Զենքի և զինամթերքի արտադրության մեջ կիրառվող ապրանքներ ներմուծող «ԱՐՍԵՆԱԼ ԼՏԴ»-ն արտոնություն ստացավ

ՀՀ կառավարությունը փետրվարի 21-ի նիստում որոշում ընդունեց «Գերակա ոլորտում իրականացվող ներդրումային ծրագրի շրջանակներում ներմուծված (ներմուծվող) տեխնոլոգիական սարքավորումները, դրանց բաղկացուցիչ ու համալրող մասերը, հումքը և (կամ) նյութերը ներմուծման մաքսատուրքից ազատելու արտոնությունից օգտվելու համար «ԱՐՍԵՆԱԼ ԼՏԴ» սահմանափակ պատասխանատվությամբ ընկերության կողմից ներկայացված հայտը բավարարելու և արտոնությունը կիրառելու մասին»:

Նախագծով նախատեսվում է.

1. Բավարարել «ԱՐՍԵՆԱԼ ԼՏԴ» սահմանափակ պատասխանատվությամբ ընկերության կողմից ներկայացված հայտը գերակա ոլորտում իրականացվող ներդրումային ծրագրի շրջանակներում ներմուծված (ներմուծվող) տեխնոլոգիական սարքավորումները, դրանց բաղկացուցիչ ու համալրող մասերը, հումքը և (կամ) նյութերը ներմուծման մաքսատուրքից ազատման արտոնությունից օգտվելու համար և սահմանված կարգով կիրառել համապատասխան արտոնությունը` համաձայն հավելվածի ներմուծված (ներմուծվող) տեխնոլոգիական սարքավորումների, դրանց բաղկացուցիչ ու համալրող մասերի, հումքի և (կամ) նյութերի նկատմամբ:

2. Սահմանել, որ սույն որոշման հավելվածում նշված են ներմուծված (ներմուծվող) տեխնոլոգիական սարքավորումների, դրանց բաղկացուցիչ ու համալրող մասերի, հումքի և (կամ) նյութերի նախնական արժեքները:

«ԱՐՍԵՆԱԼ ԼՏԴ» սահմանափակ պատասխանատվությամբ ընկերության կողմից ներմուծվող ապրանքներն օգտագործվելու են զենքի և զինամթերքի արտադրության մեջ։ Ներմուծվող ապրանքները չեն ներմուծվում ԵԱՏՄ անդամ-երկրներից, քանի որ չեն բավարարում ընկերության տեխնիկական պահանջներին։

Արտոնության առկայությունը լուրջ խթան կհանդիսանա նոր ներդրումային ծրագրերի իրականացման և որպես հետևանք նոր աշխատատեղերի ստեղծման, ներդրումների ներգրավման, տեղական արտադրության և արտահանման խթանման համար:

ՀՀ վարչապետ Նիկոլ Փաշինյանը նշեց, որ այս կարգի որոշումների շրջանակներում նախորդ տարվա որոշումների հանրագումարում ստացվում է՝ միայն այս որոշումների մասով ունենք 500 մլն դոլարի ներդրումային ծրագիր և մի քանի հազար աշխատատեղերի բացման պրոցես, ուստի կարևոր է հետևել և աջակցել ներդրողներին, որ այս դեկլարացիաները դառնան իրականություն, և մեխանիզմը այլ նպատակներով չօգտագործվի:

ՀՀ տնտեսական զարգացման և ներդրումների նախարար Տիգրան Խաչատրյանն ասաց, որ պատրաստում են հաշվետվություն, դրանք որոշակի պարբերականությամբ են ներկայացվում, աշխատանքը պարբերական է, հանձնարարությունը երկու մասով պատրաստվում են իրականացնել, քննարկումներ են վարում, նախատեսում են նաև կառավարության որոշմամբ սահմանված ընթացակարգերը փոխել այնպես, որ պայմանագրային պարտավորությունների ձևաչափը փոխեն, իսկ դա առաջացնի նաև հետևանք՝ այն դեպքերում, երբ տեղի կունենան շեղումներ:

Տիգրան Խաչատրյանը տեղեկացրեց, որ ծրագրի շրջանակում նախատեսվում է իրականացնել 3 մլրդ 26 մլն դրամի ներդրում, ստեղծել 200 նոր աշխատատեղ՝ 250 հազար դրամ միջին աշխատավարձով։ Արտադրանքի ընդհանուր ծավալը տարեկան կկազմի 44 մլրդ 400 մլն դրամ։