«Ժամանակն է, որ մենք դուրս գանք այս ծիծաղելի անվերջ պատերազմներից». Թրամփը բացատրել է զորքերի դուրսբերումը Սիրիայից

Թուրքիայի նախագահ Ռեջեփ Թայիփ Էրդողանը հաստատել է, որ Սիրիայի հյուսիս-արևելքից ամերիկյան զորքերի դուրսբերումը մեկնարկել է: Այս հայտարարությունից հետո ԱՄՆ նախագահ Դոնալդ Թրամփը հայտնել է, որ Վաշինգտոնն այլևս չի մասնակցի Սիրիայում ընթացող անվերջ պատերազմներին:

«Քրդերը կռվել են մեզ հետ, բայց նրանք մեծ գումար և սարքավորումներ են ստացել դրա համար: Նրանք տասնամյակներ շարունակ կռվել են Թուրքիայի դեմ… Ժամանակն է, որ մենք դուրս գանք այս ծիծաղելի անվերջ պատերազմներից, որոնց մեծ մասը կլանային են, և մեր զինվորներին տուն բերենք: Մենք կկռվենք այնտեղ, որտեղ դա մեր շահերից է բխում, և կկռվենք հաղթելու համար: Թուրքիան, Եվրոպան, Սիրիան, Իրանը, Իրաքը, Ռուսաստանը և քրդերը պետք է ինքնուրույն դուրս գան այս իրավիճակից և որոշեն, թե ինչ են ուզում անել գերեվարված ԻՊ գրոհայինների հետ, որոնք գտնվում են իրենց հարևանությամբ: Մենք 7000 մղոն հեռավորության վրա ենք գտնվում և կրկին կջախջախենք ԻՊ-ին, եթե նրանք մոտենան մեզ»,- գրել է Թրամփը:

The United States was supposed to be in Syria for 30 days, that was many years ago. We stayed and got deeper and deeper into battle with no aim in sight. When I arrived in Washington, ISIS was running rampant in the area. We quickly defeated 100% of the ISIS Caliphate,…..

— Donald J. Trump (@realDonaldTrump) October 7, 2019

….almost 3 years, but it is time for us to get out of these ridiculous Endless Wars, many of them tribal, and bring our soldiers home. WE WILL FIGHT WHERE IT IS TO OUR BENEFIT, AND ONLY FIGHT TO WIN. Turkey, Europe, Syria, Iran, Iraq, Russia and the Kurds will now have to…..

— Donald J. Trump (@realDonaldTrump) October 7, 2019

Ավելի վաղ Էրդողանը հայտնել էր, որ ամերիկյան զորքերը դուրս են գալիս Սիրիայի հյուսիսից, որտեղ Թուրքիան ռազմական գործողություն է սկսելու քրդերի դեմ: Թուրքիայի նախագահն ընդգծել էր, որ Անկարայի նպատակն է մաքրել սիրիական սահմանամերձ տարածքները քրդական ուժերից, այնտեղ անվտանգության գոտի ստեղծել Թուրքիայում գտնվող սիրիացի փախստականների համար:

Սիրիայի հյուսիսում գտնվող քրդական քաղաքների բնակիչները ցույցի են դուրս եկել՝ միջազգային կոալիցիային կոչ անելով կասեցնել Թուրքիայի նախատեսած ռազմական գործողությունը քրդական ուժերի դեմ: Սիրիայում ԱՄՆ-ի գլխավոր դաշնակից քրդերին Թուրքիան համարում է ահաբեկիչներ: Ամերիկյան զորքերի դուրսբերումը քրդական խմբավորումներն անվանել են մեջքից հարված: