Հույս ունեմ, որ իշխանությունները չեն փորձի 85-ամյա բուհը կործանել. ՇՊՀ դասախոս

Շիրակի պետական համալսարանը կարող է լուծարվել կամ միավորվել: Այսպիսի հայտարարություն է արել երեկ կրթության և գիտության նախարար Արայիկ Հարությունյանը Ազգային ժողովի հանձնաժողովների միացյալ նիստում: Իսկ նման հայտարարության համար, ըստ նախարարի, հիմք է հանդիսացել, բուհի բարոյահոգեբանական մթնոլորտը, բուհում հակադիր խմբերի գոյությունը , որոնք անառողջ մթնոլորտ են ստեղծել:

Հիշեցնենք, որ մեկ տարուց ավելի է՝ բուհում լարված իրավիճակ է: Նախ մի քանի դասախոսներ էին չարաշահումների ու ապօրինությունների մասին բարձրաձայնում, որին հաջորդեց նախկին ռեկտորի հրաժարականը: Բայց սրանից հետո էլ կրքերը Շիրակի պետական համալսարանում չհանդարտվեցին: Ձևավորված հոգաբարձուների խորհուրդը  2 անգամ չընտրեց ռեկտոր: Կրթության ու գիտության նախարարի հայտարարությանն արձագանքելու համար Շիրակի պետական համալսարանում այսօր գիտական խորհրդի նիստ է անցկացվել:

Նախարարի հայտարարութունը Շիրակի պետական համալսարանի դասախոսները տարբեր կերպ են ընկալել՝ հնարավոր միավորումը կամ լուծարումը ակնարկ է, սպառնալիք, թե ռեալ ծրագիր, թե սթափության կոչ: Համենայնդեպս, դասախոսների համոզմամբ, հայտարարությունը իրականություն դառնալուց շատ հեռու չէ:

«Եթե սթափության կոչ լիներ, ես մտածում եմ, որ նույն նախարարությունը հակված կլիներ, որ երկու անգամ անցկացված ռեկտորի ընտրությունների արդյունքում ունենայինք ռեկտոր: Սթափության կոչը դա կլիներ, այլ ոչ այն, որ կառավարությունն աներ ամեն ինչ  ռեկտորի ընտրությունները տապալելու համար: Հույս ունեմ, որ իշխանությունները չեն փորձի 85-ամյա բուհը կործանել, իրենց նեղ անձնական, թիմային շահերը առաջ տանելու համար»,- SHANTNEWS-ին ասել է ՇՊՀ դասախոս Գագիկ Համբարյանը:

Ըստ նրա` Կրթության, գիտության, մշակույթի և սպորտի նախարարության աջակցությունը բուհին միայն ռեկտորի ժամանակավոր պաշտոնակատարի նշանակումն է եղել անցած տարի: Ռեկտորի ժամանակավոր պաշտոնակատար Երվանդ Սերոբյանը Արայիկ Հարությունյանի հայտարարությունը այլ կերպ է մեկնաբանում.

«Կոչը դասախոսների մի մասի կողմից սպառնալիք է ընկալվում, ես չեմ ընկալում որպես սպառնալիք: Նախարարը թվարկել է ուղիները, որոնք հնարավոր են, եթե, իհարկե չենք գտնի մեր ներքին պրոբլեմը: Այդ պրոբլեմներից է երկու անգամ ռեկտոր չընտրելը»,- SHANTNEWS-ին ասել է ՇՊՀ ռեկտորի ժամանակավոր պաշտոնակատար Երվանդ Սերոբյանը:

Ռեկտոր չընտրելը, բուհում անառողջ բարոյահոգեբանական մթնոլորտը, այս ամենը, դասախոսներն էլ չեն ժխտում, որ ազդել է իրենց աշխատանքի վրա: Բայց և սրանք չեն համարում այն խնդիրները, որոնք կարող են բուհի լուծարմանը հանգեցնել: Կրթության ու գիտության նախարարությունից, քննադատությունից բացի, աջակցություն են ակնկալում:

Բուհի լուծարման կամ միավորման հարցում արդեն Շիրակի պետական համալսարանում տարակարծություն ու խմբավորումներ չկային: Լուծարմանը ոչ ոք կողմ չէ: Իսկ այն, որ դասախոսները խմբերի են բաժանված, սա էլ չեն թաքցնում: Տարակարծություններ շատ հարցերի շուրջ ունեն: Այս իրավիճակը ստեղծվել է անցած տարի ու դեռ շարունակվում է: Ոչ միայն Շիրակի պետական համալսարանի, այլ Գյումրիում գործող բոլոր բուհերի մասնաճյուղերի միավորման գաղափար վաղուց կար: Այդ ժամանակ սակայն խոսքը Շիրակի պետական համալսարանի շուրջ միավորման մասին էր: Ըստ բուհի ռեկտորի ժամանակավոր պաշտոնակատարի, եթե անգամ միավորումը ռեալ ծրագրի տեսք ստանա, դեմ կամ կողմ լինելուց առաջ պետք է պայմանները հստակեցնեն ու ուսումնասիրեն: Գիտխորհուրդը դռնփակ նիստում քննարկել է անելիքները ու թե ինչպիսին է լինելու արձագանքը նախարարի հայտարարությանը: Թեժ քննարկումից հետո ՇՊՀ հանրույթը հանդես է եկել կոչով, որում ասված է.

«Ի պատասխան Կրթության, գիտության, մշակույթի և սպորտի նախարար Ա. Հարությունյանի՝ 12.06.2019թ. ԱԺ-ում՝ հանձնաժողովների համատեղ նիստում արված հայտարարության՝ ՇՊՀ-ի հանրույթը կոչ է անում.

Հարգելի՛ պարոն նախարար, ՇՊՀ-ի վերաբերյալ Ձեզ ներկայացված տեղեկատվությունը կողմնակալ է և ընտրողական: ՇՊՀ-ն այսօր ապրում է իր բնականոն կյանքով: Այս տարի նշելու ենք մեր բուհի 85-ամյակը և այսուհետ ընդունելով ժամանակի մարտահրավերները՝ հաստատակամ կերպով Ձեզ հետ նշելու ենք նաև բուհի 90-ամյակը:

Ներկայացվող բարոյահոգեբանական լարված մթնոլորտը վատ ղեկավարման և իրականացվող նպատակադիր քաղաքականության հետևանք է, որին երկար ժամանակ չէինք ուզում հավատալ: Որոշ ուժերի հեռահար հավակնությունների և հուսահատ ճիգերի գործադրման արդյունքում բուհի ճակատագիրը զոհասեղանին դնելը Շիրակի մարզի և Գյումրի քաղաքի համար կունենա կործանարար հետևանքներ: