Ո՞ր երկրներն են ճանաչել Հայոց ցեղասպանությունը

Օսմանյան կառավարության կողմից իրականացրած Հայոց ցեղասպանության փաստը հիմնավորվել է, ճանաչվել ու հաստատվել է ականատեսների վկայություններով, օրենքներով, բանաձևերով և բազմաթիվ նահանգների ու միջազգային հեղինակավոր կազմակերպությունների որոշումներով:

1915-1923թթ. Օսմանյան կայսրությունում հայ բնակչության զանգվածային կոտորածները որպես նախապես ծրագրավորված ու հետևողականորեն իրագործած ցեղասպանական ակտ որակող փաստաթղթերի ամբողջական շարքը հսկայական է: Երեկ՝ ապրիլի 26-ին, Պորտուգալիայի խորհրդարանը ճանաչեց Հայոց ցեղասպանությունը:

ՀՀ ԱԳ նախարարության կայքում ներկայացված է Հայոց ցեղասպանությունը ճանաչած պետությունների, կազմակերպությունների, նահանգային և ինքնակառավարման մարմինների ու քաղաքային խորհուրդների համառոտ ցանկը:

2019 թվականին

Ապրիլի 12-ին Իսպանիայի Բուրգոս քաղաքի քաղաքային խորհուրդը միաձայն ճանաչել է Հայոց ցեղասպանությունը:
Ապրիլի 10-ին Իտալիայի Պատգամավորների պալատն ընդունեց նախաձեռնություն, որով կոչ է անում Իտալիայի կառավարությանը ճանաչել Հայոց ցեղասպանությունը։
Ապրիլի 10-ին Ֆրանսիայի նախագահ Էմանուել Մակրոնը ստորագրել է ապրիլի 24-ը Հայոց ցեղասպանության հիշատակի ազգային օր ճանաչելու մասին հրամանագիրը։
Մարտի 20-ին ԱՄՆ Ալաբամա նահանգը ճանաչել է Հայոց ցեղասպանությունը: Ալաբաման Հայոց ցեղասպանությունը ճանաչած ԱՄՆ 49-րդ նահանգն է։
Մարտի 18-ին Իտալիայի Լացիո մարզի տարածաշրջանային խորհուրդը հավանության է արժանացրել Հայոց ցեղասպանությունը ճանաչելու մասին նախաձեռնությունը:

2018 թվական

Ապրիլի 25-ին Իսպանիայի Ալկորկոն քաղաքը պաշտոնապես ճանաչել և դատապարտել է Հայոց ցեղասպանությունը
Ապրիլի 24-ին Ուկրաինայի Լուգանսկի մարզի Սվատովեի քաղաքային խորհուրդը ճանաչել է Հայոց ցեղասպանությունը։
Մարտի 23-ին Ժնևում ՄԱԿ-ի Մարդու իրավունքների խորհրդի 37-րդ նստաշրջանում կոնսենսուսով ընդունվել է Հայաստանի նախաձեռնած` Ցեղասպանության կանխարգելման վերաբերյալ բանաձևը («Prevention of genocide»):
Փետրվարի 22-ին Նիդերլանդների Ներկայացուցիչների պալատի կողմից ընդունվել են որոշումներ, որոնք վերահաստատում են դեռևս 2004թ. Հայոց ցեղասպանության ճանաչումը։

2017 թվական

Նոյեմբերի 6-ին ԱՄՆ Ինդիանա նահանգի նահանգապետ Էրիք Հոլքոմբը հայտարարություն է տարածել, որով հիշատակում է, որ Օսմանյան Թուրքիան ծրագրել և իրականացրել է երեք միլիոն հայերի, հույների, ասորիների և սիրիացիների ցեղասպանությունը: Ինդիանան դարձել է Հայոց ցեղասպանությունը ճանաչած ԱՄՆ 48-րդ նահանգը։
Օգոստոսի 24-ին ԱՄՆ Այովայի նահանգապետ Քիմ Ռեյնոլդսը հռչակագիր ստորագրեց Հայոց ցեղասպանության ճանաչման մասին: Այովան դարձավ Հայոց ցեղասպանությունը ճանաչած ԱՄՆ 47-րդ նահանգը։
Հունիսի 9-ին Իսպանիայի Վալենսիա քաղաքի տեղական ինքնակառավարման խորհուրդն ընդունել է Հայոց ցեղասպանությունը ճանաչող և դատապարտող որոշում։
Մայիսի 26-ին ԱՄՆ-ի Հարավային Կարոլինա նահանգի Միրթլ Բիչ քաղաքի խորհուրդը Հայոց ցեղասպանությունը վերահաստատող հռչակագիր է ընդունել, որն ստորագրել է քաղաքապետ Ջոն Ռոդսը:
Մայիսի 19-ին ԱՄՆ Տեխաս նահանգի Ներկայացուցիչների պալատը միաձայն ընդունել է թիվ 191 բանաձևը` ճանաչելով Հայոց ցեղասպանությունը։
Մայիսի 3-ին իսպանական Կույերա քաղաքը միացել է Հայոց ցեղասպանությունը պաշտոնապես ճանաչած և դատապարտած իսպանական քաղաքների ցանկին։
Ապրիլի 28-ին Իսպանիայի Վիյենա քաղաքը պաշտոնապես ճանաչել է Հայոց ցեղասպանությունը։
Ապրիլի 26-ին Չեխիայի խորհրդարանի Պատգամավորների պալատը ընդունել է Հայոց ցեղասպանության և մարդկության դեմ գործած այլ հանցագործությունները ճանաչող և դատապարտող բանաձև։
Ապրիլի 22-ին ԱՄՆ Վայոմինգ նահանգի նահանգապետ Մեթյու Միդն ԱՄՆ Հայ դատի հանձնախմբի արևմտյան թևին ուղղված նամակում ճանաչել է Հայոց ցեղասպանությունը:
Ապրիլի 21-ին իտալական Տոլֆա քաղաքի Խորհուրդը փաստաթուղթ է ընդունել, որով ճանաչել է Օսմանյան կայսրությունում հայերի Ցեղասպանության փաստը:
Փետրվարի 2-ին Հայոց ցեղասպանությունը պաշտոնապես ճանաչել և դատապարտել է Իսպանիայի ինքնավար Վալենսիա համայնքի Տոռենտ քաղաքը:
Հունվարի 26-ին Դանիայի խորհրդարանն ընդունել է Հայոց ցեղասպանության վերաբերյալ բանաձև։
Հունվարի 23-ին Իսպանիայի կատալոնական Սաբադել քաղաքը պաշտոնապես ճանաչել և դատապարտել է Հայոց ցեղասպանությունը:

Ամբողջական ցանկը՝ այստեղ: