Կոլապսներ պետք չեն. կառավարությունն ԻՏՁՄ-ին և «Ձեռնարկությունների ինկուբատոր» հիմնադրամին գումար հատկացրեց

ՀՀ կառավարությունն այսօրվա նիստում որոշում կայացրեց ՀՀ 2019 թվականի պետական բյուջեով նախատեսված «1043 Տեղեկատվական տեխնոլոգիաների ոլորտի խթանում» ծրագրի «Աջակցություն Հայաստանի ՏՏ ոլորտի մրցունակության բարձրացմանը» միջոցառման բյուջետային ծախսերի տնտեսագիտական դասակարգման «Այլ ընթացիկ դրամաշնորհներ» հոդվածով նախատեսված 91¸460.0 հազար դրամ գումարից «Ձեռնարկությունների ինկուբատոր» հիմնադրամին առանց մրցույթի որպես դրամաշնորհ հատկացնել 19,774.0 հազար դրամ, իսկ «Ինֆորմացիոն տեխնոլոգիաների ձեռնարկությունների միությանը»՝ 15,000.0 հազար դրամ:

Կառավարության որոշմամբ՝ ՀՀ 2019 թ. պետական բյուջեով նախատեսված «1043 Տեղեկատվական տեխնոլոգիաների ոլորտի խթանում» ծրագրի «Աջակցություն տեխնոլոգիական կենտրոնների գործունեությանը» միջոցառման բյուջետային ծախսերի տնտեսագիտական դասակարգման «Այլ ընթացիկ դրամաշնորհներ» հոդվածով նախատեսված 149,595,4 հազար դրամը՝ առանց մրցույթի, որպես դրամաշնորհ կհատկացվի «Ձեռնարկությունների ինկուբատոր» հիմնադրամին, իսկ ՀՀ 2019 թվականի պետական բյուջեով նախատեսված «1043 Տեղեկատվական տեխնոլոգիաների ոլորտի խթանում» ծրագրի «2019թ. տեղեկատվական տեխնոլոգիաների համաշխարհային համաժողովի կազմակերպում» միջոցառման բյուջետային ծախսերի տնտեսագիտական դասակարգման «Այլ ընթացիկ դրամաշնորհներ» հոդվածով նախատեսված 1,259,693.0 հազար դրամը՝ առանց մրցույթի որպես դրամաշնորհը՝ «Ինֆորմացիոն տեխնոլոգիաների ձեռնարկությունների միությանը»:

ՀՀ ֆինանսների նախարար Ատոմ Ջանջուղազյանն արձագանքեց, որ իրենք ունեն մտահոգություններ, և դրանք հիմնականում ծրագրի իրականացման եղանակին են վերաբերում: Նա նշեց, որ համաշխարհային համաժողովի հետ կապված մտահոգություն չեն արտահայտել, դա մեկանգամյա մեծամասշտաբ միջոցառում է, իսկ մյուս դեպքում, կարծում են՝ հիմնավորումը պետք է լինի հստակ, նշվի, թե ինչով է գնահատվել այս հարցը որպես բացառիկ, քանի որ ծրագրի իրականացումը դժվար է գնահատել որպես բացառիկ:

«Մյուս կողմից հասկանալի չէ՝ ինչով ենք վստահ, որ մինչև տարեվերջ ունենալու ենք և հստակ իմանալու ենք, որ 2020 թ. կամ ԻՏՁՄ չի լինելու, կամ լինելու է հիմնադրամ, որտեղ պետությունը մասնակցություն չի ունենալու: Պետությունը հիմնադրամի գործունեության առաջին իսկ պահից մասնակցել է, այն ձևական կազմակերպաիրավական տեսակ է եղել, քանի որ կառավարության որոշմամբ է ստեղծվել»,- ասաց նա:

Նախագծի զեկուցող, ՏԿՏՏ նախարար Հակոբ Արշակյանն արձագանքեց.

«Պարոն Ջանջուղազյան, երեք անգամ նույն բանն ասացիք, ասացի, որ համաձայն եմ, պետությունն՝ ի դեմս ֆինանսների նախարարության, արդեն գրություն է գրել, որ դուրս է գալիս իրենց կառավարման խորհրդից, տրանսպորտի նախարարությունը ևս դուրս է գալիս, ծրագիրը հետևյալն է, նախ այս պահին կազմավորման փուլում է, ունի հստակ տեսլական, ճանապարհային քարտեզը կազմավորման փուլում է, ժամանակ ունենանք, կներկայացնեմ կառավարության դատին: Այս բոլոր ծրագրերը նախարարության առաջնահերթության մեջ են մտնում, մենք այն ճանապարհով չենք կարող գնալ, որ այս ծրագրերը դադարեցնենք, մրցութային նոր փաթեթ ստեղծենք, որը մեկ կամ երկու ամիս կտևի, մասնագիտական խորը վերլուծություն է պետք: Այս ծրագրերը չենք ուզում ընդհատել, որ վնաս չհասցնենք, դրանով է պայմանավորված բացառիկությունը»:

ՀՀ փոխվարչապետ Տիգրան Ավինյանն ասաց, որ ծրագրի իրականացման քաղաքական պատասխանատվությունը դրված է հենց ՏԿՏՏ նախարարի վրա և փաստացի կարծում է՝ պետք է առաջնորդվել նաև այս մոտեցմամբ և վստահել Հակոբ Արշակյանին:

«Կոլապսներ պետք չեն, լուծումները որոշակի են և պարզ, այդ լուծումներին պետք է հանդարտ և հանգիստ ռիթմով գնալ»,- ասաց Ավինյանը:

Ջանջուղազյանն ընդգծեց, որ չէր ցանկանա՝ տպավորություն ստեղծվի, թե վստահության պակաս կա:

«Մեր մտահոգությունն ընդամենը մի հարցի հետ է՝ զուգահեռ միավորներո՞վ է կազմակերպվելու ծրագրի իրականացումը, հակառակ դեպքում ստացվում է՝ մենք լուծում ենք խնդիր՝ այս տարի իրականացնել ծրագիր այնպես, ինչպես նախկինում»,- ասաց նախարարը: