Շիրակի մարզպետի առաջին այցը մարզի գյուղեր

Շիրակի մարզպետն աշխատանքային այցերն է սկսում մարզի համայնքներ: Տիգրան Պետրոսյանն այսօր առաջին այցը կատարել է խոշորացված Սարապատ համայնք, հանդիպել վարչական ղեկավարների, ավագանու անդամների և բնակիչների հետ: Սարապատը, որպես խոշորացված համայնք, մարզում հարկերի հավաքման լավագույն ցուցանիշ չի ապահովել, բայց մարզպետը համոզված է, որ այս համայնքները զարգանալու հնարավորություններ ունեն:

Աշոցքի տարածաշրջանի Սարապատ խոշորացված համայնքը 15 բնակավայր ունի: Փոքր գյուղեր՝ մեծ խնդիրներով, որոնք եթե լուծվել են, ապա մասնակի: Գյուղացիների ակնկալիքը համայնքների խոշորացումից էր, բայց դա էլ խնդիրների արագ լուծման ճանապարհ չէ առայժմ:

Մարզպետի խոսքերով՝ մարզում թռիչքաձև զարգացում ապահովել հնարավոր չէ, քանի որ բյուջեից էլ թռիչքաձև աճ չի սպասվում: Բայց այդ, ինչ հնարավոր է եղել մինչ այժմ պահպանել, պետք է նպատակային օգտագործվի: Սարապատ համայնքում գտնվող, այսպես կոչված, ձորի գյուղերն ընդամենը 40 կմ են հեռու համայնքային կենտրոնից, բայց անբարեկարգ ճանապարհների պատճառով դրանց հետ տրանսպորտային կապ չկա: Այնինչ, այդ գյուղերի միջով հնարավոր է Շիրակի մարզից Լոռու մարզ, նաև Թռչկանի ջրվեժ 2-րդ ճանապարհը բացել, ինչը այլ մարզերի հետ շփումների միջոցով թույլ կտա գյուղերի զարգացումն ապահովել,-համոզված է մարզպետը:

Համայնքի բնակիչներին, սակայն, ավելի շատ հետաքրքրում էր մոտ մեկ ամսից գյուղատնտեսական աշխատանքների կազմակերպումը: Կառավարությունն այս տարի սուբսիդավորմամբ սերմացու, դիզվառելանյութ, պարարտանյութ չի հատկացնում:

Ըստ մարզպետի՝ պատճառը սերմացուների մասով չարաշահումներն էին, որ թույլ էին տվել գյուղապետերը: Որոշ դեպքերում, երբ սերմացուների ծրագիրն արդեն ավարտված էր, նրանք իրենց պահեստավորած անորակ սերմացուներն էին իրացրել, ինչի պատճառով գյուղացիները հայտնվել էին դժվար իրավիճակում:

Հիմա նախարարությունը տարբերակներ է որոնում, թե ինչպես աջակցեն գյուղատնտեսությանը: Մարզպետարանի գյուղատնտեսության վարչության պետ Մովսես Մանուկյանն էլ հավաստեց, որ պետական սուբսիդավորում թեև չկա, բայց ներկրումների շուկայում մենաշնորհների վերացումից հետո մրցակցություն է ստեղծվել և գյուղացին հնարավորություն ունի դիզվառելիքը, սերմացուն ու պարարտանյութը գնել էժանացված գներով, ինչը մոտ է սուբսիդավորման արժեքին:

Հիմա խնդիր է միայն գարնանացան գարու սերմացուն: ՌԴ-ում գների կտրուկ աճի պատճառով գարի չի ներկրվել Հայաստան: Իսկ Աշոցքի գյուղերում ցանքերը գնալով պակասում են ու այլ խնդրով պայմանավորված: Այս տարածաշրջանը հակակարկտային կայաններ չունի, ամեն տարի գյուղացու բերքը դաշտերում կարկտի բաժին է դառնում:

Գյուղերում զարգացում կարող են ապահովել սուբվենցիոն ծրագրերը: Համայնքն ընդամենը 2 ծրագիր է ներկայացրել սուբվենցիոն ֆինանսավորման, հիմնականում ոռոգման և խմելու ջրագծերի նորոգման: Գումարի 65 տոկոսն է համաֆինանսավորելու կառավարությունը: Համայնքում քանի տարի է՝ լուծում չի ստանում նաև արոտավայրերի ջրարբիացման ծրագիրը, որը Աշոցք համայնքի հետ էր կապված: Աշոցքի համաֆինանսավորումն ուշացավ, ինչի պատճառով էլ 2 տարի է՝ ծրագիրը ձգձգվում է նաև մյուս համայնքների համար: Սարապատում նաև ցանկություն ունեն պելետների արտադրություն հիմնել, նաև Քարախաչի քամու ուժն օգտագործել էներգիա ստանալու համար: Գյուղերում տնտեսական զարգացում ու ներդրումներ ապահովող ցանկացած ծրագիր մարզպետարանում պատրաստ են քննարկել ու հնարավորինս աջակցել: Նշված բոլոր ծրագրերն էլ դեռ հիմնականում տեսական են, գործնական փուլերի անցում առայժմ չկա: