Մաքսազերծման սպասող ավտոմեքենաների կիլոմետրեր ձգվող հերթեր Գյումրիի ավտոմաքսատան փողոցում և բնակելի թաղամասերի նրբանցքներում

Գյումրիի ավտոմաքսատան մուտքից մինչև Խրիմյան Հայրիկ փողոցի 1-ին թաղամաս տանող փողոցի երկայնքով մաքսազերծման հերթին սպասող մեքենաների մեկուկես կիլոմետր երկարության շարան է:

Բնակելի շենքերի շրջակայքը վերածվել է հարմար կայանատեղիի: Մեքենայի մաքսազերծման համար վարորդների մեծ մասը դեռ երեկվանից՝ ուշ երեկոյան են եկել, այսպես ասած, հերթ պահել փողոցի այն հատվածում, որտեղ ազատ են գտել: Հերթով, կարգով ու շարքով մեքենաների շարասյունը սկսում է առաջ շարժվել, միայն թե շարասյան սկիզբը տեսանելի է, իսկ վերջը՝ ոչ:

Տեղ չկա, բայց կայանելու ելք գտնում են վարորդները: Շենքերի նրբանցքներում, երբեմն էլ սեփական տների բակերում մեքենան կայանելու տեղ են գտնում: Սրանից դժգոհող մարդիկ էլ հենց սեփական տան ապրողներն են, ասում են՝ իրենց տուն ելումուտը փակում են:

Թաղամասի բնակիչներն արդեն գիտեն, թե մեքենաների կուտակման պիկ ժամը որն է:  Հոսքը սկսվում է  լուսադեմից մինչև առավոտյան ժամը 9-ը, երբեմն նաև խցանումներ են առաջանում Խրիմյան Հայրիկ փողոցից մինչև մաքսատուն: Թեև այսպիսի իրավիճակները բոլորն էլ գիտեն, որ ժամանակավոր են, դեկտեմբերի 31-ից հետո նման հոսք չի լինի:

Տարածքում երթևեկության, կարգուկանոնի պատասխանատուն ճանապարհային ոստիկանությունն է: 4-ից ավելի կարգախմբեր տարբեր ժամերի աշխատում են: Իսկ խցանումները հիմնականում առավոտյան են լինում, բայց բանը անկառավարելի կամ անանցանելի վիճակի չի հասնում:

Խրիմյան Հայրիկ փողոցի երկու կողմերում ու ամբողջ երկայնքով կայանված մեքենաների թիվն ամեն օր հասնում է մինչև հազարի: Ավտոմաքսատունն աշխատում է իր բոլոր հնարավորություններով, 3 ժամում 300-ից ավելի մեքենա է մաքսազերծվում: Ավտոներկրողներն ու անհատները շտապում են մեքենաներ բերել մինչև դեկտեմբերի 31-ը՝ նախքան Եվրասիական տնտեսական միության կարգավորումների համաձայն մաքսազերծման նոր դրույքաչափերի ուժի մեջ մտնելը: Ճանապարհային ոստիկանությունը տոն օրերին աշխատելու են խստացված ռեժիմով:

«Տոնական և հետտոնական ճանապարհային ոստիկանության մեր կարգախմբերը ուժեղացված ծառայություն կիրականացնեն։ 14-15 կարգախմբեր են հերթապահելու, լինելու է նաև գիշերային ծառայություն։ Ու մենք ավելի շատ շեշտը դնելու ենք ոչ սթափ վարորդների վրա, կլինենք շատ օբյեկտիվ ու խիստ»,- SHANTNEWS.am-ի հետ զրույցում ասել է ՃՈ 3-րդ դասակի հրամանատար Լյուդվիգ Ղանդիլյանը։