Ռուսաստանը եղել է, կա և կլինի Հայաստանի կողքին. ՌԴ դեսպան

ՀՀ-ում ՌԴ արտակարգ և լիազոր դեսպան Սերգեյ Կոպիրկինի ասուլիսները վեց ամիսը մեկ անգամ են հրավիրվում: Հենց այդ վեցամսյա ժամանակաշրջանի իրադարձություններն էլ ամփոփեց Կոպիրկինը: Տնտեսական ցուցանիշներից բացի, դեսպանը անդրադարձավ երկու երկրների միջև նույն դինամիկայով աճող քաղաքական փոխգործակցությանը: Ասուլիսի ներածական մասը ավարտվեց  դեսպանի հետևյալ խոսքերով:  

  «Ռուսաստանը եղել է, կա և կլինի Հայաստանի կողքին»,- նշեց Սերգեյ Կոպիրկինը:

Սերգեյ Կոպիրկինին ուղղված հենց առաջին հարցը դեսպանի այս խոսքին այնքան էլ համահունչ չստացվեց: Հարցը անցած տարեվերջին ռուս զինծառայողի կողմից Գյումրիում կատարված դաժան սպանության, ապա վերջերս Ռուսաստանում աղմուկ հանած սպանության և այդ գործում շրջանառվող հայկական անունների մասին էր: Դեսպանը համոզված է, որ և՛ Ռուսաստանի, և՛ Հայաստանի իշխանությունները շատ զգայուն են նման հարցերում և ամեն ինչ անում են, որ իրավիճակը չքաղաքականացվի:

«Ոմանք փորձում են այսպիսի ողբերգություններին քաղաքական երանգներ տալ, բայց ես կրկնում եմ՝ մեր երկու երկրների ղեկավարությունների դիրքորոշումը այս հարցերում շատ հստակ է»,- ասաց դեսպանը:

Հաջորդ հարցն արդեն Արցախի թեմայով էր: Սահմանին նորից որոշակի ակտիվացում է նկատվում, արդյո՞ք Ռուսաստանը ունի  գործուն մեխանիզմներ  հնարավոր էսկալացիան  զսպելու համար:

«Ռուսաստանի դերին պետք է  հավասարակշռված մոտեցում ունենալ: Ռուսաստանը, անշուշտ, կարևոր դերակատարում ունի, Ռուսաստանը ակտիվ է, բայց, իհարկե, չի կարող փոխարինել կողմերին: Մեր խնդիրն աջակցելն է: Բոլոր մեխանիզմները, որ մենք ունենք, օգտագործում ենք ամբողջ ծավալով, բայց ասել, որ ամեն ինչ կախված է Ռուսաստանից, երևի այնքան էլ ճիշտ չէ»,- պարզաբանեց Կոպիրկինը:  

Իսկ ինչպես է ռուսական կողմը վերաբերվում այս օրերին Նախիջևանում ընթացող թուրք-ադրբեջանական զորավարժություններին: Դեսպանը հարցը վերահասցեավորեց դեսպանության ռազմական կցորդին: Արդյո՞ք այս զորավարժությունները հեռահար նպատակներ ու սպառնալիքներ չունեն:

«Ոչ մի սպառնալիք ներկայումս այդ զորավարժությունները չեն ներկայացնում: Դրանք պլանային են: Նպատակների ու խնդիրների մասին հայտարարվել է: Մենք հետևում ենք այդ զորավարժություններին, ավելացնեմ, նաև հետևում է մեր 102-րդ ռազմաբազան»,- նշեց ՌԴ դեսպանատան ռազմական կցորդ Անդրեյ Գրիշչուկը:   

Հարցերի մի խումբն էլ տնտեսական հարաբերություններին էր առնչվում, ավելի ճիշտ, տնտեսական հարաբերությունների քաղաքականությանը: Օրինակ` հնարավո՞ր է արդյոք գազի գինը չթանկացնել: Կառավարությունում ասում են, թե բանակցությունները շարունակվում են, իսկ բնակչության շրջանում ընկալումներն այնպիսին են, որ ի վերջո գազը թանկանալու է:  Դեսպանը SHANTNEWS.am -ի հարցին պատասխանեց:

«Այստեղ և՛ տարիֆների, և՛ գնի, և՛ ներդրումների հարցերն են քննարկվում: Մեծ ներդրումներ են լինելու: Որքան ինձ հայտնի է, բանակցությունները շուտով կավարտվեն: Քանի դեռ չեն ավարտվել, ավելին ասել դժվար է: 

Դեսպանն անդրադարձավ նաև Իրան-ԵԱՏՄ ազատ առևտրի մասին համաձայնագրի վավերացմանը` կարծիք հայտնելով, թե Իրանի նկատմամբ պատժամիջոցները չեն կարող փակել համագործակցության բոլոր ճանապարհները: