Գյումրի այցելող զբոսաշրջիկների թիվն ավելացել է

Գյումրին զբոսաշրջային ռեսուրս է՝ չիրացված հնարավորություններով: Այս կարծիքն են այսօր հայտնել տուրիզմի մասնագետները, որոնք քննարկել են, թե ինչն է խանգարում Գյումրին զբոսաշրջային հետաքրքիր ուղղություն դարձնելուն: Ենթակառուցվածքների բացակայությունը հիմնական պատճառն է, որը Գյումրիի զբոսաշրջային պոտենցիալն անհասանելի է դարձնում: Տուրիզմի մասնագետները խոսել են այն մասին, որ Շիրակ օդանավակայանը ամբողջ հզորությամբ վերագործարկելու մասին խոսակցությունները գործի չեն վերածվում, իսկ Երևան-Գյումրի արագընթաց գնացքի  չվերթի ժամերը հարմար չեն զբոսաշրջիկներին մայրաքաղաքից Գյումրի և հակառակ ուղղությամբ տեղափոխելու համար:

«Արագընթաց գնացքի ժամերը շատ անհարմար են: Այս մասին միշտ խոսում ենք, բայց ոչ մի քայլ չի ձեռնարկվում: Երկաթուղային կայարանի սանհանգույցները շատ վատ վիճակում են: Մենք մեր տուրիստներից ներողություն ենք խնդրում, բայց ասում ենք, որ սա միակ սանհանգույցն է, որից կարող են կայարանի տարածքում օգտվել: Ես զբոսաշրջության մեջ աշխատում եմ 1983 թվականից: Տեսել եմ շատ-շատ զբոսաշրջիկների և հարցրել եմ իրենց հետաքրքրությունների մասին: Դրանք շատ տարբեր են  և, ցավոք սրտի, մենք այդ հետաքրքրությունը չենք կարող բավարարել»,- ասել է «Տիգրան Տուր» տուրիստական ընկերության տնօրեն Լևոն Մարտիրոսյանը:

Միևնույն ժամանակ, տուրիզմի մասնագետներն այն կարծիքին են, որ զբոսաշրջության զարգացման լավ մտքերին անգամ ենթակառուցվածքների բացակայությունը չի կարող խանգարել:

«Մենք նման ենք Գեղարքունիքի մարզի այն բնակիչներին, որոնք չեն տեսնում Սևանա լիճը: Մենք էլ չենք տեսնում Արագած սարը: Արագածը քիչ է ներկայացված կամ ներկայացված չէ մեր տուրիստական ուղղություններում: Խնդրում եմ ուշադրություն հրավիրեք այդ ուղղությամբ: Գյումրին հանրաճանաչ է իր գաստրոնոմիայով: Ունենք  քյալլա, որը ոչ մի տեղ չկա, ունենք այլ ճաշատեսակներ, որը մենակ մենք ունենք: Պետք է զարգացնել նաև այդ ուղղությունը»,- ասել է ինտեգրված գյուղական զբոսաշրջության զարգացման ծրագրի համակարգող Արման Վալեսյանը:

Այդուհանդերձ, զբոսաշրջիկների թվի աճ Շիրակի մարզում կա: Շիրակի մարզպետարանի զարգացման ծրագրերի , զբոսաշրջության և վերլուծության բաժնի պետը ներկայացրել է վերջին 3 տարիների վիճակագրությունը:

«Ունենք դրական տեղաշարժ և այդ դրական տեղաշարժը 2-3% չէ, այլ ավելի մեծ է՝ 12-13%: Եթե 3 տարիների համեմատականով նայենք, ապա տեսնում ենք, որ ամեն տարի 10-12% աճ ունենք»,- նշել է Շիրակի մարզպետարանի զարգացման ծրագրերի, զբոսաշրջության և վերլուծության բաժնի պետ Կարեն Բադիշյանը:

Տուրիզմի մասնագետները կարևորել են նոր մտահղացումների և մոտեցումների ներդրումը Շիրակի մարզի զբոսաշրջության զարգացման ոլորտում: Այդ նպատակով նաև Գյումրիի Կումայրի պատմական միջուկի փողոցներն են վերականգնվում: