Հանդիսավոր ընդունելություն, փոխադարձ վիրավորանքներ, սկանդալային հայտարարություններ. Թրամփի եռօրյա այցի առաջին օրը Լոնդոնում

ԱՄՆ նախագահ Դոնալդ Թրամփը և առաջին տիկին Մելանյա Թրամփը եռօրյա պետական այցով գտնվում են Մեծ Բրիտանիայում: Սա ԱՄՆ նախագահ Դոնալդ Թրամփի առաջին պետական այցն է Մեծ Բրիտանիա, չնայած նախագահ ընտրվելուց հետո Թրամփն արդեն պաշտոնական այցով եղել էր Լոնդոնում:

Այսօր ԱՄՆ-ի նախագահին և առաջին տիկնոջը հանդիսավոր ընդունելության են արժանացրել Մեծ Բրիտանիայի թագուհին և արքայական ընտանիքի անդամները: Հյուրերի պատվին 41 հրանոթով 2 համազարկ է տրվել: Այնուհետև հնչել են երկու պետությունների օրհներգերը, որից հետո Թրամփն ուսումնասիրել է պատվո պահակախմբի զինվորներին:

Ի դեպ, անցյալ տարի Վինձորի ամրոցում Թրամփը, պահակախմբի զինվորներին ուսումնասիրելով, առաջ էր անցել թագուհուց, ինչը քննադատությունների մեծ տեղիք էր տվել: Այս տարի Թրամփին հնարավորություն է ընձեռվել բոլոր զինվորներին առանձին մոտենալու:

Ողջույնի հանդիսավոր արարողությունից հետո արքայական ընտանիքի անդամներն իրենց հյուրերի համար հատուկ ճաշ են մատուցել:

Լոնդոն այցի երկրորդ օրը նույնպես Թրամփին տարբեր հանդիպումներ են սպասվում, գուցե, ոչ այսչափ հանդիսավոր: Հունիսի 4-ին ԱՄՆ նախագահը Մեծ Բրիտանիայի վարչապետ Թերեզա Մեյի հետ պաշտոնական նախաճաշի կմասնակցի, որից հետո կողմերը բանակցությունները կշարունակեն վարչապետի նստավայրում: Բանակցություններին կհաջորդի Դոնալդ Թրամփի և Թերեզա Մեյի համատեղ մամուլի ասուլիսը:

Հունիսի 5-ին Դոնալդ Թրամփը, Մեծ Բրիտանիայի թագուհին և արքայազն Չարլզը կմասնակցեն Երկրորդ ճակատի բացման 75-ամյակին նվիրված միջոցառմանը: Միջոցառումից հետո ԱՄՆ նախագահը կմեկնի Իռլանդիա, որտեղ կհանդիպի այդ երկրի վարչապետ Լեո Վարադկարի հետ: Այս հանդիպումից հետո Դոնալդ Թրամփը կմեկնի Հյուսիսային Իռլանդիայում գտնվող իր հյուրանոց և գոլֆի հանգստավայր:

Դոնալդ Թրամփի այցի շուրջ արդեն բավականին մեծ աղմուկ է ստեղծվել: Պատճառն այն մեկնաբանություններն են, որոնք Թրամփը կատարել է իրեն հյուրընկալող երկրի հասցեին: Լոնդոն վայրէջք կատարելուց րոպեներ առաջ ԱՄՆ նախագահը Թվիթերյան գրառմամբ քննադատել է Լոնդոնի քաղաքապետին՝ նրան անվանելով անհոգի ձախողակ:

«Սադիք Խանը, ով, անկասկած, շատ վատ գործ է արել Լոնդոնի քաղաքապետի պաշտոնում, հիմարաբար «նողկալի» է արտահայտվել Միացյալ Նահանգների՝ Միացյալ Թագավորության ամենակարևոր դաշնակցի նախագահի հասցեին: Նա անհոգի ձախողակ է, ով պետք է կենտրոնանա Լոնդոնում հանցագործությունների վրա, ոչ թե իմ», – գրել է Թրամփը:

.@SadiqKhan, who by all accounts has done a terrible job as Mayor of London, has been foolishly “nasty” to the visiting President of the United States, by far the most important ally of the United Kingdom. He is a stone cold loser who should focus on crime in London, not me……

— Donald J. Trump (@realDonaldTrump) June 3, 2019

Թրամփի գրառումից շատ չանցած՝ Լոնդոնի քաղաքապետի խոսնակը հայտարարություն է տարածել՝ նշելով, որ սա շատ ավելի լուրջ է, քան մանկական վիրավորանքները, և ԱՄՆ-ի նախագահը չպետք է այդքան իջներ:

Դոնալդ Թրամփի վրդովմունքի պատճառը, հավանաբար, եղել է այն, որ իր այցի նախօրեին Սադիք Խանը բրիտանական The Observer պարբերականում հոդված էր հրապարակել՝ Թրամփին անվանելով «համաշխարհային սպառնալիք»: Սադիք խանը քննադատել էր նաև այն, որ Թրամփը փորձում է միջամտել Մեծ Բրիտանիայի ներքին գործերին:

Թրամփն, իսկապես, Լոնդոն մեկնելուց առաջ մի քանի խորհուրդ էր տվել իրեն հյուրընկալող երկրին: Նա Բրիտանիայի իշխանություններին կոչ էր արել ԵՄ-ն լքել առանց համաձայնագրի: The Sun պարբերականին տված հարցազրույցում էլ Թրամփը հայտնել էր, որ պահպանողական կուսակցության ղեկավարի և Մեծ Բրիտանիայի վարչապետի պաշտոնում տեսնում է այդ երկրի նախկին արտգործնախարար Բորիս Ջոնսոնին:

«Կարծում եմ՝ Բորիսը շատ լավ գործ կաներ: Նա հրաշալի կլիներ այդ պաշտոնում»,- հայտարարել է Թրամփը:

Հունիսի 7-ից Մեծ Բրիտանիայի վարչապետի պաշտոնը թափուր կմնա, քանի որ գործող վարչապետ Թերեզա Մեյը հայտնել է պաշտոնից հեռանալու մասին:

Թրամփի այցից առաջ սկանդալ է ստեղծվել նաև Մեգան Մարքլի անվան շուրջ:

Երբ Թրամփին պատմել են, որ Մեգան Մարքլն իր հասցեին քննադատական մեկնաբանություններ է արել, նա զարմացել է՝ ասելով, թե «չգիտեր, որ Մեգան Մարքլն այդքան չար է իր նկատմամբ»: Հետագայում Թրամփը լրատվամիջոցների տարածած այդ տեղեկություններն անվանել է «կեղծ լուրեր»: Ամեն դեպքում, Սասեքսի դքսուհին շաբաթներ առաջ է երեխա լույս աշխարհ բերել և այդ հարգելի պատճառաբանությամբ չի հանդիպի ԱՄՆ նախագահին:

Ի դեպ, ԱՄՆ նախագահի անվտանգությունն ապահովելու համար ծախսվել է ավելի քան 18 մլն ֆունտ սթեռլինգ: