Պյոտր Սվիտալսկին միևնույն ժամանակ հավելել է, որ իշխանության ու հանրության առջև այս պահին մեծ մարտահրավերներ կան՝ պահպանելու դրական փոփոխությունները։
«Հայաստանյան վերջին զարգացումները գնահատելու համար դեռ պետք է սպասել, հավանաբար՝ անգամ թողնենք պատմաբաններին: Հավատում եմ, որ այն, ինչ տեղի ունեցավ Հայաստանում, շատ խորն է: Խոսքը իշխանության փոփոխության, նոր դեմքերի, կառավարությունում քաղաքական գործիչների մասին չէ, խոսքը նաև սոցիալական, տնտեսական, կրթական քաղաքականությունների փոփոխության մասին չէ:
Կարծում եմ, այն, ինչ տեղի ունեցավ Հայաստանում, վերաբերում է մարդկանց մտածելակերպին, դա մտածելակերպի հեղափոխություն էր: Կարծում եմ՝ մարդիկ որոշեցին ազատագրվել անցյալի մտածողությունից, անցյալի սինդրոմներից:
Կարծում եմ՝ սա խորն է, տևական: Շատ կարևոր էր երիտասարդների մասնակցությունը: Այն, ինչ տեղի ունեցավ երեք շաբաթ առաջ, խորն էր, այն թափանցեց մարդկանց միտքը: Մեծ մարտահրավերներ կան այս պահին՝ և՛ իշխանության, և՛ հանրության առջև, թե ինչպես պահպանել այս դրական փոփոխությունները, էներգիան, որը ճառագում է մարդկանցից»,- ասել է նա:
Երևանում Եվրամիության պատվիրակության ղեկավարի խոսքերով՝ օտարերկրյա դիտորդներին ակնհայտ էր, որ հայաստանյան հանրության ներսում լուրջ դժգոհություն է կուտակվել, հանրությունը բավարարված չէր տնտեսական զարգացմամբ, դժգոհ էր աղքատության, գործազրկության բարձր մակարդակից:
Անդրադառնալով առաջիկայում հնարավոր արտահերթ խորհրդարանական ընտրություններին՝ Սվիտասլկին հայտարարել է, որ Եվրամիությունը պատրաստ է աջակցել այդ ընտրությունների անցկացմանը:
