Ռազմական գործը մարդկության պատմության մեջ շարունակում է մնալ ամենաինտելեկտուալը. Նիկոլ Փաշինյան

ՀՀ վարչապետ Նիկոլ Փաշինյանը Վազգեն Սարգսյանի անվան ռազմական համալսարանի 25-ամյակի միջոցառման ժամանակ նշեց՝ այս կրթօջախը հիմնված է հայ ժողովրդի ազատագրական պայքարի, փառահեղ հաղթանակի վրա:

«Այս շինությունը պիտի որպես հայոց պետականության, հայ ժողովրդի անվտանգության ողնաշար ամրանա, կառուցվի, ամուր կանգնի հայ ժողովրդի, Հայաստանի Հանրապետության, Արցախի Հանրապետության պաշտպանության դիրքերում: Ռազմական համալսարանի հազարավոր շրջանավարտներ ծառայություն են իրականացրել, փառապանծ ծառայություն Զինված ուժերում, և դրա վրա է հիմնված այսօրվա հզոր, մարտունակ, վստահ ՀՀ բանակը, Արցախի պաշտպանության բանակը»,- ասաց նա:

Փաշինյանը նշեց՝ ռազմական համալսարանն այս ընթացքում ունեցել է բազմաթիվ փառապանծ էջեր, ունեցել է նաև դժվար էջեր, և եկել է ժամանակը, որ իրենց առաջ նոր խնդիրներ դնեն: Տոնական այս օրը վարչապետը խոսեց նաև այդ նոր խնդիրների մասին, ուղերձով դիմեց ռազմական համալսարանի կուրսանտներին, դասախոսական անձնակազմին ու ծառայողներին:

«Մի քանի անգամ առիթ ունեցել եմ ասելու, այսօր էլ չեմ զլանա կրկնել. մեզ հայտնի են ռազմական գործի մի քանի ասպեկտներ, հայտնի է ուժային ասպեկտը, հոգեբանականը, բայց ես ուզում եմ ընդգծել, որ մարդկության պատմության ողջ ընթացքում ռազմական գործը եղել է և շարունակում է մնալ ամենաինտելեկտուալ գործերից մեկը, եթե ոչ ամենաինտելեկտուալը: Թույլ տվեք ասել, որ մարդկության պատմության առաջին օրերից և մինչև այսօր հենց անվտանգության կարիքները, ռազմական գործն է քաղաքակրթության զարգացման ամենամեծ խթանը: Այսօր բազմաթիվ տեխնոլոգիական նորամուծություններ, որպես ամենօրյա գործիք, որ օգտագործում են կենացաղում, ի սկզբանե ստեղծվել են որպես ռազմական գործի անվտանգության անբաժանելի մաս, և ես կարծում եմ, որ այս փուլում, երբ ՀՀ ԶՈւ սպառազինության և տեխնիկայի զարգացումը, մարտունակության զարգացումը բոլորովին նոր փուլ է թևակոխել, ինտելեկտուալ աշխատանքը պիտի դառնա մեր ԶՈւ զարգացման կարևորագույն առանձնահատկություններից մեկը»,- նշեց նա:

Վարչապետի խոսքով՝ երբ ասում ենք, որ ՀՀ զինված ուժերը, հայոց բանակը պետք է լինեն մարտունակ, միջազգային ամենաբարձր ստանդարտներով, նկատի ունենք առաջին հերթին, որ Հայոց բանակը պետք է մարտունակ լինի ինտելեկտուալ առումով, որ պետք է լինի աշխարհի ամենաինտելեկտուալ բանակներից մեկը. սա է խնդիրը, որ այսօր առաջադրում են և իրար հետ պիտի լուծեն:

«Ես ուզում եմ ռազմական գործի՝ քաղաքակրթության խթան լինելը, ի ցույց դնելու համար մի քանի օրինակ բերել. այսօր անգամ քաղաքական, տնտեսական ցանկացած գործունեության ոլորտում իրենց ամենօրյա աշխատանքի մեջ մարդիկ օգտագործում են այնպիսի բառեր, ինչպիսիք են «մարտավարություն», «ռազմավարություն», «դիրքորոշում», «թիրախ», այս բառերն օգտագործում են՝ ընդհանրապես որևէ կոնտեքստ չունենալով ռազմական գործի հետ: Դա օգտագործում ենք ամեն օր կառավարության նիստերին՝ տնտեսական, սոցիալական, կրթական հարցեր լուծելիս, հետևաբար՝ ռազմական գործի, ռազմական կրթության այս ասպեկտը պիտի ընդգծվի ավելի ու ավելի ուժեղ, և Վազգեն Սարգսյանի անվան ռազմական համալսարանները, ռազմական ուսումնական հաստատությունները պետք է մեր կրթական համակարգում նաև տանող ուժի դերակատարում ունենան»,- նշեց Փաշինյանը:

Նա ընդգծեց կուրսանտների և կուրսշրջանավարտների շրջանում կանանց ներկայացվածությունը: