Մի գյուղում մի թեկնածու մեկ ձայն է ստացել. ուշագրավ փաստեր անցած ՏԻՄ ընտրություններից

Երեկ հանրապետության 23 համայնքում կայացել են ՏԻՄ ընտրություններ, դրանցից 9-ում ընտրությունները արտահերթ էին` 12-ում ընտրել են համայնքի ղեկավար, 8-ում` ավագանի, իսկ 3-ում` և´ համայնքի ղեկավար, և´ ավագանի: Այս նյութում փորձել ենք ամփոփել անցած ընտրությունների առավել ուշագրավ փաստերը:

Գյուղական ընտրություններն ամենաքիչ քաղաքականացվածն են: Համենայնդեպս, թեկնածուների ցուցակներից այդպես է երևում: Համայնքի ղեկավարի համար պայքարել է 43 թեկնածու, ավագանու անդամի համար՝ 97:  Երկուսը միասին 140, որոնցից  ընդամենը 12-ն է քաղաքական ուժ ներկայացնում, մնացած 128-ն անկուսակցական է:

Համայնքապետի աթոռի համար 3 հոգի ՔՊ-ից է պայքարել,  1-ը՝  ԲՀԿ-ից,  մեկն էլ  ՀՅԴ-ից: 3 ՔՊ-ականներից մեկն է հաղթել:  Աբովյանից բացի, ՔՊ-ական թեկնածուն պարտվել է Շենավանում: Համայնքի ղեկավարի ժամանակավոր պաշտոնակատարին այստեղ գյուղի դպրոցի անկուսակցական ֆիզկուլտուրայի ուսուցիչն է հաղթել:

Հաղթել են նաև ԲՀԿ-ի և ՀՅԴ-ի մեկական թեկնածուները, ընդ որում՝ դաշնակցականն իր գյուղում գյուղապետի միակ թեկնածուն է եղել: Միակ թեկնածուի դեպքն էլ է միակը այս ընտրություններում: Մյուս բոլոր տեղերում թեկնածուներն առնվազն երկուսն են եղել, իսկ Գեղարքունիքի Գեղհովիտում` նույնիսկ 6-ը:

Շատ ու քիչ թեկնածուները, սակայն, եղանակ չեն ստեղծել, եթե պայքարողների թվում գործող համայնքապետն է եղել: Բոլոր գործողները հաղթել են. ստացվում է` հներին շատ են սիրում: Մի տեղում գյուղապետն ատամնաբույժին է հաղթել, մյուս տեղում էլ, օրինակ` խանութի վաճառողուհուն:

Ընդհանրապես, ցուցակներում թեկնածուների շատ հետաքրքիր մասնագիտություններ կան` գրադարանավարուհի, մանկապարտեզի դաստիարակ, գազալցակայանի լիցքավորող, հսկիչ, բանվոր, մեքենավար, տնտեսվար, դպրոցի պահակ ու անգամ գիշերային պահակ: Մյուսները ու մեծ մասն իրենց մասնագիտության կամ աշխատանքի մասին չեն նշել:

Մասնակցության մասին

23 համայնքների մոտ 73 300 ընտրողներից քվեարկությանը մասնակցել է շուրջ 32 500-ը, այսինքն` կեսից պակաս: Սա մոտ 44 տոկոս է: Ամենաակտիվը եղել է Սյունիքի մարզի Գորայք համայնքը, որտեղ և´ գյուղապետ, և´ ավագանի են ընտրել: Այստեղ մասնակցությունը հասել է 76 տոկոսի:

Իսկ ամենապասիվը Շիրակի մարզի Հայկավան գյուղի բնակիչներն են եղել: 16 տոկոսն է գնացել քվեարկության: Արագածոտնի Սորիկ գյուղում էլ 18 մարդ է գնացել ընտրության: 18 մարդը 19 տոկոս է կազմել: 18 հոգով 5 հոգանոց ավագանի են ընտրել: Թեկնածուներն էլ են 5-ը եղել, ճիշտ այնքան, որքան տեղ կար ավագանիում: Այս դեպքում կարելի էր ավագանի ընտրվել 3 ու նույնիսկ 2 ձայնով:

Թեկնածուին էլ հանած` կմնա ընդամենը մեկ հոգու ձայն ավագանի դառնալու համար: 3 հոգին հենց այդպես էլ արել են, կարիք չի եղել նույնիսկ բոլոր տանեցիներին տանել քվեարկության: Բայց սա էլ ամենաուշագրավը չէ:

Մի գյուղում ավագանու մի թեկնածու մեկ ձայն է ստացել: Դպրոցի պահակն է եղել: Թե ինքն է իրեն ընտրել կամ էլ ամբողջ օրը աշխատավայրում է եղել, թե չէ երկու ձայն կլիներ: