«Վերջ Ռուսաստանի դեմ սադրանքներին». Կոմկուսի ակցիան Գյումրիում տեղակայված 102-րդ ռազմաբազայի տարածքում

«Միշտ Ռուսաստանի կողքին» ու «Վերջ Ռուսաստանի դեմ սադրանքներին»  նման գրություններով փետրվարի 23-ին՝  «Հայրենիքի պաշտպանի օրը», Գյումրիում տեղակայված 102-րդ ռազմաբազայի մոտ Հայաստանի կոմունիստական կուսակցության ներկայացուցիչները ակցիա են անցկացրել: Այս մասին հայտնում   SHANTNEWS.am-ի թղթակիցը:

«Մեր ակցիան ուղղված է այն շարժման կամ այն մարդկանց դեմ, ովքեր արտահայտվում են, թե բազան պետք է դուրս բերել Գյումրիից, մենք՝ այստեղ հավաքվածներս, ասում ենք, որ նման բան թույլ տալ կամ նման կերպ արտահայտվել չի կարելի: Նման կարծիք ունեցողները չեն պատկերացնում, թե ինչ է նշանակում ռուսական բազան Հայաստանից հանելը»,- ասել է Կոմկուսի առաջին քարտուղար Երջանիկ Ղազարյանը:

Կոմկուսականները խոսել են հայ-ռուսական հարաբերությունների ու բազայի՝ Գյումրիում գտնվելու անհրաժեշտության մասին: Մեր թղթակցի հետ զրույցում ակցիայի մասնակիցներն ասել են, որ ռուս-հայկական միացյալ զորքերի ներկայությունը մեր սահմանների անվտանգության երաշխիքն է, իսկ այդ համագործակցությունը դարերով է գալիս:

«Հայ-ռուսական հարաբերությունները դարեր շարունակ եղել ու պետք է շարունակվեն նույն կերպ, իսկ ռուսական ռազմաբազան կարևոր այն կառույցն է, որը մեր սահմաններն է պաշտպանում»,- ասել են կոմկուսականները:

 «102-րդ ռազմաբազան հանելով՝ մեր անվտանգություն ենք վտանգի տակ դնում, ճիշտ է, բազայի զինվորներն ասում են, որ հանցագործություն են կատարել, բայց դա չի կարելի քաղաքականացնել»,- մեր թղթակցին ասել է ակտիվիստներից մեկը:

«Մենք  դարերով  համերաշխ հարևան երկրներ ենք եղել, միացյալ Զինված ուժեր ունենք, որ մեր սահմանը պաշտպանում են, ինչպես կարելի է ասել՝ վեր կացեք, գնացեք, դա ճիշտ չէ, դա լուրջ քաղաքականություն չէ, նման կարծիք ունեցողները սխալ են մտածում: Մենք չենք արդարացնում  կատարված դեպքերը, բայց չի կարելի նման ագրեսիվ ձևով խոսել այն երկրի, ռազմական կառույցի գործունեութան մասին, որը մեր անվտանգությունն է ապահովում»,- SHANTNEWS.am-ին ասել է ակցիայի մասնակիցներից մեկը:

Ակցիայի ավարտից հետո կոմկուսականները շրջել են նաև 102-րդ ռազմաբազայի տարածքում, հանդիպել հրամանատարական կազմին, մասնակցել «Հայրենիքի պաշտպանի օրվան» նվիրված միջոցառումներին: