Պետական գրանցում են ստացել և բիզնես հիմնել 120 սուբյեկտներ, որոնցից 56-ը` պետական աջակցությամբ

ՀՀ վարչապետ Նիկոլ Փաշինյանը մայիսի 8-ին՝ իր պաշտոնավարման մեկ տարվա առթիվ, հանդիպում է անցկացնում լրագրողների հետ: Նա ներկայացնում է 100 փաստ 1 տարվա պաշտոնավարման ընթացքում իրականացված աշխատանքների ու խնդիրների լուծմանն ուղղված քայլերի մասին: Ներկայացնում ենք բարեփոխումների երրորդ տասնյակը:

Փոքր և միջին, այսպես ասած, խելացի անասնաշենքերի կառուցման ու վերակառուցման դեպքում ծախսերի 50 տոկոսի չափով ետվերադարձ կտրամադրվի: Սահմանամերձ գյուղերում ետվերադարձը կկազմի 70 տոկոս:

Տոհմային խոշոր եղջերավոր կենդանիներ ձեռք բերելու նպատակով տրվում են վարկեր` 2 տոկոսով, գյուղատնտեսական կոոպերատիվներին և սահմանամերձ գյուղերին` 0 տոկոս տոկոսադրույքով:

Ինտենսիվ պտղատու այգիների հիմնման, ոռոգման, արդիական համակարգերի և կարկտապաշտպան ցանցերի ներդրման վարկերը տրամադրվում են 0-2 տոկոս տոկոսադրույքով: Ցածր տոկոսով վարկերի փոխարեն կարելի է օգտվել նաև արված ծախսերի 40-50 տոկոսի ետվերադարձի տարբերակից:

2018 թվականին մթերված պտուղ-բանջարեղենի և խաղողի դիմաց գյուղացիական տնտեսություններին չվճարված գումարը տարեվերջին կազմել է ընդամենը մթերման ընդհանուր արժեքի 0.7 տոկոսը, ի համեմատություն 2017 թվականի, երբ դա եղել է 5.9 տոկոս:

Մարզերում շուրջ 290 սկսնակ ձեռնարկատերերի համար կազմակերպվել են դասընթացներ, ինչի արդյունքում պետական գրանցում են ստացել և բիզնես հիմնել 120 սուբյեկտներ, որից 56-ը պետական միջոցներից ստացել են ֆինանսական աջակցություն: Ֆինանսական կրթության ծրագիրը ներդրվել է հանրապետության 360 դպրոցների 3100 ուսուցիչների ներառմամբ և միաժամանակ հանրապետության բոլոր դպրոցներում ներդրվել է տեխնոլոգիա առարկայի փորձնական ծրագիրը՝ ձեռնարկատիրական կրթության տարրերի ներառմամբ:

Տարածքային համաչափ զարգացման ու սոցիալական վիճակի բարելավման նպատակով կառավարությունը 2018 թվականին համայնքներում իրականացրել է 152 ծրագիր` 3.8 մլրդ դրամ ընդհանուր ծավալով: 2017 թվականին նման ծրագրեր չեն իրականացվել: Կառավարությունը 2019-ին մտադիր է այս ծրագրի համար հատկացնել 10 մլրդ դրամ:

2019 թվականի առաջին եռամսյակում Հայաստանի համայնքների սեփական եկամուտներն աճել են 2 մլրդ դրամով: «Բարձրավոլտ էրեկտրական ցանցերի» շահույթը 2017 թվականին եղել է 1.3 մլրդ դրամ, 2018-ին` 3.3  մլրդ դրամ:

Հայաստանի ծրագրավորողներն այսուհետ կարող են իրենց ստեղծած հավելվածները վաճառել խոշորագույն շուկաներից մեկում` Google play հարթակում, ինչը նախկինում անհնար էր: ՏՏ ոլորտում հարկային արտոնություններից օգտվողների ցանկն ընդլայնվել է, և այժմ հարկային արտոնություն են ստանում էլեկտրոնային համակարգերի արտադրությամբ և համակարգչային անիմացիայով զբաղվող ընկերությունները:

10.5 մլն ԱՄՆ դոլար ֆինանսավորում է ստացել և մեկնարկել «Ինժեներական քաղաք» ծրագիրը: 2018 թվականին ակտիվ գործող  ՏՀՏ ընկերությունների թիվը հասել էր շուրջ 800-ի՝ 2017 թվականի համեմատ ապահովելով 23 տոկոս աճ: 2018 թ. Հայաստանի ծրագրավորման և ծառայությունների ոլորտի շրջանառությունը կազմել է մոտ 730 մլն ԱՄՆ դոլար, համակցված տարեկան աճը կազմել է 28 տոկոս: 2018 թվականին ՏՀՏ ոլորտում զբաղվածների թիվը հասել է 19 հազար 552-ի, ինչի արդյունքում 2017 թվականի համեմատ մոտ 27 տոկոս աճ է արձանագրվել:

Ավելի քան 20 հուշագիր է ստորագրվել նախնական և միջին ուսումնական հաստատությունների և գործատուների միջև, ինչի արդյունքում ԿԳ նախարարության հաստատությունները՝ ուսումնարանները, մասնագետներ են պատրաստում այդ հաստատությունների համար, ներդրվում են նոր մասնագիտություններ, ընկերությունների կողմից տրամադրվում են մասնագիտական սարքեր և լաբորատորիաներ: