Շիրակի մարզի 2 գյուղերում հունիսի 9-ին գյուղապետի ընտրութուններ կկայանան

Հունիսի 9-ին Հանրապետության մի շարք համայնքներում տեղական ինքնակառավարման մարմինների ընտրություններ կանցկացվեն: Շիրակի մարզի 2 գյուղերում՝ Անուշավանում և Սպանդարյանում, գյուղապետ են ընտրելու: Երկու գյուղերում էլ գործող գյուղապետերը մրցակիցներ ունեն: Եթե մի քանի տարի առաջ գյուղապետերը, այսպես ասած, արհեստական թեկնածուներ էին առաջադրում, որպեսզի ընտրությունները կայանային, ապա հիմա համայնքի ղեկավարի պաշտոնը դարձել է պահանջված ու գրավիչ: Գործող ու երկարամյա գյուղապետերի հետ պայքարի մեջ են մտել երիտասարդ թեկնածուներ: Առանց քարոզարշավի, բայց թաքնված ներքին լարվածությամբ՝ այսպիսին է պայքարը Արթիկի տարածաշրջանի Անուշավան գյուղի գյուղապետի պաշտոնի համար:

Երկու թեկնածու է առաջադրվել, ամեն մեկն իր համախոհներն ունի: Նրանք գյուղի առանձին հատվածներում են հավաքվում, իրենց թեկնածուի հետ են հանդիպում, հաշվարկ անում, թե ում կողմնակիցներն են ավելի շատ: 18 տարի Անուշավանում համայնքի ղեկավարը չի փոխվել:

«5 անգամ ընտրվել ու վերընտրվել եմ, սա 6-րդն է: Մրցակցային ընտրություններ 2011-ին են եղել: 964 ձայն եմ հավաքել, մյուս թեկնածուն՝ 96 ձայն: Իսկ 2015-ի ընտրություններում մրցակից չեմ ունեցել, մենակ եմ մնացել և, բնականաբար, վերընտրվել եմ: Հիմա կա ներքին լարվածություն: Եթե գյուղացին կգնահատի, կցանկանա, որ նորից ղեկավարեմ, ապա կարող եմ շարունակել գործս, իսկ եթե ոչ, ուրեմն դրանով կհամարենք, որ ամեն ինչ ավարտված է»,- SHANTNEWS-ին ասել է Անուշավանի գյուղապետի թեկնածու Երվանդ Հակոբյանը:

Այս անգամ ընտրությունները մրցակցային են: Գործող գյուղապետի հետ պայքարի մեջ է մտել գյուղի երիտասարդության ներկայացուցիչը: Համբարձում Ալեքսանյանը երկարամյա գյուղապետի հետ մրցակցելը հեշտ բան չի համարում: Ինքը իր գաղափարներն է ներկայացնում, գործողը՝ արած աշխատանքները:

«Անհավասար մրցակցային պայմաններում ի սկզբանե կարող եմ ասել, որ յուրաքանչյուր նոր թեկնածու հայտնվում է, որովհետև գործողը, բնականաբար, ունի լծակներ ու, բնականաբար, անկախ իր կամքից, այդ ամեն ինչը գործադրվում է»,- SHANTNEWS-ի հետ զրույցում ասել է Անուշավանի գյուղապետի թեկնածու Համբարձում Ալեքսանյանը:

Համբարձում Ալեքսանյանին գյուղում ճանաչում են, որպես 2018-ի հեղափոխության ակտիվ մասնակից:

Հարևան Սպանդարյանի գյուղապետի թեկնածուներից մեկն էլ է այդ օրերին ճանապարհ փակել ու պայքարողների շարքերում եղել: Սայադ Ալմաստյանը նաև գյուղի ավագանու անդամ է: Խոստովանում է` գյուղի ավագանին շատ հարցերում միահամուռ չէր: Այն, ինչ որպես ավագանի չի կարողացել անել, որոշել է գյուղապետի պաշտոնում իրագործել:

«Համայնքի բնակիչների ճնշող մեծամասնությունը ուներ ցանկություն, որ ես առաջադրվեի: Տեսել են իմ ակտիվությունը, որպես ավագանի, նաև ընդդիմադիր ուժերի հետ: Լինելով ավագանի` տեսել եմ գյուղում ընթացիկ աշխատանքները, բյուջեի պարունակությունը և որոշեցի առաջադրվել»,- SHANTNEWS-ին ասել է Սպանդարյանի գյուղապետի թեկնածու Սայադ Ալմաստյանը:

Առաջադրվել է նաև Սպանդարյանի գործող գյուղապետ Ավետիք Մխիթարյանը: Նա 2015-ին է ընտրվել: Երկրորդ անգամ է առաջադրվել գյուղապետի պաշտոնում: Գյուղերում ընտրություններն ավանդաբար ազգություններով են, իսկ գործող գյուղապետի ազգությունը Սպանդարյանում ամենամեծն է, թեև, գյուղացիներն են նշում, որ իրավիճակ է փոխվել, ու հիմա սա որոշիչ չէ :

«Ընտրությունները երբվեք հանդարտ չեն եղել: Ընտրությունն ունի իր պայմանները, իր պայքարի ձևերը: Մեկը կատարում է մաքուր պայքար, մյուսը կարատում է պայքար՝ ուրիշի անունը տալով, որ ձայներ բերի: Ժողովուրդը պետք է որոշի, թե ում ընտրել»,- SHANTNEWS-ի հետ զրույցում ասել է Սպանդարյանի գյուղապետի թեկնածու Ավետիք Մխիթարյանը:

Գյուղացու ընտրությունը երկու գյուղերում էլ մեծ չէ: Երկուական թեկնածուներից որևէ մեկին նախընտրություն տալը պայմանականորեն անվանել են ընտրություն հնի ու նորի միջև: