Ադրբեջանցի սահմանապահները բացել են Դավիթ Գարեջիի անապատի վանք տանող մուտքը

Հաջորդ կիրակի Վրաստանում նշում են  Քրիստոսի հարության` Զատկի տոնը: Այսօր վրացական  լրատվամիջոցները լուր էին  տարածել, որ արդեն 4-րդ օրն է, ինչ Ադրբեջանի սահմանային ծառայությունները փակել են Դավիթ Գարեջիի վանական համալիր տանող ճանապարհը ուխտավորների և զբոսաշրջիկների համար:

Ըստ տարածված տեղեկությունների` ադրբեջանական կողմը ճանապարհը փակել էր շաբաթ օրը Վրաստանի նախագահ Սալոմե Զուրաբիշվիլիի` վանք այցից հետո: Առաջին անգամ ադրբեջանցի սահմանապահներն արահետ էին սկսել փորել դեպի վանք: Վրացական կողմի ենթադրությամբ` Ադրբեջանը մտադիր է վանքը համարել Կովկասյան Ալբանիայից ժառանգած մշակութային ժառանգություն:

«Հարևան երկրի սահմանապահները արահետների վրա են աշխատում, նախազգուշացնող նշաններ են դնում, ինչին վրաց սահմանապահները հանգիստ նայում են: Նույնքան ճգնաժամային և ավելի վատ վիճակ կլինի, ինչպես 2012 թվականի մայիսին էր, երբ Վրաստանի իշխանությունները վրաց սահմանապահներին հրամայել էին զբոսաշրջիկներին ներս չթողնել: Այն ժամանակ դա արվել էր ադրբեջանցիների պահանջով և վրացական կողմը, մինչև աղմուկ բարձրացնելը, հարևանի պահանջը բավարարել էր: Չնայած հոգևորականները մենաստաններ և վանքեր գնալու հնարավորություն և իրավունք ունեին, իսկ այսօր նույնիսկ մեզ չեն թողնում»,- հայտարարել էր վրացի արքեպիսկոպոս Կիրիոնը:

Վրասատանի ԱԳՆ-ն հաստատել էր լուրը՝ հայտարարելով, որ խնդրի լուծման շուրջ ադրբեջանական կողմի հետ բանակցություններ են ընթանում:

Վրաստանի «Առաջին ալիքին» տված հեռախոսազրույցում վանքի վանականներից մեկի մեկն ասել էր, որ ադրբեջանցի սահմանապահները ներխուժել են վրացական  տարածք՝ այն հայտարարելով իրենց սեփականությունը, թեև երկու պետությունների համար վիճելի այդ տարածքն առ այսօր սահմանագծված չէ:

Վանականի խոսքով` քանի դեռ տարածքների սահմանազատում չի իրականացվել, այն պատկանում  է այն  կողմին, որն այն շահարկում է, տվյալ դեպքում` Վրաստանին:

«Գալիս, մտնում են մեր կողմից օգտագործվող տարածք, փակում են վանքը: Մենք էլ աղերսագին  խնդրում ենք բացել այն ու մեզ  ներս թողնել»,- ասել է վանականը:

Ավելի ուշ հաղորդվեց, որ ադրբեջանցի սահմանապահները բացել են մենաստան տանող մուտքը վրացի զբոսաշրջիկների ու ուխտավորների համար:

Նշենք, որ Դավիթ Գարեջիի մենաստանն աշխարհում միակ վանական համալիրն է, որի միջով անցնում է երկու երկրների, տվյալ դեպքում` Վրաստանի ու Ադրբեջանի պետական սահմանը: Երկու երկրների միջև 1996 թվականից ի վեր սահմանագծված է  ընդհանուր սահմանի միայն 66 տոկոսը: Մնացած 34 տոկոսը ներառում է վերոհիշյալ վանական համալիրը:

Ադրբեջանն իրեն համարում է այդ տարածքներում երբևէ գոյություն ունեցած Կովկասյան Ալբանիայի իրավահաջորդը, մինչդեռ Վրաստանի պատմությունը, սկսած միջնադարից, վանքը հիշատակում է որպես վրացական գործող վանք:

Մյուս վիճելի տարածքը Անդրկովկասի խորհրդայնացման ժամանակ Ադրբեջանին փոխանցված վրացական պատմական Սաինգիլո (Հերեթի) շրջանն է: Հիշեցնենք, որ 2012թ. Ադրբեջանը սահմանապահ զորք էր տեղակայել վանքի երկայնքով` արգելելով վրացի ուխտավորների մուտքը վանք:

Հիշեցնենք, որ մոտ մեկ ամիս առաջ Ադրբեջան կատարած պաշտոնական առաջին այցի շրջանակում Վրաստանի նախագահ Սալոմե Զուրաբիշվիլին առաջարկել էր հնարավորինս արագ ավարտել երկրների միջև ընդհանուր սահմանների վերջնական սահմանագծումը: