Հեղեղներ Ճապոնիայում և ՌԴ-ում, պտտահողմ Չինաստանում, սաստիկ շոգ Հնդկաստանում. վերջին օրերի եղանակային «անակնկալները»

Աշխարհի տարբեր հատվածներում եղանակային անոմալիաները բազմաթիվ զոհերի և վիրավորների պատճառ են դարձել, ինչպես նաև մեծ ավերածություններ գործել:

Ճապոնիայի հարավարևելյան Կյուշու կղզում օրեր շարունակվող հորդառատ անձրևները սողանքների և հեղեղների պատճառ են դարձել: Շուրջ 1 մլն մարդ տարհանման հրաման է ստացել: Չհաստատված տեղեկություններով՝ առնվազն 20 մարդ մահացել է կամ անհետ կորել: Երկրի վարչապետ Աբե Սինձոն հրահանգել է լավագույնս իրականացնել փրկարարական աշխատանքները: Հեղեղներից տուժած շրջաններում զորքեր են տեղակայվել:

Իսկ Չինաստանի հարավում պտտահողմ է մոլեգնել: Կայուան քաղաքում այն 6 մարդու կյանք է խլել: 190 մարդ տարբեր աստիճանի վնասվածքներ է ստացել: Հսկայական պտտահողմն օդ է բարձրացրել աղբ, փայտանյութ, պայուսակներ: Պտտահողմն իր հետևից նաև ավերածություններ է թողել՝ կոտրել ապակիներ, պոկել տանիքներ: Տեղի իշխանությունների փոխանցմամբ՝ քամու արագությունը հասել է 83կմ/ժամի:

Այս ամենին զուգահեռ հեղեղներ են նաև Ռուսաստանում: Իրկուտսկում հունիսի 24-27-ը տեղացած հորդառատ անձրևներից Անգարա գետի ձախ վտակները դուրս են եկել ափերից՝ դառնալով ջրհեղեղի պատճառ: Այսօր արդեն նահանգային իշխանությունները հաղորդել են զոհերի թվի աճի մասին: Այս պահի դրությամբ կա 21 զոհ, 14 անհետ կորած: 300-ից ավելի մարդ դեռ հիվանդանոցում է գտնվում: Իրկուտսկի 16 բնակավայրում դեռ հեղեղված է մնում 2700 տուն: Ավելի քան 3 հազար տուն այլևս պիտանի չէ կյանքի համար: Որոնողական-փրկարարական աշխատանքները շարունակվում են: Նահանգում արտակարգ դրության ռեժիմ է սահմանվել:

Իսկ Հնդկաստանում այս ամառ ուժգին շոգի պատճառով արդեն ավելի քան 100 մարդ է մահացել: Մի ամբողջ քաղաք լճերի ցամաքելու պատճառով մնացել էր առանց ջրի:

Մասնագետները կարծում են, որ իրավիճակն առաջիկա տարիներին է՛լ ավելի կվատանա և հումանիտար ճգնաժամի կհանգեցնի. Հնդկաստանի բավականին մեծ տարածքներ բնակության համար անպիտան կդառնան: CNN-ի փոխանցմամբ՝ տապի սեզոնը Հնդկաստանում սովորաբար տևում է մարտից հուլիս և մեղմանում է մուսսոնային անձրևների ժամանակ: Սակայն վերջին տարիներին տապի ալիքներն ավելի ուժգին են դարձել, ավելի հաճախակի են վրա հասնում և ավելի երկարատև են:

Կլիմայական փոփոխություններով զբաղվող մասնագետները համարում են, որ Հնդկաստանն այն երկրներից մեկն է, որն ամենաշատը կտուժի կլիմայական ճգնաժամից:

Ի դեպ, Հնդկաստանում իրավիճակը եզակի չէ: Այս տարի անոմալ տապից տուժել են նաև եվրոպական բազմաթիվ երկրներ, այդ թվում՝ Ֆրանսիան, Գերմանիան, Իսպանիան, հարավասիական և աֆրիկյան պետություններ:

Մասաչուսեթսի տեխնոլոգիական ինստիտուտի մասնագետները երկու սցենար են կանխատեսնում. կա՛մ Երկրի մակերևույթի ջերմաստիճանը մինչև դարավերջ կբարձրանա ըստ Ցելսիուսի 4.5 աստիճանով, կա՛մ, ինչն ավելի լավատեսական է՝ 2.2 աստիճանով:

Այնուամենայնիվ, երկու տարբերակներն էլ գերազանցում են կլիմայի մասին Փարիզի համաձայնագրով նախատեսված թիրախը, այն է՝ մինչև դարավերջ գլոբալ ջերմաստիճանը չպետք է գերազանցի 2 աստիճանի շեմը: