսյանը՝ Փաշինյանին

«Լուսավոր Հայաստան» խմբակցության անդամ Գևորգ Գորգիսյանը խորհրդարանում նշեց, որ իր պատրաստած ելույթի տեքստն ամբողջությամբ փոխվեց ՀՀ վարչապետ Նիկոլ Փաշինյանի ելույթից հետո: Վարչապետի ելույթը նա գնահատեց որպես էմոցիոնալ, քաղաքական, «գրեթե հանրահավաքներում ունեցած ելույթների պես», սակայն նշեց՝ էմոցիայից բացի, առարկայական ոչինչ չստացան:

«Բերել եք Կարեն Կարապետյանի կառավարության ծրագրի նախագծին մոտ նախագիծ, որն անցյալ տարի խստագույնս քննադատում էիք, անվանում «կենաց», հնչեցված քննադատություններին տալիս եք նույնքան խուսանավող, արհամարհանքով ու մունաթով համեմված պատասխաններ, քննադատում էիք սուպերվարչապետական համակարգը, ասում եք՝ սուպերվարչապետական համակարգը պետք է վերացնել… ԱԱԾ-ոստիկանությունը վարչապետին ենթակա մարմիններ, ՊԵԿ-ը՝ կառավարությանը ենթակա մարմին, մեզ քիչ էր, Սփյուռքի նախարարությունը լուծարվում է, ստեղծվում է վարչապետին առընթեր հանձնակատարի ինստիտուտ` էլ ավելի խորացնելով սուպերվարչապետական համակարգը»,- ասաց նա:

Գորգիսյանը հիշեցրեց՝ մեկ տարի առաջ Փաշինյանը նշում էր, թե պատերազմող և շրջափակման մեջ գտնվող երկրի համար որքան կարևոր է ազգային ավիափոխադրող ունենալը, այսօր ասում է՝ օրակարգում չկա նման հարց, միջոց կլինի՝ կանեն, չի լինի՝ չեն անի: Պատգամավորն ասաց նաև, որ գյուղատնտեսության ոլորտի զարգացման տեսլական չկա:

«Փաստորեն, գյուղացուն ասում եք՝ գնացեք, աշխատեք, ապահովեք պարենային անվտանգությունն ու կառավարության վրա հույս մի´ դրեք: Ասում եք՝ կոռուպցիան վերացել է, բայց ունենք Հարկային օրենսգիրք և մաքսային ընթացակարգեր, որ ամբողջությամբ ստեղծված են եղել կոռուպցիա ապահովելու համար, գնացե´ք, տեսե´ք, թե ինչ է կատարվում այդ մարմիններում, հենց այսօր գնացեք: Զինծառայողների սոցիալական վիճակի ու բացերի մասին ենք հարցնում, ասում եք՝ լուրջ բարեփոխումներ են արվել, վարկերի վերակազմակերպումը: Դա բարեփոխում չէ, չարափոխում է, եթե քաղաքացին ավելի քիչ է վճարում, ավելի երկար է վճարում ու ավելի շատ տոկոս է վճարում, սա առանց կառավարության միջամտության էլ կարվեր, հիմա բանկերը լիքը փաթեթներ են առաջարկում»,- ասաց նա:

Գորգիսյանն ասաց, որ գազի սակագնի նվազեցման դեպքում էլ կառավարությունը լծակներ ունի. ՀԾԿՀ-ի ճիշտ աշխատելու դեպքում մինչև 30 տոկոս կարող է նվազել գազի գինը: Նա մեջբերեց վարչապետի խոսքը՝ ուղղված քաղաքացուն, թե՝ պետք է դառնան տնտեսական ակտիվիստներ տնտեսական հեղափոխություն անելու համար:

«Ասում եք՝ ՀԴՄ չպահանջեք, վթարային շենքում եք ապրելու: Իսկ մի քանի տարի հետո ումի՞ց պահանջենք, հարցնենք՝ այդ հեղափոխությունը եղա՞վ, թե՞ ոչ: Ինչպե՞ս ենք վերահսկելու ծրագրի կատարումը, եթե այնտեղ ընդամենը 11 թիվ կա, «պետք է»-ն կիրառված է 95 անգամ, «անհրաժեշտ է»-ն՝ 35 : Եթե մեկ տարի հետո հարցնենք՝ ինչ եղավ, կասեք՝ դեռ պետք է, 5 տարի հետո կասեք՝ դե, հեսա ընտրություն ա, ժողովուրդը կորոշի: Պարո´ն վարչապետ, «պերաշկու» մասին անեկդոտ էիք պատմում, հանկարծ էդ իրավիճակում չհայտնվենք»,- նշեց պատգամավորը:

Նրա գնահատմամբ՝ տպավորություն է, թե ծրագրում ամեն ինչ արվել է պատասխանատվությունից խուսափելու ու հետագա ձախողումները ժողովրդի վրա գցելու համար: Գորգիսյանը հիշեցրեց՝ «հանրապետականներն էլ էին այդպես անում»: Նա վարչապետին ասաց նաև, որ հասկանում է՝ պատասխանատվության ամբողջ բեռը նրա ուսերին է, ապա հորդորեց չկրկնել նախորդների սխալները:

«Մեր երկիրն ու ժողովուրդը դրա միջով կրկին չի կարող անցնել: Մի խնդրանք նաև, Դուք պետք է բոլորից լավ գիտակցեք, որ փոքրամասնության ձայնը անտեսելն ու արհամարհելը հղի է լինում հետևանքներով»,- ասաց Գորգիսյանը: