Իսկապե՞ս. վարչապետը՝ առողջապահական մի շարք ծառայությունների անվճար դառնալու մասին

Առողջապահության նախարարությանը հատկացվեց 12 մլրդ 33 հազար դրամ: Նման որոշում ընդունվեց կառավարության այսօրվա նիստում: Որոշումով նախատեսվում է իրականացնել առողջապահության ոլորտի առավել հրատապություն և կարևորություն ունեցող մի շարք ծրագրերի ընդլայնում, պետության կողմից երաշխավորված անվճար և արտոնյալ պայմաններով մատուցվող ծառայություններից օգտվող շահառուների խմբի ավելացում, ինչպես նաև մատուցվող ծառայությունների գների համահարթեցում:

ՀՀ առողջապահության նախարարի տեղակալ Անահիտ Ավանեսյանը նշեց, որ ծրագրերից յուրաքանչյուրն ուղղված է կյանքեր փրկելու, կյանքի տևողության և որակի բարձրացմանը ինչպես պացիենտների, այնպես էլ նրանց հարազատների դեպքում: Ավանեսյանն ասաց, որ սա նաև տնտեսական էֆեկտ է ունենալու, այն է՝ մարդկային կապիտալի՝ որպես տնտեսական որակյալ ներուժի ներգրավումը երկրի տնտեսության զարգացման մեջ:

ՀՀ վարչապետ Նիկոլ Փաշինյանը խոսեց այս որոշման գաղափարաբանության և կառավարության կողմից իրականացվող տնտեսական քաղաքականությանը և տնտեսական հեղափոխության փիլիսոփայության հետ դրա առնչության մասին:

«Կա երկու ճանապարհ, դրանցից մենք ընտրել ենք հետևյալը՝ ասել ենք, որ տնտեսական հեղափոխության հիմնական գործող անձը պետք է լինի ՀՀ քաղաքացին: Մենք հիմա այս շատ լուրջ որոշումներով որդեգրում ենք հետևյալ ուղղությունը, պետք է ամեն ինչ անենք, որ քաղաքացին լինի առողջ, առաջին հերթին՝ սոցիալապես անապահով քաղաքացին, որ աշխատելու, ստեղծագործելու և հուսահատ սոցիալական վիճակը հաղթահարելու հնարավորություն լինի: Մենք այս գումարը ինչ-որ չափով կարող էինք այդ ընտանիքներին վճարել, ասել՝ ուղղակի ավելացնում ենք, նրանցից յուրաքանչյուրն իր ճաշակով կօգտագործեր, մենք ընդհանուր առմամբ երկարաժամկետ և կապիտալ էֆեկտներ չէինք ունենա: Հակառակը՝ կառավարությունը որոշում է այդ գումարները ծախսել ՀՀ քաղաքացիների առողջության պահպանման և հիվանդությունների կանխարգելման, նրանց բնականոն կյանքը, առողջությունն ապահովելու համար»,- ասաց նա:

Վարչապետը նշեց, որ այս առումով թվերն իսկապես տպավորիչ են, մի քանի հարյուր հազար մարդ առնչվում է այս որոշումների հետ, և դրանով այս տարի և ընդհանրապես կլուծեն այն խնդիրը, որ նախկինում ունեցել են: Փաշինյանի գնահատմամբ՝ սա մարդկային կապիտալի զարգացմանն ուղղված շատ կոնկրետ ծախս է, ապա ուղղեց շատերին հուզող հարցը.

«Իսկականի՞ց, իսկականից անվճա՞ր են ստանում, թե՞, այնուամենայնիվ, 70 տոկոս անվճար, կամ 90 տոկոս: Մենք հիմա դա իսկապե՞ս կարողանում ենք առնվազն գների, նաև առողջապահական հիմնարկների շահերի պահպանության տեսակետից ապահովել. մարդը իր երեխայի հետ մտավ հիվանդանոց, դուրս եկավ, այդ ընթացքում գումար չծախսվե՞ց»:

Մանրամասները՝ տեսանյութում: