Ռոբերտ Քոչարյանի դատաքննությունը տեղի կունենա գրավոր ընթացակարգով

ՀՀ Սահմանադրական դատարանը քննության է ընդունել ՀՀ երկրորդ նախագահ Ռոբերտ Քոչարյանի դիմումը՝ Քրեական դատավարության օրենսգրքի 419-րդ հոդվածի 2-րդ մասի Սահմանադրությանը համապատասխանության հարցը որոշելու վերաբերյալ, SHANTNEWS.am-ին տված պարզաբանման ժամանակ Քոչարյանի պաշտպան Արամ Վարդևանյանը նշել է, որ դիմումը վերաբերում է ՀՀ քրեական օրենսգրքի 419-րդ հոդվածի 2-րդ մասին: Դիմումը ներկայացրել  էին 2019 թվականի հունվարի 18-ին:

«Այս  կարգավորմամբ՝ Վճռաբեկ դատարանի լիազորությունն է հստակեցվում, թե վճռաբեկ բողոքը վարույթ ընդունելուց հետո ինչ որոշում պետք է կայացնի դատարանը՝ գործը, ըստ էության, չլուծող  դատական ակտերի դեպքում: Օրինակ՝ կալանքը: Օրենքը հստակ ասում  է՝ կա՛մ պետք է մերժվի, կա՛մ նոր դատական ակտ կայացվի: Գործն ըստ էության լուծող դատական ակտերի մասով Վճռաբեկ դատարանն ունի  բեկանելու, նոր քննություն իրականացնելու հստակ լիազորութուններ: Վճռաբեկ դատարանը մի քանի տարի առաջ իր նախադեպային որոշմամբ նախատեսել է,  որ բոլոր այն լիազորությունները, որոնք առկա են գործն ըստ էության լուծող դատական ակտերի դեպքում, կիրառելի են նաև գործն ըստ էության չլուծող դատական ակտերի դեպքում: Նման մեկնաբանությունն ու կիրառումը խնդիր են առաջացնում  կիրառության և արդար դատաքննության հետ կապված: Գործն ըստ էության չլուծող դատական ակտերը պիտի ունենան որոշակի տրամաբանություն և ավարտ, այլ ոչ այն նույն ցիկլով կրկին ու կրկին անցնեն: Երկրորդ խնդիրը վերաբերում էր կալանքի քննության  առանձնահատկություններին Վճռաբեկ վարույթում: Երբ կալանքի գործը քննվում է Ընդհանուր իրավասության դատաանում կամ Վերաքննիչում, այդ գործի առանձնահատկություններն առկա են, կան հստակ ժամկետներ, մինչդեռ Վճռաբեկ դատարանում  այդ առանձնահատկություններն ու ժամկետները չկան:

Բացի այդ, կա երրորդ  հանգամանքը՝  երբ առաջին ատյանի դատարանը բավարարում  է կալանքի միջնորդությունը, երկրորդ ատյանը վերացնում է այն, ստացվում է ՝ անձը և՛ եղել է ազատության մեջ, և՛ չի եղել և որոշակի վարքագիծ է դրսևորել: Եվ այն վարքագիծը, որը դրսևորվել է  ազատության մեջ, քննության ժամանակ չի դիտարկվում որպես ապացույց, արդար դատաքննության և իրավունքի տեսանկյունից խնդիր է առաջացնում: Այս հարցերին է վերաբերում հունվարի 18-ին Սահմանադրական դատարան ներկայացրած դիմումը, որը վարույթ է  ընդունվել աշխատակազմի կողմից և քննության օր է նշանակվել ապրիլի 9-ը»,- ասել է  փաստաբանը:

Արամ Վարդևանյանը նաև տեղեկացրել է, որ գործով զեկուցող է նշանակվել ՍԴ դատավոր Ալվինա Գյուլումյանը, իսկ դատաքննությունը տեղի կունենա գրավոր ընթացակարգով։