Անվերապահ աջակցում ենք կառավարության ներկայացրած ծրագրի նախագծին. Մակունց

Խորհրդարանում SHANTNEWS.am-ը հետաքրքրվել է «Իմ քայլը» խմբակցության ղեկավար Լիլիթ Մակունցից, թե ինչ որոշում են կայացրել փակ նիստից հետո՝ պատգամավորներն ազա՞տ են լինելու կառավարության ծրագրին դեմ կամ կողմ քվեարկելու հարցում:

«Նախ ճշտեմ նորից՝ նիստ չէ, այլ խորհրդակցություն, որովհետև 15 րոպեում, կամ 10 րոպեում իրականում նիստ չեն անում: Խորհրդակցություն, մտքերի փոխանակություն այն մասին, որ անվերապահ աջակցում ենք կառավարության ներկայացրած ծրագրի նախագծին»,- ասել է Մակունցը:

Ինչ վերաբերում է ընդդիմադիր խմբակցություններից ստացած առաջարկներին ու դրանց վերաբերյալ ունեցած դիրքորոշմանը, Մակունցն ասել է, որ հասցեատերն իրենք չեն, այլ կառավարությունը:

Լրագրողները հիշեցրին «Իմ քայլը» խմբակցության ղեկավարին ընդդիմադիր խմբակցության ներկայացուցիչների այն դժգոհության մասին, որ ընդդիմությունից իշխանություն դառնալուց հետո «Իմ քայլը» անհանդուրժող է դարձել:

«Թույլ տվեք չհամաձայնել այդ մեկնաբանության հետ և ասել, որ բոլորը՝ թե՛ խորհրդարանական մեծամասնությունը, թե՛ մյուս խմբակցությունները տեղ-տեղ էմոցիոնալ են իրենց ելույթներում, և դա նորմալ է խորհրդարանական քննարկումների ժամանակ: Կարևորում եմ բոլոր կողմերից բարձրաձայնված այն միտքը, որ ցանկացած էմոցիոնալ քննարկում պետք է լինի կոռեկտության և անձնական տիրույթ չներխուժելու տրամաբանությամբ»,- հավելել է «Իմ քայլը» խմբակցության ղեկավարը:

Լիլիթ Մակունցը նաև ասել է, որ ուրախ կլիներ, եթե ընդդիմությունը նույնպես աջակցեր կառավարության կողմից ներկայացված ծրագրին:

«Հասկանալի է, որ ծրագրի հաստատվելու դեպքում թե՛ խորհրդարանական մեծամասնությունը, թե՛ մյուս խմբակցություններն աշխատելու են այդ ուղղությամբ: Իհարկե, ցանկալի կլիներ, որ ի սկզբանե ամրագրեինք նաև վստահությունը ծրագրի նկատմամբ և աշխատեինք այդ ուղղությամբ: Ծրագիրն առանձին քննարկվել է «Իմ քայլը» խմբակցության առանձին մասնագիտական տիրույթներում, վեր են հանվել տարբեր ասպեկտները, տարբեր կողմերը, այդ թվում նաև այն, թե ինչը տեղ չի գտել կառավարության ծրագրում, այդ մասով «Իմ քայլը» խմբակցությունը տեսել է իր անելիքը, և մենք, որպես օրենսդիր, ինչ կարող ենք անել և ինչպես պետք է լրացնենք դա: Այո՛, այդ առումով մեր անելիքը բավականին շատ է, միևնույն ժամանակ՝ ծրագիրը բավականին ընդհանուր է, լայն է, ճկուն է: Եթե մենք գտնում ենք, որ գործողությունների պլանում ճանապարհային քարտեզը ձևավորելիս կա ավել գործողություններ իրականացնելու անհրաժեշտություն, ապա, այո՛, մենք այդ առաջարկը ներկայացնելու ենք կառավարությանը»,- հավելել է Լիլիթ Մակունցը:

Լիլիթ Մակունցն ասել է, որ օրվա վերջում իրենք գրավոր առաջարկներ կներկայացնեն կառավարությանը:

«Առաջարկների փաթեթն այն մասին է, թե մենք ինչ կարող ենք անել»,- ասել է Մակունցը:

Ինչ վերաբերում է հարցին, թե մարդիկ ե՞րբ կզգան դրական տեղաշարժ, Մակունցն ասել է, որ աշխատում է խուսափել փիլիսոփայական հարցերին փիլիսոփայորեն պատասխանելուց: Չի կարծում, որ այս ճեպազրույցի շրջանակներում պետք է պատասխանի այդ հարցին:

«Ծրագրի ընդունումից անմիջապես հետո գործադիր մարմինը պետք է անցնի գործողությունների, մենք էլ մեր տիրույթում ևս»,- հավելել է Լիլիթ Մակունցը:

Հարց է հնչել` անվերապահ աջակցությունը բխո՞ւմ է այն դրույթից, որ եթե մի տող էլ գրված լիներ, կողմ են քվեարկելու.

«Անվերապահ աջակցությունը բխում է հեղափոխության երկրորդ փուլի տրամաբանությունից: Հեղափոխության առաջին փուլը հաջողությամբ ավարտել ենք, բայց դա միայն առաջին փուլն էր: Հիմա երկրորդ փուլն է սկսվում, որն առաջինի տրամաբանական շարունակությունն է, նույն արժեքային տիրույթում է: Մենք հայտնում ենք մեր անվերապահ աջակցությունը հեղափոխության հաջորդ փուլը նույնպես հաջողությամբ ավարտին հասցնելու համար»,- ասել է Մակունցը: