Բուժհաստատություններում դժվարամատչելի հետազոտություններն անվճար են նպաստառուների համար

Շիրակի մարզի բուժհաստատությունների ֆինանսավորումն այս տարի ավելացել է: Միայն «Գյումրի» բժշկական կենտրոնում ֆինանսավորումն ավելացել է շուրջ 150 մլն դրամով, և հիվանդանոցի բյուջեն կազմել է մոտ 860 մլն դրամ, հայտնում է SHANTNEWS.am-ի թղթակիցը Գյումրիից:

Գումարներն ավելացել են գրեթե բոլոր ծառայությունների մասով ու դա պայմանավորված չէ անվճար բուժսպասարկման ծառայություններից օգտվողների ցանկի ընդլայնմամբ:

Բուժհաստատության տնօրենն էլ հավաստիացնում է` բյուջեի ավելացման արդյունքում կբացառվեն հիվանդների հերթագրումները տարվա կեսին՝ պետպատվերի գումարների սպառվելու պատճառով:

Որ մարզի միակ բազմապրոֆիլ հիվանդանոցի ֆինանսավորումն աճել է, առայժմ զգում են անապահովության
«Փարոս» համակարգում գրանցված 30 և բարձր սոցիալական միավոր ունեցող անձինք: Նախկինում էլ այս միավորով նրանք օգտվում էին պետպատվերից, բայց դժվարամատչելի հետազոտություններն անվճար էին 36 և բարձր սոցիալական միավոր ունեցող նպաստառուների համար:

Բժշկական կենտրոնի թերապևտիկ բաժանմունքի վարիչ Լիլիթ Սարգսյանի խոսքով` սոցիալապես անապահովների մի զգալի խումբ տարիներ շարունակ զրկված են եղել համակարգչային տոմոգրաֆիայի և այլ դժվարամատչելի հետազոտություններ անցնելու հնարավորությունից ֆինանսական սղության պատճառով: Հիվանդների անվճարունակության պատճառով տուժել է բուժման որակը, քանի որ լիարժեք ախտորոշում չի կատարվել:

Հիվանդների համար թանկ հետազոտությունների անհասանելիությունը չէր միակ խնդիրը: Հիվանդն  անվճար բուժօգնությունից օգտվելու իրավունք ուներ, բայց հիվանդանոցը հատկացված պետպատվերի սահմանաչափն արդեն սպառել էր:Այս դեպքում առաջարկում էին հիվանդին հերթագրվել ու սպասել մինչև հաջորդ տարվա պետպատվերի հաստատում կամ էլ հիվանդանոցը իր հիվանդներին ուղարկում էր այլ մարզերի հիվանդանոցներ: Նման օրինակներից մեկը նշեց կենտրոնի տնօրեն Արմեն Իսահակյանը՝ հեմոդիալիզ ստացող հիվանդին ստիպված էին ուղարկել այլ հիվանդանոցներ:

Հեմոդիալիզի և սրտի վիրահատությունների համար նախկին տարիներից մինչև հիմա չվճարված 50 մլն դրամը, նաև այլ ծառայությունների գծով թերֆինանսավորումները մնացել են Գյումրի կենտրոնի վրա` որպես պարտք: Տնօրենի խոսքով` ֆինանսավորման պատճառով 6 տարվա մեջ մինչև 35 մլն դրամի են հասել տույժ ու տուգանքները:

Հիվանդանոցի մոտ 100 մլն դրամի հասնող պարտքի փոքր մասն է միայն դեղորայքի և բուժպարագաների մատակարարներին ունեցածը, իսկ մեծ մասը նախկին տարիներից կուտակածն է, նաև հետևանքը 6 տարի առաջ հիվանդանոցների միավորման: Այդ պարտքերը փակելու համար բժշկական կենտրոնի տնօրենը 5 տարով վարկ է վերցրել:

Հիվանդանոցն իր գործունեությունը պարտքով է սկսել, միավորված բոլոր հիվանդանոցների պարտքերն են գումարվել, աշխատողների կես դրույքներն էլ մեկ դրույք են դարձել, այս պարագայում աշխատավարձերը կրկնապատկվել են, բայց պետպատվերի վճարումն ընդամենը 100 մլն դրամով է ավելացել այս ընթացքում, ու սա այն դեպքում, երբ հիվանդանոցն ավելի քան 2 մլրդ դրամի վճարովի ծառայություններ է իրականացրել:

Պետությունը սոցիալապես անապահովների 25 խումբ է սահմանել, որոնց բուժումն անվճար է, այդ կատեգորիայի 7 խմբի համար բուժումը պետությունն այս տարի կֆինանսավորի ոչ թե նվազագույն արժեքով, այլ վճարովիին համարժեք գումարով, իսկ վճարովի ծառայությունների գները չեն փոխվել:

Բայց պետական ֆինանսավորման ավելացումը դարձյալ չի վերացնի հիվանդից թանկարժեք դեղորայք ուզելու պրակտիկան: Տարեկան 500 մլն դրամի վճարովի ծառայություն է մատուցում, սա էլ պետպատվերի ամբողջ ծավալի ավելի քան 62 տոկոսն է: Համարվում է հանրապետությունում լավ ցուցանիշ, թեև ապառիկով բուժվողներ էլ կան:

Հիվանդներն էլ իրենց են պարտք՝ մոտ 20 մլն դրամ ու հիմնականում սրտի վիրահատությունների գումար` նույնիսկ 4 տարի առաջ կատարված: Ժամկետանց պարտքերը հիվանդներից հաճախ հետ են բերում դատարանի միջոցով: