«Ուրախ անցավ». Զելենսկու երդմնակալության ելույթի կարևոր դրվագները

Այսօր՝ մայիսի 20-ին, Ուկրաինայի Գերագույն ռադայում տեղի է ունեցել երկրի նորընտիր նախագահ Վլադիմիր Զելենսկու երդմնակալության արարողությունը: Ուկրաինայի 6-րդ նախագահը երդմնակալության ժամանակ ունեցած ելույթի ընթացքում խոսել է իր առաջնահերթությունների մասին, քննադատել երկրում տիրող իրավիճակը, աշխատանքից ազատել կառավարության անդամներին և արձակել խորհրդարանը:

Տնից մինչև Գերագույն ռադա ընկած ճանապարհը Վլադիմիր Զելենսկին նախընտրեց անցնել ոտքով: Խորհրդարանի առջև հավաքված աջակիցներին ողջունելուց հետո Վլադիմիր Զելենսկին մտավ Ռադայի շենք, որտեղ մեկնարկել էր հանդիսավոր նիստը:

Նախ խորհրդարանի նախագահ Անդրեյ Պարուբին ներկայացրեց արարողությանը ներկա Ուկրաինայի նախկին ղեկավարներին, որոնք շարքում էր նաև Պյոտր Պորոշենկոն: Այնուհետև Պարուբին ներկայացրեց օտարերկրյա հյուրերին: Ի դեպ, 50 օտարերկրյա պատվիրակությունների շարքում էր նաև Հայաստանի պատվիրակությունը՝ փոխվարչապետ Տիգրան Ավինյանի գլխավորությամբ:

Այնուհետև բոլոր հյուրերը և խորհրդարանի անդամները ողջունեցին Ուկրաինայի նորընտիր նախագահին, հնչեց երկրի օրհներգը, որից հետո ևս մեկ անգամ հայտարարվեցին նախագահական ընտրությունների պաշտոնական արդյունքները:

Այս ներածական մասի ավարտից հետո Վլադիմիր Զելենսկին Սահմանադրության և Ավետարանի վրա երդվեց հավատարմորեն ծառայել Ուկրաինային:

Այնուհետև որպես հանդիսավոր արարողության մաս՝ Զելենսկուն հանձնեցին պետության ղեկավարի իշխանության պաշտոնական խորհրդանշանները՝ նախագահի նշանը՝ շղթայի տեսքով, զինանշանով կնիքը և գավազանը:

Երդմնակալության արարողակարգային հատվածի ավարտից հետո Վլադիմիր Զելենսկին առաջին անգամ ելույթ ունեցավ Ուկրաինայի 6-րդ նախագահի պաշտոնում:

«Մեզնից յուրաքանչյուրը նախագահ է: Այսօրվանից մեզնից յուրաքանչյուրը պատասխանատվություն է կրում այն Ուկրաինայի համար, որ մենք թողնելու ենք մեր երեխաներին»,- սկսեց Զելենսկին:

Նորընտիր նախագահն աշխարհի բոլոր ուկրաինացիներին հրավիրեց հայրենիք՝ նրանց բոլորին խոստանալով Ուկրաինայի քաղաքացիություն շնորհել: Զելենսկին նաև խոսեց առաջնային անելիքների մասին:

«Մեր առաջնային խնդիրն է Դոնբասում հրադադարի հասնել… Եթե անհրաժեշտ լինի, ես պատրաստ եմ նաև իմ պաշտոնից զրկվել միայն նրա համար, որ խաղաղություն լինի՝ չկորցնելով մեր տարածքները: Պատմությունն անարդար է: Այս պատերազմը մենք չենք սկսել, սակայն մենք պետք է այն ավարտենք: Մենք պատրաստ ենք երկխոսության, սակայն ես վստահ եմ, որ այդ երկխոսությունը սկսելու առաջին քայլը կլինի ուկրաինացի բոլոր գերիների վերադարձը: Մեր հաջորդ կոչն է բոլոր կորցրած տարածքների վերադարձը: Կարծում եմ՝ այս ձևակերպումն այնքան էլ ճիշտ չէ, քանի որ հնարավոր չէ կորցնել այն, ինչն օրենքով մերն է: Ե՛վ Ղրիմը, և՛ Դոնբասը մերն են», – ասաց Զելենսկին:

Ներկաները Վլադիմիր Զելենսկու այս խոսքերը մեծ ոգևորությամբ և ծափահարություններով ընդունեցին: Ի դեպ, իր խոսքում մեկ-երկու նախադասություն Զելենսկին արտաբերեց ռուսերեն, ինչի համար նկատողություն ստացավ Ռադայի պատգամավոր Օլեգ Լյաշկոյի կողմից:

«Ինչպե՞ս: Նրանք հասկանում են ուկրաիներե՞նը: Շնորհակալություն, որ շարունակում եք բաժանել մարդկանց, պրն. Լյաշկո», – պատգամավորների խոսքերին արձագանքեց նորընտիր նախագահը:

Այնուհետև Զելենսկին քննադատեց բժշկությունը, ճանապարհների վիճակը, որից հետո դիմեց կառավարությանը:

«Ես հասկանում եմ, որ մեր կառավարությունն անընդհատ ձեռքերը թափ է տալիս և ասում, որ ոչինչ չի կարող անել: Կարող եք: Դուք կարող եք վերցնել թուղթ և գրիչ և ձեր տեղը զիջել նրանց, ովքեր կմտածեն հետագա սերունդների մասին, ոչ թե հաջորդ ընտրությունների», – ասաց Զելենսկին:

Զելենսկին նաև խնդրեց բոլոր պաշտոնյաներին, որ նրանց աշխատասենյակներում կախեն ոչ թե իր նկարը, այլ իրենց երեխաների նկարները, և յուրաքանչյուր որոշում ընդունելուց առաջ նայեն նրանց աչքերին: Զելենսկին նաև հայտարարեց խորհրդարանի արձակման մասին:

«Ես ձեզ խնդրում եմ ընդունել պատգամավորական անձեռնմխելիությունը չեղարկելու մասին օրենք, անօրինական ճանապարհով հարստանալու համար քրեական պատասխանատվության մասին օրենք… Աշխատանքից ազատե՛ք Ուկրաինայի անվտանգության ծառայության ղեկավարին, գլխավոր դատախազին և պաշտպանության նախարարին: Դրա համար դուք ունեք 2 ամիս: Արե՛ք այդ ամենը և ինքներդ ձեզ մեդա՛լ շնորհեք: Դրանք ձեզ միավորներ կբերեն արտահերթ խորհրդարանական ընտրությունների ժամանակ: Ես արձակում եմ 8-րդ գումարման խորհրդարանը»:

Վլադիմիր Զելենսկին իր խոսքը եզրափակեց հետևյալ խոսքերով.

«Սիրելի՛ ժողովուրդ, իմ կյանքի ընթացքում ես փորձում էի անել ամեն ինչ, որ ուկրաինացիները ժպտան: Առաջիկա 5 տարիներին ես կանեմ ամեն ինչ, որ ուկրաինացիները չլացեն»:

Զելենսկու ելույթից ոչ պակաս քննարկման առարկա են դարձել Գերագույն ռադայի նախագահ Անդրեյ Պարուբիի խոսքերը: Նա, եզրափակելով, ասաց՝ «շնորհակալություն, ուրախ անցավ»:

https://www.facebook.com/ntvofficial/videos/623932834748329/